އެޕްސްޓީންއާ ގުޅުން އޮތް މެންޑެލްސަންގެ މައްސަލައިގައި، އިނގިރޭސި ބޮޑު ވަޒީރު ސްޓާމާ ހޫނު ފެނަށް
ބޮޑު ވަޒީރު ސްޓާމާ ވިދާޅުވެފައި ވަނީ، އެންމެ ފުރަތަމަ މަރުހަލާގެ ތެރޭގައި ވެސް އެޕްސްޓީން އާ އޮތް ގުޅުމާ ގުޅޭ ގޮތުން މެންޑެލްސަން މައުލޫމާތު ދީފައިވާ ކަމަށް. ނަމަވެސް، އެޕްސްޓީންއާ އޮތް ގާތް ގުޅުމުގެ ކަންތަކުގައި އޭނާ ދޮގު ހަދާފައިވާ ކަމަށް ތުހުމަތު ކުރެވޭ ކަމަށް ސްޓާމާ ވިދާޅުވި.
ބޮޑު ވަޒީރުގެ ސުވާލު ސެޝަން އަށް ވަޑައިގެންނެވުމަށް އިނގިރޭސި ބޮޑު ވަޒީރު ސްޓާމާ، 10 ޑައުނިން ސްޓްރީޓް އިން ނިކުމެ ވަޑައިގަންނަވަނީ. | ގެޓީ އިމޭޖަސް
އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގާތް ގުޅުމެއް ބޭއްވި، އިނގިރޭސިވިލާތުގެ ކުރީގެ މިނިސްޓަރު ޕީޓާ މެންޑެލްސަންގެ މައްސަލައިގައި އެ ޤައުމުގެ ބޮޑު ވަޒީރު ކިއާ ސްޓާމާ ހޫނު ފެނަށް ވެއްޓިއްޖެ އެވެ.
އެޕްސްޓީންގެ މައްސަލައިގައި އެމެރިކާހެ ޖަސްޓިސް ޑިޕާޓްމަންޓް އިން އެންމެ ފަހުން އާންމު ކުރި ލިޔުން ތަކުން އިނގޭ ގޮތުގައި، މެންޑެލްސަން އާއި އެޕްސްޓީންއާ ދެމެދު ގާތް ގުޅުމެއް އޮތެވެ. އެއާ އެކު، މިދިޔަ ހަފުތާގެ ތެރޭގައި މެންޑެލްސަން ވަނީ ވެރިކަން ކުރާ ލޭބާ ޕާޓީ އިން އިސްތިއުފާ ދީފަ އެވެ. އޭގެ ކުރިން އޭނާއާ އެޕްސްޓީންއާ ދެެމެދު މުއާމަލާތް ތަކެއް ކޮށްފައިވާކަން ހާމަވުމާ އެކު، އެމެރިކާ އަށް އިނގިރޭސިވިލާތުން ކަނޑައަޅާފައި ހުންނެވި ސަފީރުގެ މަގާމުން ވެސް އޭނާ ވަނީ ވަކި ކޮށްފަ އެވެ.
ބުދަ ދުވަހު ކުރިއަށް ދިޔަ ޤާނޫނު ހަދާ މަޖިލީހުގެ ބައްދަލުވުމުގައި ގިނަ މެމްބަރުން ވަނީ އެ މައްސަލައާ ގުޅިގެން ވާހަކަ ދައްކައިފަ އެވެ. އަދި އެ މައްސަލައިގައި ކަންކަން ހިނގައި ދިޔަ ގޮތް ފުރިހަމަ އަށް ހާމަ ކުރުމަށް ވަނީ، ބޮޑު ވަޒީރު ސްޓާމާ އާއި ސަރުކާރަށް ގޮވާލައިފަ އެވެ. އޭގެ ތެރޭގައި ސްޓާމާ ލީޑަރުކަން ކުރައްވާ ލޭބާ ޕާޓީގެ މެމްބަރުން ވެސް ހިމެނެ އެވެ.
