މެންޑެލްސަންގެ ދޮގު ތަކުގައި ޖެހެވުނީތީ، އެޕްސްޓީންގެ ޝިކާރައަކަށްވި މީހުންގެ ކިބައިން ބޮޑު ވަޒީރު ސްޓާމަރ މައާފަށް އެދިވަޑައިގެންފި

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގުޅުން އޮތް އިނގިރޭސިވިލާތުގެ ކުރީގެ މިނިސްޓަރު ޕީޓާ މެންޑެލްސަންގެ ދޮގު ތަކުގައި ޖެހި، އޭނާ މަގާމަށް އައްޔަން ކުރެވުނީތީ އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ މައާފަށް އެދިވަޑައިގެންފި އެވެ. 

އިނގިރޭސިވިލާތުން އެމެެރިކާ އަށް ކަނޑައަޅުއްވާފައި ހުންނެވި ސަފީރުގެ މަގާމުން މެންޑެލްސަން ވަކި ކުރީ ވެސް، އެޕްސްޓީންއާ އޭނާއާ ދެމެދު ގުޅުމެއް އޮތް ކަމަށް ހާމަވުމުންނެވެ. އޭގެ ފަހުން ނެރުނު ލިޔުން ތަކުގައި މެންޑެލްސަން އާއި އެޕްސްޓީންއާ ދެމެދު ގުޅުން އޮތް ކަމަށް ހާމަވުމުން، މެންޑެލްސަން ވަނީ ވެރިކަން ކުރާ ލޭބާ ޕާޓީގެ މެމްބަރު ކަމުން އިސްތިއުފާ ދެއްވައިފަ އެވެ. 

ސަފީރު ކަމުގެ މަގާމަށް މެންޑެލްސަން އައްޔަން ކުރެއްވީއިރު ވެސް، އޭނާ އާއި އެޕްސްޓީންއާ ދެމެދު ގުޅުމެއް އޮތް ކަމަށް އެނގިހުރެ، އޭނާ މަގާމަށް އައްޔަން ކުރުމުން ބޮޑު ވަޒީރު ސްޓާމަރ އަށް ވަނީ ފާޑު ކިޔުން އަމާޒުވެފަ އެވެ. ސްޓާމާ ވިދާޅުވެފައި ވަނީ މަގާމަށް އައްޔަން ކުރުމުގެ ވެޓިން މަރުހަލާގައި ވެސް، އެޕްސްޓީންއާ ގުޅުން އޮތް ކަމަށް މެންޑެލްސަން ބުނެފައިވާ ކަމަށެވެ. ނަމަވެސް، އެޕްސްޓީންއާ އޮތް ގުޅުމާ ގުޅޭ ގޮތުން މެންޑެލްސަން ދޮގު ހަދާފައިވާ ކަމަށް ސްޓާމަރ ވިދާޅުވި އެވެ. 

އޭގެ ފަހުން ލޯކަލް ކޮމިއުނިޓީ އަށް ފަންޑު ހޯދުމަށް ބޭއްވި އިވެންޓެއްގައި ބައިވެރިވެ ވަޑައިގެން ވާހަކަ ދައްކަވަމުން ބޮޑު ވަޒީރު ސްޓާމަރ ވިދާޅުވީ، މެންޑެލްސަންގެ ދޮގު ތަކުގައި ޖެހެވިފައިވާތީ، އެޕްސްޓީންގެ ޝިކާރަ އަކަށްވީ މީހުންގެ ކިބައިން މައާފަށް އެދިވަޑައިގަންނަވާ ކަމަށެވެ. ބޮޑު ވަޒީރު ސްޓާމަރ މައާފަށް އެދިވަޑައިގެންފައިވާއިރު، އޭނާ ލީޑަރުކަން ކުރައްވާ ލޭބާ ޕާޓީގެ އެތެރެއިން ވެސް ސްޓާމަރ އަށް ވަނީ ޕްރެޝަރު އަމާޒުވެފަ އެވެ. 

ސްޓާމަރ ވިދާޅުވީ މެންޑެލްސަން އާއި، އެޕްސްޓީންއާ ދެމެދު ގުޅުމެއް އޮތްކަން ކުރިން ވެސް އެނގޭ ކަމަށެވެ. ނަމަވެސް، އެ ގުޅުމުގެ ފުން މިނާއި، އޭގެ ނުރައްކާތެރިކަން އެއްވެސް މީހަކަށް އެނގިފައި ނެތް ކަމަށް ބޮޑު ވަޒީރު ސްޓާމަރ ފާހަގަ ކުރެއްވި އެވެ. އެޕްސްޓީންގެ ޝިކާރަ އަކަށްވީ މީހުންނާ މުޚާތަބު ކުރައްވައި ސްޓާމަރ ވިދާޅުވީ، ބާރު ގަދަ މަގާމު ތަކުގައި ތިބި ބަޔަކު އެ ފަރާތް ތަަކަށް އިހުމާލުވެފައިވާތީ ހިތާމަ ކުރައްވާ ކަމަށެވެ. ހަމަ އެއާ އެކު، މެންޑެލްސަންގެ ދޮގު ތަކުގައި ޖެހި، އިނގިރޭސިވިލާތުން އެމެރިކާ އަށް ކަނޑައަޅުއްވާފައި ހުންނަވާ ސަފީރު ކަމަށް އޭނާ އައްޔަން ކުރެއްވުނީތީ މައާފަށް އެދިވަޑައި ގަންނަވާ ކަމަށެވެ. 

މި މައްސަލައިގައި މިދިޔަ ހަފުތާގެ ތެރޭގައި އޮތް ޤާނޫނު ހަދާ މަޖިލީހުގެ ބައްދަލުވުމުގައި ވެސް ވަނީ ސްޓާމަރ އަށް ނުރުހުން އަމާޒުވެފަ އެވެ. މި މައްސަލައިގައި ސަރުކާރުން ހިފަހައްޓަން މަސައްކަތް ކުރި ބައެއް ލިޔެ ކިޔުންތައް، ޤާނޫނު ހަދާ މަޖިލީހުގެ އިންޓެލިޖެންސް އެންޑް ސެކިއުރިޓީ ކޮމެޓީ އަށް ހުށަހެޅުމަށް މިހާރު ވަނީ ނިންމައިފަ އެވެ. އެ މައުލޫމާތުގެ ތެރެއިން އާންމުކުރާނީ ކޮން މައުލޫމާތު ތަކެއްކަން ކަނޑައަޅާނީ ކެބިނެޓު ސެކްރެޓަރީ އެވެ.