ކައުންސިލް އިންތިޚާބުގައި ނުބައިކޮށް ވޯޓު ލައިފި ނަމަ، މިއީ ދިވެހިންލާ ވޯޓުގެ ފާހަގަ ފެންނާނެ ފަހު ފަހަރަށް ވެދާނެ: މައުރޫފް
އެމްޑީޕީން ބޭއްވި ޖަލްސާއެއްގައި ވާހަކަދައްކަވަމުން ކެންދޫ ދާއިރާގެ މެމްބަރު މައުރޫފް ޒާކިރު ވަނީ ރިޔާސީ ބަޔާނަކީ އިތުރުފުޅުތަކެއްގެ މައްޗަށް ބިނާވެފައިވާ ބަޔާނެއްގެ ގޮތުގައި ސިފަކުރައްވާފަ. ކުރިއަށް އޮތް ކައުންސިލް އިންތިޚާބަކީ ރައީސް ޑރ. މުއިއްޒުގެ ސަރުކާރަށް "ނޫނެކޭ" ބުނަން ލިބޭ ފުރުސަތެއް ކަމަށާއި، އެ ފުރުސަތުގެ ބޭނުން ހިފުމަށް އޭނާ ވަނީ ރައްޔިތުންނަށް ގޮވާލައްވާފަ.
ކެންދޫ ދާއިރާގެ މެމްބަރު މައުރޫފް ޒާކިރު އެމްޑީޕީގެ ހަރުގެ ޖަލްސާގައި ވާހަކަދައްކަވަނީ | ރާއްޖެ އެމްވީ
ކައުންސިލް އިންތިޚާބުގައި ނުބައިކޮށް ވޯޓު ލައިފި ނަމަ، މިއީ ދިވެހިންލާ ވޯޓުގެ ފާހަގަ ފެންނާނެ ފަހު ފަހަރަށް ވެދާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ހަރުގެ ޖަލްސާގައި ބުރާސްފަތި ދުވަހުގެ ރޭ ވާހަކަދައްކަވަމުންނެވެ.
ކުރިއަށް އޮތް ކައުންސިލް އިންތިޚާބަކީ ރައީސް ޑރ.މުހައްމަދު މުއިއްޒު އަށް ނޫނެކޭ ބުނަން ލިބޭ ހަނި ފުރުސަތެއް ކަަމަށާއި އެ ފުރުސަތުގެ ބޭނުން ހިފަން ޖެހޭ ކަމަށް އޭނާ ވިދާޅުވި އެވެ. ކައުންސިލް އިންތިޚާބުގައި އެމްޑީޕީ އަށް ވޯޓު ނުލައިފި ނަމަ ދިވެހިންނަށް ދިވެހިންގެ ބާރުވެރިކަން ގެއްލި، ވޯޓުލުމުގެ ހައްގު ވެސް ނިގުޅައިގަތުމުގެ ފުރުސަތު އޮތް ކަމަށް މައުރޫފް ވަނީ ވިދާޅުވެފަ އެވެ.
މީގެ އިތުރުން ރިޔާސީ ބަޔާނުގައި ފެނުނު މަންޒަރަކީ ކުރިން ހަދާފައިވާ ދޮގުތައް ތަކުރާރުކުރެއްވި މަންޒަރު ކަމަށް މައުރޫފް ވިދާޅުވި އެވެ. ރައްޔިތުންނަށް ވެފައިވާ ވައުދުތައް ފުއްދުމުގެ ރޫހެއް މި ސަރުކާރުގެ ނެތް ކަަމަށް މައުރޫފް ވިދާޅުވި އެވެ.
"އެއަށް އަޅުގަނޑުމެން ކިޔަނީ ރިޔާސީ ބުހުތާން. އެއީ އެވަރަށް ދޮގު ހަދާތީ. " މައުރޫފް ވިދާޅުވި އެވެ.
މީގެ އިތުރުން މައުރޫފް ވިދާޅުވީ ރައީސް ޑރ.މުހައްމަދު މުއިއްޒުގެ ކިބައިން ފެންނަނީ ބޮޑާކަމާއި ކިބުރުވެރިކަން ކަމަށެވެ. އެ މަނިކުފާނަކީ ރައްޔިތުންނަށް މަލާމާތް ކުރަމުންދާ މީހެއް ކަމަށް ވެސް އޭނާ ވިދާޅުވި އެވެ. ރައީސް މުއިއްޒު އަކީ ޚުދުމުހުތާރު ވެރިކަމެއް ކުރުމަށް މަގުފަހިވާ ގޮތަށް އަމަލުކުރަމުންދާ ބޭފުޅެއް ކަަމަށާއި ރައީސް މުއިއްޒު އަމިއްލަފުޅަށް ވެސް ގަބޫލުކުރައްވާ ގޮތުގައި އެ މަނިކުފާނަކީ ރަސްކަލެއް ކަމަށް މައުރޫފް ވިދާޅުވި އެވެ.
