މިސަރުކާރުގެ ''ދަ ގްރޭޓަރ އައްޑޫ'' ގެ ސިޔާސަތަކީ ''އިންޑިއާ އައުޓް'' ކަހަލަ ދަންތުރައެއް: މޭޔަރު ނިޒާރު

ރައީސް ޑރ.މުހައްމަދު މުއިއްޒުގެ ސަރުކާރުން މިހާރު އައްޑޫ ސިޓީއާ މެދު ގެންގުޅޭ ''ދަ ގްރޭޓަރ އައްޑޫ'' ގެ ސިޔާސަތަކީ ''އިންޑިއާ އައުޓް'' ކަހަލަ ދަންތުރަ އެއް ކަމަށް އައްޑޫގެ މޭޔަރު އަލީ ނިޒާރު ވިދާޅުވެއްޖެ އެވެ.

އައްޑޫ ފޭދޫއަށް ނިސްބަތްވެވަޑައިގަންނަވާ ހޯމް މިނިސްޓަރު އަލީ އިހުސާން ވަނީ "ގްރޭޓާ އައްޑޫ" ޖަހައިފައިވާ ޕޯސްޓަރެއް ހިއްސާކުރައްވައިފަ އެވެ.

އެޕޯސްޓަށް ރައްދު ދެއްވައި މޭޔަރު ނިޒާރު ވިދާޅުވީ، އައްޑޫ ސިޓީއެއްގެ ގޮތުގައި އޮންނަ އޮތުން ހަޖަމް ނުކުރެވި، ރައީސް މުއިއްޒުގެ ސީދާ މަޝްވަރާގެ މަތިން އައްޑޫ ރޫޅާލާފައިވާ ކަމަށެވެ. އަދި އެކަމަށް މަސައްކަތް ކުރި މީހުން "ދަ ގްރޭޓަރ އައްޑޫ" ކިޔަނީ އޭގެ މާނަ އެނގިގެން ކަމާމެދު ސުވާލު އުފެދޭ ކަމަށް އޭނާ ވިދާޅުވި އެވެ. 

މީގެ އިތުރުން ނިޒާރު ވިދާޅުވީ '' ދަ ގްރޭޓަރ އައްޑޫ '' ގެ ސިޔާސަތަކީ ''އިންޑީއާ އައުޓް '' ކަހަލަ ބުހުތާން ދަންތުރައެއް ކަމަށެވެ. އަދި ރައްޔިތުން އޭގައި ނުޖެހުމަށް ވެސް އޭނާ ގޮވާލެއްވި އެވެ. 

ނިޒާރު މިހެން ވިދާޅުވިއިރު، މިސަރުކާރުން ވަނީ މިދިޔަ އަހަރުގެ ތެރޭގައި އައްޑޫ ސިޓީ ކައުންސިލް އެއް ކައުންސިލެއްގެ ގޮތުގައި ބޭއްވުމާއި މެދު ސުވާލު އުފައްދާ ރައްޔިތުންގެ މެދުގައި ވޯޓެއް ނަގާފަ އެވެ. އެ ވޯޓަށްފަހު މިހާރު އައްޑޫ ސިޓީ ކައުންސިލްގައި މިހާރު ހިމެނެނީ ހިތަދޫ، މަރަދޫ، މަރަދޫފޭދޫ، އަދި ފޭދޫ އެވެ. އަދި މީދޫ އާއި ހުޅުދޫ އަކީ ވަކި ދެ ރަށެއް ކަމަށް ވަނީ ނިންމަވާފަ އެވެ.

މީގެ ކުރިން ވެސް ނިޒާރު ވަނީ އައްޑޫގެ ތަރައްގީ މިސަރުކާރުން ހުއްޓުވާފައިވާތީ އެކަމަށް ފާޑު ވިދާޅުވެ ވާހަކަ ދައްކާވާފަ އެވެ. މިހާތަނަށް އައްޑޫގެ ތަރައްގީގެ ބޮޑެތި މަޝްރޫއުތައް ކުރިއަށް ނުދާ ކަމަށް އޭނާ ވިދާޅުވި އެވެ. އަދި ވިދާޅުވީ އަސާސީ ޚިދުމަތެއް ކަމަށްވާ ކަރަންޓުގެ ޚިދުމަތް ވެސް ރަނގަޅަށް ނުލިބޭ ކަމަށެވެ. 

މީގެ އިތުރުން ނިޒާރު ވަނީ ގޫގުލް ކޭބަލް އައްޑޫގައި އެޅުމުން އައްޑޫ ތަރައްގީވާނެ ކަމަށް ދެކެވޭ ވާހަކަ ތަކަށް ވެސް ރައްދު ދެއްވާފަ އެވެ. އޭނާ ވިދާޅުވީ މި މަޝްރޫއާ ގުޅޭ މައުލޫމާތު ސަރުކާރުން ކައުންސިލްއާ ހިއްސާ ކޮށްފައިނުވާ ކަމަށާއި، ވާނުވާ ނޭނގޭ ކަމަށެވެ. 

ނިޒާރު ވިދާޅުވީ ކޭބަލް ކަނެކްޝަނަށް ހިތަދޫ އިން ބޮޑު ބިމެއް ނަގައި، އެ ތަނުގައި ލޭންޑިން ސްޓޭޝަނެއް ހަދާފައިވާއިރު، ހަމައެކަނި ކުރާ މަސައްކަތަކީ ސެކިއުރިޓީ ބެލެހެއްޓުން ކަމަށެވެ. އަދި އެ ބިމުން އެއްވެސް ރުފިޔާއެއް ކައުންސިލަށް ނުލިބޭ ކަމަށާއި ރައްޔިތުންނަށް އަދި އައްޑޫގެ ތަރައްގީ އަށް ލިބޭނެ ކުރިއެރުމެއް ނުފެންނަ  ކަަމަށެވެ. މި މަޝްރޫއުގައި ވެސް ސަރުކާރުން މަސައްކަތް ކުރަނީ ވަރަށް ބޮޑަށް އޮޅުވާލަން ކަމަށް އޭނާ ވިދާޅުވި އެވެ.