އަވި އައިނާ ގުޅޭ ގޮތުން، މެކްރޮން އާއި ސްޓާމާ ޓިކް ޓޮކްގައި މަޖާ ކުރައްވައިފި

ސްވިޒަލެންޑުގައި ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގައި ފްރާންސްގެ ރައީސް އިމަނުއެލް މެކްރޮން އަވި އައިނެއް އަޅުއްވައިގެން ހުންނެވުމުން އެތައް ބައެއްގެ ސަމާލުކަން ލިބިފައި ވަނިކޮށް، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އެކަމާ މަޖާ ކުރައްވައިފި އެވެ. 

ހޯމަ ދުވަހުގެ ރޭ ކޮމެޑިއަން މެޓް ފޯޑްގެ ދަ ޕޮލިޓިކަލް ޕާޓީގެ ޕޮޑްކާސްޓަށް އިނގިރޭސި ބޮޑު ވަަޒީރު ސްޓާމާ ވަޑައިގެންނެވީ އަވި އައިނެއް އަޅުއްވައިގެންނެވެ. ސްޓޭޖުގައި ހުރި ގޮނޑިއެއްގައި އިށީންނަވަމުން ސްޓާމާ އައިނު އަޅުއްވަން ފެއްޓެވުމުން، ހާޒިރުވެ ތިބި މީހުން ހޭ އަޑު އިވެ އެވެ. އެއާ އެކު، ހިނިފުޅުވަޑުވަމުން ސްޓާމާ ވިދާޅުވީ "ބޮންޖޫރ" އެވެ. 

ވޯލްޑް އިކޮނޮމިކް ފޯރަމްގައި މެކްރޮން އަވި އައިނު އަޅުއްވައިގެން ތަޤުރީރު ކުރެއްވުމުން، ގިނަ ބައެއްގެ ސަމާލުކަން ވަނީ އެކަމަށް ލިބިފަ އެވެ. ނަމަވެސް، އެއީ ލޮލުގެ އިންފެކްޝަނެއްގެ ސަބަބުން މެކްރޮން ކުރެއްވި ކަމެކެވެ. އެގޮތުން އެ އިންފެކްޝަންގެ ސަބަބުން މެކްރޮންގެ ކަނާއަތު ލޮލަށް ލޭ އަރާފައިވާތީ، އެކަން ފޮރުވުމަށް އޭނާ އައިނު އަޅުއްވައިގެން އުޅުއްވީ އެވެ. 

އެ ފޯރަމްގައި މެކްރޮން ދެއްވި ތަޤުރީރުގައި "ފޯރ ޝުއަރ" ވިދާޅުވެފައިވާތީ، އެ ތަންކޮޅަށް ވެސް ގިނަ ބައެއްގެ ސަމާލުކަން ވަނީ ލިބިފަ އެވެ. ސޯޝަލް މީޑިއާގައި އެ ކްލިޕް ކޮޅު ދައުރުކޮށް، އެތައް ބަޔަކު ވަނީ މަޖާ ވީޑިއޯތައް ހަދައިފަ އެވެ. އޭގެ ފަހުން އަންގާރަ ދުވަހު ސްޓާމާ އޭނާގެ ޓިކް ޓޮކް އެކައުންޓުގައި ޕޮޑްކާސްޓުގައި އައިނު އަޅުއްވައިގެން އިށީންނަވާ ވީޑިއޯ ޕޯސްޓު ކުރެއްވި އެވެ. 

އެ ވީޑިއޯގައި ސްޓާމާ ވަނީ މެކްރޮން އަށް ޓެގް ވެސް ކުރައްވައިފަ އެވެ. އިރުކޮޅެއްގެ ތެރޭގައި މެކްރޮން ވަނީ ސްޓާމާގެ އެ ވީޑިއޯ އަށް ކޮމެންޓު ކުރައްވައިފަ އެވެ. ކެޕްޝަންގައި "އިމެނުއެލް މެކްރޮން ޓޯކް ޓު މީ، ގޫސް" ޖައްސަވާފައިވާ އެ ވީޑިއޯ އަށް މެކްރޮން ކޮމެންޓު ކުރެއްވީ "ފޯރ ޝުއަރ" ޖައްސަވައިފަ އެވެ. އެ ކޮމެންޓެއް 31،000 (ތިރީސް އެއް ހާސްް) އަށް ވުރެ ގިނަ ލައިކް ލިބިފައިވެ އެވެ.

މެކްރޮން ކޮމެންޓު ކުރެއްވިތާ ގަޑިއިރެއް ފަހުން ސްޓާމާ ވަނީ މެކްރޮންގެ ކޮމެންޓަށް ވެސް ރިޕްލައި ދެއްވައިފަ އެވެ. އެގޮތުން "ޓޮފް ގަން" ފިލްމުގެ ޕޯސްޓަރެއްގައި ސްޓާމާ އާއި މެކްރޮން ފެންނަ ގޮތަށް އެޑިޓް ކުރައްވާފައިވާއިރު، އެ ދެ ބޭފުޅުންގެ ފަހަތުން ފައިޓާ ޖެޓު ތަކެއް ފެނެ އެވެ. އެ ޕޯސްޓުގައި މެކްރޮން އާއި ސްޓާމާ ވެސް ހުންނެވީ އަވި އައިނު އަޅުއްވައިގެންނެވެ. ސްޓާމާގެ އެ ކޮމެންޓަށް ވަނީ 17،000 (ސަތާރަ ހާސް) އަށް ވުރެ ގިނަ ލައިކް ލިބިފަ އެވެ.

ސޯޝަލް މީޑިއާގެ މަޝްހޫރު ޕްލެޓްފޯމެއް ކަމަށްވާ ޓިކް ޓޮކްގައި މި ދެ ލީޑަރުން މަޖާ ކުރައްވާފައިވާއިރު، ގިނަ ބައެއްގެ ސަމާލުކަން އެކަމަށް ލިބިގެން ގޮސްފައިވެ އެވެ. ސްޓާމާ އާއި މެކްރޮން އަކީ ވަރަށް ގާތް ގުޅުމެއް ބާއްވަމުން އަންނަ ދެ ލީޑަރުންކަން ވެސް ފާހަގަ ކުރެވެ އެވެ.