ޓްރަމްޕްގެ ޣައްޒާ ސުލްޙަ ބޯޑުގައި ބައިވެރިވުމަށް ސްޓާމާ ވިސްނަވަނީ

އެމެރިކާގެ ރައީސް ޑޮނަލްޑް ޓްރަމްޕްގެ ޣައްޒާ ސުލްޙަ ބޯޑުގައި ބައިވެރިވުމާ މެދު، އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިސްނަމުން ގެންދަވާ ކަމަށް ރިޕޯޓުތައް ބުނެފި އެވެ. 

މި ބޯޑަކީ އެމެރިކާ އިން ހުށަހަޅާފައިވާ 20 ނުކުތާގެ މައްޗަށް އެކުލެވިގެންވާ ޕްލޭންގެ ބައެއް ކަމަށްވާއިރު، އިސްރާއީލް އާއި ހަމާސްއާ ދެމެދު ކުރިއަށްދާ ހަނގުރާމަ ނިންމުމަށް އެ ބޯޑުން ފުރިހަމަ އަށް ބާރު އަޅާނެ ކަމަށް ބުނެފައިވެ އެވެ. 

މި ބޯޑުގައި ދުނިޔޭގެ އެކި ޤައުމު ތަކުގެ ލީޑަރުން ބައިވެރި ކުރުމަށް ވަނީ ހަމަޖެހިފަ އެވެ. މި ބޯޑުން ޣައްޒާގެ ހިންގުން ވަގުތީ ގޮތުން ބަލަހައްޓައި، ޣައްޒާ އަލުން އާރާސްތު ކުރުމުގެ މަސައްކަތް ކުރިއަށް ގެންދިޔުމަށް ވަނީ ހަމަޖެހިފަ އެވެ. މީޑިއާ ތަކުގައި ބުނެފައިވާ ގޮތުން އިނގިރޭސި ސަރުކާރުގެ ބައެއް އިސްވެރިން މިހާރު އަންނަނީ، އެމެރިކާގެ ސްޓޭޓް ޑިޕާޓްމަންޓާ އެކު މަޝްވަރާތައް ކުރިއަށް ގެންދަމުންނެވެ. 

ދަ ސަންޑޭ ޓައިމްސް އިން އެންމެ ފުރަތަމަ ރިޕޯޓު ކޮށްފައިވާ ގޮތުގައި، އެ ބޯޑުގައި ބައިވެރިވުމުގެ ދައުވަތު އިނގިރޭސި ބޮޑު ވަޒީރު ސްޓާމާ އަށް ވަނީ ދެއްވައިފަ އެވެ. ނަމަވެސް، އިނގިރޭސި ސަރުކާރުގެ ބައެއް މަސްދަރު ތަކުން ބީބީސީ އަށް މައުލޫމާތު ދެމުން ބުނެފައި ވަނީ، ރަސްމީ ދައުވަތެއް ލިބިފައި ނުވާ ކަމަށާއި، އެކަމުގައި ވަކި ނިންމުމެއް ވެސް ނިންމާފައި ނެތް ކަމަށެވެ. 

އެމެރިކާ ސަރުކާރުގެ ބައެއް އޮފިޝަލުންނާ ހަވާލާދީ އެ ޤައުމުގެ މީޑިއާ ތަކުގައި ބުނެފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް ކުރިއަށް އޮތް ދުވަސް ތަކުގެ ތެރޭގައި ބޯޑުގައި ހިމެނޭ މެމްބަރުންގެ ނަންތައް އިއުލާން ކުރައްވާނެ ކަމަށެވެ. 

މި ބޯޑުގައި އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލެއާ ހިމެނިވަޑައިގަންނަވާނެ ކަމަށް ރިޕޯޓު ކޮށްފައިވާއިރު، ބޯޑުގެ އެންމެ އިސް ފަރާތެއްގެ ގޮތުގައި ވެސް މަސައްކަތް ކުރައްވާނީ ބްލެއާ ކަމަށް ބުނެފައިވެ އެވެ. ހަމަ އެއާ އެކު، ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަނބި ދަރިކަލުން ޖެރާޑް ކުޝްނާ ވެސް މި ބޯޑުގައި ހިމެނޭނެ ކަމަށް ރިޕޯޓުތައް ބުނެ އެވެ. 

