އެޕްސްޓީން ދުނިޔޭގައި ހުރިއިރު އެކަކު ވެސް އަޅާ ނުލި، މަރުވީމަ އެންމެން އެ ވާހަކަ ދައްކަނީ: ޓްރަމްޕް

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީން ދުނިޔޭގައި ހުރިއިރު އެއްވެސް މީހަކު އެކަމާ އަޅާލައި އޭނާގެ ވާހަކަ ނުދައްކާ ކަމަށާއި، އެންމެން ވެސް އެ ވާހަކަ ދައްކަނީ އޭނާ މަރުވުމުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެތައް ކުޑަ ކުދިންތަކަކާއި، އަންހެނުންނަށް ޖިންސީ އަނިޔާ އާއި، ގޯނާ ކޮށްފައިވާ ކަމުގެ ތުހުމަތު އެޕްސްޓީންގެ މައްޗަށް އަމާޒުވެފައި އޮތްއިރު، އޭނާ ޖަލަށް ލާފައިވެ އެވެ. ޖަލުގައި ހުއްޓާ އޭނާ މަރުވެފައި ވަނީ 2019 ވަނަ އަހަރުގެ ތެރޭގަ އެވެ. އޭނާގެ މައްސަލައިގައި އެމެރިކާގެ ޖަސްޓިސް ޑިޕާޓްމަންޓް އިން އާންމު ކުރި ލިޔުން ތަކުގައި، ދުނިޔޭގެ އެތައް ލީޑަރުންނާ އެޕްސްޓީންއާ ދެމެދު ގާތް ގުޅުމެއް އޮތް ކަމަށް ވަނީ ފާހަގަވެފަ އެވެ.

ޓްރަމްޕް ވިދާޅުވީ އެޕްސްޓީން ދުނިޔޭގައި ހުރިއިރު އޭނާގެ ވާހަކަ ދެއްކި އެއްވެސް މީހަކު ނެތް ކަމަށާއި، އެންމެން ވެސް އޭނާގެ ވާހަކަ މިއަދު ދައްކަނީ އޭނާ މަރުވީ ފަހުން ކަމަށެވެ. އެއީ ޑިމޮކްރަޓިކް ޕާޓީ އަށް ނިސްބަތްވާ މައްސަލައެއް ކަމަށް މީގެ ކުރިން ވެސް ޓްރަމްޕް ވިދާޅުވެފައިވާއިރު، އޭނާ ވަނީ އެކަން އަނެއްކާ ވެސް ތަކުރާރު ކުރައްވައިފަ އެވެ.

އެއީ ރިޕަބްލިކަން ޕާޓީގެ މައްސަލައެއް ނޫން ކަމަށް ޓްރަމްޕް ތަކުރާރުކޮށް ވިދާޅުވި އެވެ. އޭނާ ވިދާޅުވީ ރިޕަބްލިކަން ޕާޓީ އަށް އޮތީ ދެ މައްސަލައެއް ކަމަށެވެ. ފުރަތަމަ މައްސަލަ އަކީ ޤައުމު ހިންގުމުގެ މައްސަލަ ކަމަށާއި، ދެ ވަނަ މައްސަލަ އަކީ ރިޕަބްލިކަން ޕާޓީ އިން ކުރަމުން އަންނަނީ ރަނގަޅު މަސައްކަތް ތަކެއްކަން އާންމުންނަށް ބުނެދިނުން ކަމަށް ވެސް ޓްރަމްޕް ވިދާޅުވެފައިވެ އެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، ދުނިޔޭގެ ތާރީޚުގައި ވެސް އެންމެ ރަނގަޅު އަދި އެންމެ ވަރުގަދަ އިޤްތިޞާދު އޮތީ އެމެރިކާގައި ކަމަށެވެ. އެގޮތުން އެމެރިކާ އިން އަންނަނީ ޤައުމުގެ ކަންކަމާއި، ރައްޔިތުންނަށް ބޭނުންވާ ޚިދުމަތް ތަކަށް އެތައް ޚަރަދެއް ކުރަމުން ކަމަށް ޓްރަމްޕް ވިދާޅުވި އެވެ. އެގޮތުން އެމެރިކާ އިން 18 ޓްރިލިއަން ޑޮލަރު ޚަރަދު ކުރަން އޮތް ކަމަށް ޓްރަމްޕް ވަނީ ވިދާޅުވެފަ އެވެ.

އެޕްސްޓީންގެ މައްސަލައިގެ ވާހަކަ ދައްކަމުން އަންނަ ފަރާތްތަކަށް މީގެ ކުރިން ވެސް ޓްރަމްޕް ނުރުހުން އަމާޒުކޮށްފައިވާއިރު، އޭނާ އާއި އެޕްސްޓީންއާ ދެމެދު ވެސް ގާތް ގުޅުމެއް އޮތީ އުފެދިފަ އެވެ. ޓްރަމްޕް އާއި އެޕްސްޓީންއާ ދެމެދު ގުޅުމެއް އޮތް ކަމަށް ފާހަގަވުމާ އެކު ޓްރަމްޕް ވިދާޅުވެފައި ވަނީ، އެއީ މާ ކުރީގެ ގުޅުމެއް ކަމަށެވެ. އަދި އެޕްސްޓީންގެ ކަންކަން އެނގުނު ހިސާބުން ފެށިގެން އެ ގުޅުން ކެނޑިފައިވާ ކަމަށް ވެސް ޓްރަމްޕް ވިދާޅުވެފައިވެ އެވެ.