އަށް އަހަރު ފަހުން އިނގިރޭސި ބޮޑު ވަޒީރަކު ފުރަތަމަ ފަހަރަށް ޗައިނާ އަށް

އިނގިރޭސިވިލާތުގެ ބޮޑު ވަޒީރު ކިއާ ސްޓާމާ، ރަސްމީ ދަތުރުފުޅެއްގައި ޗައިނާ އަށް ފުރައި ވަޑައިގެންފި އެވެ. 

މިއީ 2018 ވަނަ އަހަރުގެ ފަހުން އިނގިރޭސިވިލާތުގެ ބޮޑު ވަޒީރަކު ޗައިނާ އަށް ވަޑައިގަންނަވާ ފުރަތަމަ ފަހަރެވެ. ސްޓާމާގެ ކުރިން، އެންމެ ފަހުން ޗައިނާ އަށް ވަޑައިގެންނެވީ އިނގިރޭސިވިލާތުގެ ކުރީގެ ބޮޑު ވަޒީރު ތެރީސާ މޭ އެވެ. އެކަމަނާ ވަނީ 2018 ވަނަ އަހަރުގެ މެއި މަހުގެ ތެރޭގައި ޗައިނާ އަށް ވަޑައިގެންފަ އެވެ.

އޭގެ ފަހުން ބޮރިސް ޖޮންސަން އާއި، ލިޒް ޓްރަސް އަދި ރިޝީ ސުނާކް އިނގިރޭސިވިލާތުގެ ބޮޑު ވަޒީރުކަން ކުރެއްވިއިރު، އެ މުއްދަތުގައި އެއްވެސް ބޭފުޅަކު ޗައިނާ އަށް ވަޑައިގެންފައި ނުވެ އެވެ. ބުރާސްފަތި ދުވަހު ޗައިނާ އަށް ކުރައްވާ ދަތުރުފުޅުގައި ބޮޑު ވަޒީރު ސްޓާމާ، އެ ޤައުމުގެ ރައީސް ޝީ ޖިން ޕިންގއާ ބައްދަލު ކުރައްވާނެ އެވެ. 

ބޮޑު ވަޒީރުގެ މި ދަތުރުފުޅުގައި އިނގިރޭސިވިލާތުގެ ވިޔަފާރީގެ ދާއިރާ އާއި، ސަގާފީ ދާއިރާގެ 60 އަށް ވުރެ ގިނަ ލީޑަރުން ވެސް ބައިވެރިވެ އެވެ. އޭގެ ތެރޭގައި އެޗްއެސްބީސީ ބޭންކު، ޖީއެސްކޭ ފާމަސިއުޓިކަލް ކުންފުނި، ޖަގުއާ އެންޑް ރޯޔަލް އަދި ނެޝަނަލް ތިއޭޓާ ތަމްސީލު ކުރާ ފަރާތްތައް ވެސް ބައިވެރިވެ އެވެ. 

މި ދަތުރުފުޅަކީ ޗައިނާ އާއި އިނގިރޭސިވިލާތާ ދެމެދު އޮތް ގުޅުން ރަނގަޅު ކުރުމަށް، އިނގިރޭސި ސަރުކާރުން ކުރަމުން އަންނަ މަސައްކަތުގެ މުހިންމު ބައެއްގެ ގޮތުގައި މާހިރުން ވަނީ ފާހަގަ ކޮށްފަ އެވެ. ނަމަވެސް، އެކަމަށް ފާޑު ކިޔާ ފަރާތްތަކުން ބުނެފައި ވަނީ ޗައިނާ އަކީ މުޅިން ތަފާތު ދުނިޔެއްގެ ނަޒަރަކުން ބަލާ ޤައުމެއް ކަމަށެވެ. އަދި އެއީ އިތުބާރު ކުރެވޭނެ ޤައުމެއް ނޫން ކަމަށާއި، ޗައިނާގެ ކޮމިއުނިސްޓް ޕާޓީ އާއެކު މަޝްވަރާ ކުރުމުގައި އިނގިރޭސި ސަރުކާރުން ވަރަށް ބޮޑަށް ސަމާލުވާން ޖެހޭނެ ކަމަށް ބުނެފައިވެ އެވެ. 

އިންސާނީ ހައްގު ތަކުގެ މައްސަލަގައި، އިނގިރޭސި ބޮޑު ވަޒީރު ސްޓާމާ، ޗައިނާގެ ރައީސްއާ ކަންބޮޑުވުން ހިއްސާ ކުރައްވާނެތޯ ސުވާލު ކުރުމުން، ބޮޑު ވަޒީރުގެ އޮފީން ޑައުނިން ސްޓްރީޓް އިން ބުނީ އެންމެ މުހިންމު ކަންތައްތަކާއި މައްސަލަ ތަކުގައި ބޮޑު ވަޒީރު ވާހަކަ ދައްކަވާނެ ކަމަށެވެ. ޗައިނާގެ ޝަންޝިޔާންގް ސަރަހައްދުގައި ޔުއިގާ ރައްޔިތުންނާއި، އެހެނިހެން މުސްލިމް ގުރޫޕު ތަކުގެ މައްޗަށް އިންސާނިއްޔަތާ ދެކޮޅަށް ގިނަ ކަންކަން ކުރެ އެވެ. 

ބޮޑު ވަޒީރުގެ އޮފީހުން ބުނެފައި ވަނީ، ސްޓާމާގެ މި ދަތުރުފުޅަކީ ވަރަށް މުހިންމު ދަތުރުފުޅެއް ކަމަށެވެ. އެ ދަތުރުފުޅުގެ ކުރިން މީޑިއާ ތަކާ ވާހަކަ ދައްކަވަމުން ބޮޑު ވަޒީރު ސްޓާމާ ވިދާޅުވީ، ޗައިނާ އަކީ އިނގިރޭސިވިލާތަށް މުހިންމު ޤައުމެއް ކަމަށެވެ. އަދި ޗައިނާ އާއެކު އޮންނަ ގުޅުން އަހަރު ތަކެއް ވަންދެން ހީނަރުވެފައި އޮތް ކަމަށް ފާހަގަ ކުރެއްވި އެވެ. 

މީގެ ކުރިން ބްރެޒިލްގައި ކުރިއަށް ދިޔަ ޖީ20 ސަމިޓުގައި ވެސް ސްޓާމާ ވަނީ ޗައިނާގެ ރައީސްއާ ބައްދަލު ކުރައްވައިފަ އެވެ.