މެމްބަރުން ބުނެފައި ވަނީ، ބޮޑު ވަޒީރާއި، ސަރުކާރަށް އޮންނަ އިތުބާރު ކުޑަ ވަމުން އަންނަ ކަމަށާއި، އިތުބާރު ނެތް ކަމުގެ ވޯޓަކާ ކުރިމަތިލާން ޖެހިއްޖެ ޙާލަތެއްގައި ބޮޑު ވަޒީރަށް ތާއީދު ކުރެވޭނެކަން ޔަޤީން ނޫން ކަމަށެވެ. 2024 ވަނަ އަހަރު އިންތިޚާބުވި، ސަރުކާރަށް ވަފާތެރި މެމްބަރުން ބުނެފައި ވަނީ، އެންމެ ބޮޑަށް ނުތަނަވަސްކަން އޮތީ ސަރުކާރަށް ވަފާވެރި މެމްބަރުންގެ ތެރޭގައި ކަމަށެވެ.
ބޮޑު ވަޒީރު ސްޓާމާ ވިދާޅުވެފައި ވަނީ، އެންމެ ފުރަތަމަ މަރުހަލާގެ ތެރޭގައި ވެސް އެޕްސްޓީންއާ އޮތް ގުޅުމާ ގުޅޭ ގޮތުން މެންޑެލްސަން މައުލޫމާތު ދީފައިވާ ކަމަށެވެ. ނަމަވެސް، އެޕްސްޓީންއާ އޮތް ގާތް ގުޅުމުގެ ކަންތަކުގައި އޭނާ ދޮގު ހަދާފައިވާ ކަމަށް ތުހުމަތު ކުރެވޭ ކަމަށް ސްޓާމާ ވިދާޅުވި އެވެ. ސްޓާމާގެ ވާހަކަތަކާ ގުޅޭ ގޮތުން ބޮޑު ވަޒީރުގެ އޮފީސް، 10 ޑައުނިން ސްޓްރީޓް އިން ބުނެފައި ވަނީ، ބޮޑު ވަޒީރަށް އެނގިވަޑައިގަންނަވަނީ އާންމުނަށް ވެސް އެނގިފައިވާ ކަންކަމުގެ މައުލޫމާތު ކަމަށެވެ.
މެންޑެލްސަން އަށް ވަޒީފާ ދީފައި ވަނީ، އޭނާ އާއި އެޕްސްޓީންއާ ދެމެދު ގުޅުން އޮތްކަން އެނގިހުރެ ކަމަށް ގިނަ މެމްބަރުން ތުހުމަތު ކޮށްފައިވެ އެވެ. މެމްބަރަކު ބުނެފައި ވަނީ، މިއީ ކްރިސް ޕިންޗާގެ މައްސަލަ އަށް ވުރެ ވެސް ބޮޑު މައްސަލައެއްގެ ގޮތުގައި ބޮޑު ވަޒީރު ސްޓާމާ ޤަބޫލު ކުރައްވަން ޖެހޭ ކަމަށެވެ.
މެންޑެލްސަންގެ މައްސަލައިގައި ސްޓާމާ އަށް އެތައް ފާޑު ކިޔުން ތަކެއް އަމާޒުވެފައިވާއިރު، ސްޓާމާ ވިދާޅުވެފައި ވަނީ މެންޑެލްސަންގެ ލަގަބު އަތުލުމަށް ޤާނޫނެއް ހަދަން ފަށާނެ ކަމަށާއި، ޕްރިވީ ކައުންސިލް ލިސްޓުން އޭނާ އުނި ކުރުމަށް ރަސްގެފާނު ޗާލްސްގެ ކިބައިން ވެސް އެދިވަޑައިގެންފައިވާ ކަަމަށެވެ.
މަސްދަރު: ދި ގާޑިއަން
