ރައީސް މުއިއްޒު ސައުދީ ވަލީއަހުދަށް ސިޓީފުޅެއް ފޮނުއްވައިފި

ސައުދީ އަރަބިއްޔާގެ ވަލީއަހުދު އަދި ބޮޑުވަޒީރު، އަމީރު މުޙައްމަދު ބިން ސަލްމާން ބިން ޢަބްދުލްޢަޒީޒް އާލް ސައުދަށް، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސިޓީފުޅެއް ފޮނުއްވައިފި އެވެ.

ރައީސް މުޢިއްޒު ފޮނުއްވި މި ސިޓީފުޅަކީ ދެ ޤައުމުގެ ދެމެދުގައި އޮތް ބައިލެޓަރަލް ނުވަތަ ދޭދޭ ގުޅުންތަކާ ގުޅޭގޮތުން ފޮނުއްވި ސިޓީފުޅެކެވެ.

ސައުދީ އަރަބިއްޔާގެ ވެރިރަށް ރިޔާޟްގައި ހުންނަ އެ ޤައުމުގެ ފޮރިން މިނިސްޓްރީގައި ބުރާސްފަތި ދުވަހު ބޭއްވި ބައްދަލުވުމެއްގައި، ރައީސުލްޖުމްހޫރިއްޔާގެ މި ސިޓީފުޅާ ހަވާލުވެވަޑައިގަތީ ސައުދީގެ ވައިސް މިނިސްޓަރ އޮފް ފޮރިން އެފެއާޒް ވަލީދު އަލްޚުރައިޖީ އެވެ. މި ސިޓީފުޅު އެރުވީ ދިވެހިރާއްޖެ އިން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު އަޙްމަދު ސަރީރެވެ.

މި ބައްދަލުވުމުގެ ތެރެއިން ދެ ބޭފުޅުން ވަނީ ރާއްޖެއާއި ސައުދީ އަރަބިއްޔާއާ ދެމެދު އޮތް ގުޅުން އިތުރަށް ބަދަހިކުރުމާ ގުޅޭގޮތުންނާއި، ދެ ޤައުމުން އިސްކަންދޭ މުހިންމު ކަންތައްތަކާ ގުޅޭގޮތުން ފުޅާދާއިރާއެއްގައި މަޝްވަރާ ކުރައްވާފަ އެވެ.