އިނގިރޭސި ބޮޑު ވަޒީރު ސްޓާމާ އެކްސް "ބޮއިކޮޓް" ކުރައްވައިފި

ސޯޝަލް މީޑިއާ ޕްލެޓްފޯމެއް ކަމަށް އެކްސްގައި ބޭނުން ކުރާ އޭއައި ޓެކްނޮލޮޖީގެ މައްސަލަ ބޮޑުވެފައިވާ ދަނޑިވަޅެއްގައި އިނގިރޭސިވިލާތުގެ ބޮޑު ވަޒީރު ކިއާ ސްޓާމާ އެކްސްގައި ޕޯސްޓު ކުރުން ހުއްޓާލައްވައިފި އެވެ.

މަހުޖަނު އީލޮން މަސްކުގެ އެކްސް ކުންފުނިން ތައާރަފު ކޮށްފައިވާ "ގްރޮކް" ބޭނުން ކޮށްގެން، އެތައް ބަޔަކު ވަނީ ބަދު އަޚުލާޤީ، އަދި ހަޑި ހުތުރު މަންޒަރު ފެންނަ ފޮޓޯތައް ހަދައިފަ އެވެ. އެގޮތުން ޤައުމުގެ ލީޑަރުންނާއި، ސިޔާސީ ވެރިން އަދި އާންމުންގެ އެ ފަދަ ފޮޓޯތައް ވެސް ހަދާފައިވާތީ، އެތައް ބައެއްގެ ފާޑު ކިޔުން އެކަމަަށް އަމާޒުވި އެވެ.

އެކަން ބޮޑުވެފައި ވަނިކޮށް ގްރޮކް އިން ބުނެފައި ވަނީ، ފޮޓޯ އުފެއްދުމާއި ފޮޓޯ އަށް ބަދަލު ގެނައުމުގެ ފުރުސަތު މިހާރު އޮންނާނީ ހަމައެކަނި ފައިސާ ދައްކައިގެން ޚިދުމަތް ހޯދާ ފަރާތްތަކަށް އެކަނި ކަމަށެވެ. އެއާ އެކު، ގްރޮކް ބޭނުން ކޮށްގެން ކޮންމެ ކޮންމެ މީހަކަށް ފޮޓޯ ހެދުމުގެ ފުރުސަތު ނޯންނައިރު، އެ ފުރުސަތު އޮތީ ފައިސާ ދައްކައިގެން ޚިދުމަތް ހޯދާ ސަބްސްކްރައިބަރުންނަށް އެކަނި ކަމަށް ބުނެފައިވެ އެވެ. 

ގްރޮކް އިން ފޮޓޯ އެޑިޓު ކޮށްގެން މީހުން ފަޟީހަތް ކުރުމާ ދެކޮޅަށް އެންމެ ގަދަ އަށް ވަކާލާތު ކޮށްފައިވާ އެއް ޤައުމަކީ އިނގިރޭސިވިލާތެވެ. ގްރޮކްގެ ސަބަބުން އެތައް ބައިވަރު ގެއްލުން ތަކެއް މުޖުތަމައު އަށް ލިބެމުން އަންނައިރު، އިނގިރޭސިވިލާތުގައި އެކްސް މަނާ ކުރުމުގެ ވިސްނުން އެ ޤައުމުގެ ސަރުކާރުން ގެން ގުޅޭ ކަމަށް މީޑިއާ ތަކުގައި ބުނެފައިވެ އެވެ.

އެކަން އެހެން އޮތްއިރު، އިނގިރޭސި ބޮޑު ވަޒީރު ސްޓާމާ ވަނީ އެކްސް ގައި ޕޯސްޓު ކުރުން ހުއްޓާލައްވައިފަ އެވެ. ބޮޑު ސްޓާމާގެ ރަސްމީ އެކްސް އެކައުންޓުގައި އެންމެ ފަހުން ޕޯސްޓެއް ކުރައްވާފައި ވަނީ، ޖަނަވަރީ މަހުގެ އަށެއްވީ ބުރާސްފަތި ދުވަހު އެވެ. އެ ދުވަހު ސްޓާމާ ކުރެއްވި ޕޯސްޓުގައި ވިދާޅުވެފައި ވަނީ ގާތް ގަނޑަކަށް ބައި މިލިއަން ކުޑަ ކުދިން ފަޤީރު ކަމުން ސަލާމަތް ކޮށްދިނުމަކީ މައާފަށް އެދެން ޖެހޭ ކަމެއް ނޫން ކަމަށެވެ.