މިދިޔަ އަހަރުގެ ސެޕްޓެމްބަރު މަހުގެ ތެރޭގައި އެމެރިކާ އިން ބުނެފައި ވަނީ، ބްލެއާ އަކީ ސުލްޙައިގެ ޕްލޭންގައި ހިމެނިވަޑައިގަންނަވާ ބޭފުޅެއް ކަމަށެވެ. ލޭބާ ޕާޓީ އަށް ނިސްބަތްވެ ވަޑައިގަންނަވާ ކުރީގެ ބޮޑު ވަޒީރު ބްލެއާ ކުރިން ވިދާޅުވެފައި ވަނީ، އެމެރިކާ އިން ހުށަހަޅާފައިވާ ޕްލޭން އަކީ ދެ އަހަރަށް ދެމިގެން ގޮސްފައިވާ ހަނގުރާމަ ނިންމުމަށް ލިބޭ އެންމެ ރަނގަޅު ފުރުސަތު ކަމަށެވެ. 

ނަމަވެސް، ސުލްޙައިގެ ބޯޑުގައި ބްލެއާގެ ދައުރު މިހާތަނަށް މުޅިން ކަށަވަރުވެފައި ނުވެ އެވެ. ސަބަބަކީ، މެދު އިރުމަތީގެ ބައެއް ޤައުމު ތަކުން ބްލެއާ އަށް ދައުރެއް ދިނުމާ ދެކޮޅު ހަދަމުން އައިސްފައިވާތީ ކަމަށް ރިޕޯޓުތައް ބުނެ އެވެ. އެއީ އިރާޤުގައި އެމެރިކާގެ ސިފައިން ހިންގި އޮޕަރޭޝަންގައި އިނގިރޭސިވިލާތުގެ ސިފައިން ބައިވެރި ކުރި ބޮޑު ވަޒީރު ކަމަށް ވާތީ އެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ޣައްޒާ ސުލްޙައިގެ ބޯޑު އުފެއްދުމުގެ މަސައްކަތް ކުރިއަށްދާ ކަމަށެވެ. އަދި އެ ބޯޑަކީ އެންމެ މުހިންމު ޤައުމު ތަކުގެ، މުހިންމު ލީޑަރުން ވެސް ހިމެނޭ ބޯޑަކަށް ވާނެ ކަމަށެވެ. އެގޮތުން އެކަމުގައި ބައިވެރިވުމަށް ބައިނަލްއަޤުވާމީ މުޖުތަމައުން  ވަރަށް ބޮޑު ޝައުޤުވެރިކަަމެއް ދައްކަމުން އަންނަ ކަމަށާއި، ހުރިހާ ފަރާތްތަކެއް ވެސް ހިމެނޭ ބޯޑެއް އެކުލަވަލާން ބޭނުންވާ ކަމަށް ޓްރަމްޕް ވިދާޅުވި އެވެ. 

އަންގާރަ ދުވަހު އިނގިރޭސިވިލާތުގެ ޤާނޫނު ހަދާ މަޖިލީހުގައި ވަނީ ފޮރިން ސެކްރެޓަރީ އައިވެޓް ކޫޕާއާ ސުވާލު ކޮށްފަ އެވެ. އެގޮތުން އެމެރިކާގެ ރައީސް ޓްރަމްޕްގެ ސުލްޙައިގެ ބޯޑުގައި ސްޓާމާ ބައިވެރިވެ ވަޑައިގެންނެވީތޯ ވަނީ ސުވާލު ކޮށްފަ އެވެ. ނަމަވެސް، އެ ސުވާލަށް ސީދާ ޖަވާބެއް ދެއްވުމަށް ފޮރިން ސެކްރެޓަރީ ވަނީ ދެކޮޅު ހައްދަވައިފަ އެވެ. އޭގެ ބަދަލުގައި އޭނާ ވިދާޅުވީ، ޣައްޒާ ހަނގުރާމަ ހުއްޓާލުމަށް އެމެރިކާ އިން ހުށަހަޅާފައިވާ 20 ނުކުތާގެ ޕްލޭނަށް އިނގިރޭސިވިލާތުން ތާއީދު ކޮށްފައިވާ ކަމަށެވެ.