ޕީއެންސީ އައްޑޫ ޖަލްސާ އަށް ފިނި ތަރުހީބެއް!

ރާއްޖޭގެ އެންމެ ދެކުނަށް އޮންނަ އައްޑޫ އަކީ ހުރިހާ ގޮތަކުން ބެލިޔަސް ކައުންސިލް އިންތިޚާބުގައި އެންމެ ވާދަވެރި އެއް ސަރަހައްދެވެ. އައްޑޫ އަކީ މި ވެރިކަމުގައި ވެސް އެންމެ ބޮޑު އިސްކަމެއް ދެއްވާނެ އެއް ސަރަހައްދު ކަަމަށް ސަރުކާރު ހިންގާ ޕީއެންސީ އިން އެކި ޕްލެޓްފޯމްތަކުގައި ބުނެފައި އެބަ ވެ އެވެ.

ކަން މިހެން އޮތް އިރު ޕީއެންސީ އިން އައްޑޫގައި ބޭއްވި ޖަލްސާ އިން ފެނުނީ އައްޑޫ އިން ޕީއެންސީ އަށް އޮތް ކަމަށް ބުނާ ހޫނު ތަރުޚީބާއި ދިމާ އިދިކޮޅު މަންޒަރެކެވެ. އިކޮނޮމިކް މިނިސްޓަރ މުހައްމަދު ސައީދު ވާހަކަ ދައްކަވަނިކޮށް ނަގާފައިވާ ވީޑިއޯ އެއް މީސްމީޑިއާގައި މިހާރު ދަނީ ދައުރުވަމުންނެވެ. އެ ވީޑިއޯ އިން ފެންނަނީ ޖަލްސާގެ މެދެއްހާ ހިސާބުން ފެށިގެން ފަހަތަށް ހުރި ގޮނޑި ބަރިތައް އެއްކޮށް ހުސްކޮށް އޮތް މަންޒަރެވެ.

އައްޑޫގެ ޖަލްސާ ގެ ބޮޑުބައި މި ގޮތަށް ހުސްކޮށް އޮތް އިރު ސަރުކާރުގެ ކުންފުނިތަކާއި އިދާރާތަކުގެ މުވައްޒަފުން އައްޑޫގެ މި ޖަލްސާގައި ބައިވެރިވުމަށް ބާރު އަޅާ، ނުފޫޒު ފޯރުވާފައިވާ ކަމަށް ވަނީ އަޑު ފެތުރިފަ އެވެ. އަދި ކުރިއަށް އޮތްތަނުގައި އިއުލާން ކުރާ ވަޒީފާތައް ދޭނެ ކަމަށް ބުނެ މީހުން ޖަލްސާ އަށް ގެންދިއުމަށް ވެސް ޕީއެންސީގެ އެކްޓިވިސްޓުން ވަނީ މަސައްކަތް ކޮށްފަ އެވެ.

އެހެންކަމުން އެހާ މިންވަރަށް ނުފޫޒު ފޯރުވައިގެން ވެސް މިހާ މަދު މީހުން ޖަލްސާ އަށް ހާޒިރު ވުމަކީ އައްޑޫ އޮތީ ސަރުކާރާއި މެދު ރުހިގެން ނޫންކަން ހާމަވާ ކަމެއް ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ. އަދި އައްޑޫ އަކީ ވައުދު ވުމަށް ފަހު ވައުދު ނުފުއްދުމުން ވަރިހަމަކޮށްގެން ތިބޭނެ ބައެއް ނޫން ކަަމަށާއި އާއްމުންނަށް ނުފޫޒު ވެސް ފޯރުވޭނީ ވަކި މިންވަރަކަށް ކަމަށް ފާޑުކީ ފަރާތްތަކުން ވަނީ ބުނެފަ އެވެ.

ޕީއެންސީ އައްޑޫ ޖަލްސާ ބާއްވާފައި ވަނީ ވަރަށް ބޮޑަށް އިޝްތިހާރު ވެސް ކޮށްގެންނެވެ. މިއީ އައްޑޫ އިން ކައުންސިލް އިންތިޚާބާއި ޑަބްލިއުޑީސީ އިންތިޚާބުގައި ކުރި ހޯދަން ދަތިވާނެކަން ހާމަކޮށްދޭ ކަމަކަށް ކަމަށް ވެސް އާއްމުން ވަނީ ބުނެފަ އެވެ.