ސްޓާމާގެ އެ ޕޯސްޓުގައި ވިދާޅުވެފައި ވަނީ، އަލުން އަނެއްކާ ވެސް ރައްޔިތުންގެ ޖީބަށް ފައިސާ ވަންނަން ފަށާފައިވާއިރު، އެކަމާ މައާފަށް އެދެން ނުޖެހޭނެ ކަމަށެވެ. އިނގިރޭސި ސަރުކާރުން އެ ކުދިންގެ ލިމިޓު އުވާލަން ނިންމަނީ އެ ސަބަބާ ހުރެ ކަމަށް ސްޓާމާ ވިދާޅުވެފައިވެ އެވެ. އޭގެ ފަހުން ހަފުތާއެއް ވާން ކައިރިވެފައިވާއިރު، މިހާތަނަށް އެކްސްގައި އިތުރު ޕޯސްޓެއް ސްޓާމާ ކުރައްވާފައި ނުވެ އެވެ.

އެކްސްގައި ސްޓާމާ އޭގެ ފަހުން އެއްވެސް ޕޯސްޓެއް ކުރައްވާފައި ނެތް ނަމަވެސް، އެމަނިކުފާނުގެ ރަސްމީ ފޭސްބުކު އެކައުންޓާއި، އިންސްޓަގްރާމް އެކައުންޓުގައި ބަރާބަރަށް ޕޯސްޓުތައް ކުރައްވަމުންނެވެ. އެގޮތުން ސްޓާމާ ޒިޔާރާތް ކުރައްވާ ތަންތަނާއި، ބައްދަލު ކުރައްވާ ފަރާތްތަކުގެ އިތުރުން، އިނގިރޭސި ސަރުކާރުގެ ސިޔާސަތުތަކާ ގުޅޭ ގޮތުން ވެސް ސްޓާމާ ވަނީ ޕޯސްޓުތައް ކުރައްވައިފަ އެވެ.

ސްޓާމާގެ ރަސްމީ އެކްސް އެކައުންޓުގައި ދެ މިލިއަނަށް ވުރެ ގިނަ ފޮލޯވަރުން އެތަ ތިއްބެވެ. އާންމު ގޮތެއްގައި ސްޓާމާ އަކީ ސަރުކާރުގެ ސިޔާސަތުތަކާއި، ސަރުކާރުން ކުރަމުން އަންނަ މަސައްކަތް އަދި ދުނިޔޭގެ މަޝްރަހުގައި ހިނގަމުން އަންނަ ކަންތައްތަކާ ގުޅޭ ގޮތުން އެކްސްގައި ޕޯސްޓު ކުރައްވާ ބޭފުޅެކެވެ. އެކްސްއާ ރައްޓެހި ބޭފުޅެއްގެ ގޮތުގައި ސްޓާމާ ފާހަގަ ވެފައި ވީ ނަމަވެސް، ގްރޮކް މައްސަލައިގެ ފަހުން ސްޓާމާ ވަނީ އެކްސްގައި ޕޯސްޓު ކުރެއްވުން ހުއްޓާލައްވައިފަ އެވެ.

އިނގިރޭސި މީޑިއާ ތަކުގައި އެކަން ސިފަ ކޮށްފައި ވަނީ، އިނގިރޭސި ބޮޑު ވަޒީރު ސްޓާމާ އެކްސް "ބޮއިކޮޓް" ކުރެއްވީ ކަމަށެވެ. ސްޓާމާގެ އިތުރުން، އިނގިރޭސި ބޮޑު ވަޒީރުގެ ރަސްމީ އޮފީސް، 10 ޑައުނިން ސްޓްރީޓް އިން ވެސް ޕޯސްޓު ކުރުން ވަނީ މެދު ކެނޑިފަ އެވެ. ޑައުނިން ސްޓްރީޓްގެ ރަސްމީ އެކްސް އެކައުންޓުގައި އެންމެ ފަހުން ޕޯސްޓެއް ކޮށްފައި ވަނީ ޖަނަވަރީ މަހުގެ ހަތް ވަނަ ދުވަހު އެވެ. އެހެން ނަމަވެސް، ޑައުނިން ސްޓްރީޓްގެ ފޭސްބުކް އެކައުންޓާއި، އިންސްޓަގްރާމް އެކައުންޓުގައި ޕޯސްޓު ކޮށްފައި އެބަ ހުއްޓެވެ.