ބ. މާޅޮހުގެ ތަރައްގީގެ މަޝްރޫއުތައް ކުރިއަށް ދަނީ ފިނިހަކަ ސްޕީޑްގައި، މިފަސް އަހަރު ނިމޭއިރު ވެސް ބަނދަރުގެ މަސައްކަތް ނުނިމޭނެ: އެމްޑީޕީގެ ގައުމީ މަޖިލީހުގެ ހިތާދޫ ދާއިރާގެ ރައީސް

ބ. މާޅޮހުގެ ތަރައްގީގެ މަޝްރޫއުތައް ކުރިއަށް ދަނީ ފިނިހަކަ ސްޕީޑްގައި ކަމަށާއި، ރައީސް ޑރ.މުހައްމަދު މުއިއްޒުގެ މިފަސް އަހަރު ނިމޭއިރު ވެސް ބަނދަރުގެ މަސައްކަތް ނުނިމޭނެ ކަމަށް އެމްޑީޕީގެ ގައުމީ މަޖިލީހުގެ ހިތަދޫ ދާއިރާގެ ރައީސް އާޔަތުﷲ ހުސެއިން ވިދާޅުވެއްޖެ އެވެ.

ރާއްޖެޓީވީގެ ވައުދުނާމާ ޕްރޮގްރާމްގައި އާޔަތުﷲ ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައްޔިތުން އެންމެ ބޭނުންވާ ތަރައްގީގެ މަޝްރޫއުތައް ބާރު ސްޕީޑްގައި ކުރިއަށް ގެންދިޔަ ކަމަށާއި، ބަނދަރު ވެސް ޒާމާނީ ފެންވަރަށް ތަރައްގީ ކުރުމުގެ މަސައްކަތް ފެށި ކަމަށެވެ. ނަމަވެސް ވެރިކަން ބަދަލުވެގެން ދިއުމާއެކު މަޝްރޫއުތައް ކުރިއަށް ދަނީ ފިނިހަކަ ސްޕީޑްގައި ކަަމަށް އޭނާ ވިދާޅުވި އެވެ. 

ބަނދަރުގެ މަސައްކަތް ވަރަށް އަވަހަށް ނިންމާނެ ކަމަށް މިދިޔަ އަހަރުގެ ރައީސް މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި އާޔަތުﷲ ވިދާޅުވީ ވެރިކަމުގެ މިދައުރު ނިމޭއިރު ވެސް ބަނދަރުގެ މަސައްކަތް އެއްކޮށް ނުނިމޭނެ ކަމަށެވެ. 

ބަނދަރުގެ މަސައްކަތް ފަށާއިގެން މިހާރު ދެ އަހަރަށް ވުރެ ގިނަ ދުވަސްވީ. އަދިވެސް ބަނދަރުގެ މަސައްކަތް ނުނިމޭ. ރައީސް މުއިއްޒު ވަޑައިގެން ވިދާޅުވި ތިމަންނަ ކުރިއަށް އޮތް އަހަރެއްހާ ދުވަސް ތެރޭގައި ނިންމާ ދޭނަމޭ. ރައީސް މުއިއްޒުގެ ވެރިކަން ނިމޭއިރު ވެސް ބަނދަރުގެ މަސައްކަތް ނިމިދާނެ ކަމާ ދޭތެރޭގައި އެއީ ރައީސް މުއިއްޒު ކްރެޑިޓް ނަންގަވަން ޖެހޭ ކަމެއް ނޫން. ސީދާ އެމްޑީޕީ ސަރުކާރުން ފަށާދިން ކަމެއް އެއީ. މިހާރު ހަމަ ގިނަ ރައްޔިތުން އެބަ އެއްބަސްވޭ އެމްޑީޕީ ސަރުކާރުން ބަނދަރުގެ މަސައްކަތް ނުފެށި ނަމަ ތިމަންނަމެންނަށް މި ބަނދަރެއް ނުލިބޭނޭ.  

އެމްޑީޕީގެ ގައުމީ މަޖިލީހުގެ ހިތާދޫ ދާއިރާގެ ރައީސް އާޔަތުﷲ ހުސެއިން

ނުނިމި ދިގުލަމުންދާ މާޅޮހުގެ ބަނދަރުގެ މަސައްކަތް ލަސްނުވެ ކުރިއަށްދާނެ ކަމަށް ރައީސް މުއިއްޒު ވިދާޅުވީ ބ.އަތޮޅަށް ކުރެއްވި ދަތުރުފުޅެއްގެ ތެރެއިން 14 އޯގަސްޓް 2025 ގައި މާޅޮހަށް ވަޑައިގެން އެރަށުގެ ރައްޔިތުންނާއެކު ބޭއްވެވި ބައްދަލު ކުރެއްވުމުގަ އެވެ. 

ރައީސް މުއިއްޒު ވިދާޅުވީ، މާޅޮހު ބަނދަރުގެ މައްސަލައަކީ އެންމެ މުހިއްމު ކަމެއް ދީގެން ހައްލު ކުރައްވާނެ ކަމަށް ދެންނެވި އެއް މައްސަލަ ކަމަށާއި މި ސަރުކާރުން ބަނދަރުގެ މަސައްކަތް ނިންމާނޭ ކަމަށެވެ. މީގެ ކުރިން ބަނދަރު މަރާމާތުކުރުން ލަސްވެގެން ދިޔަ ނަމަވެސް ބަނދަރުގެ މަސައްކަތް ލަސްނުވާނޭ ކަމަށް ރައިސް މުއިއްޒު ވިދާޅުވި އެވެ.

މާޅޮހު ބަނދަރު ހަލާކުވީ 2004 ވަނަ އަހަރުގެ ޑިސެމްބަރުމަހު ރާއްޖެއަށް އެރި ސުނާމީ ކާރިސާގަ އެވެ. މާޅޮހު ބަނދަރަކީ އަމިއްލަ ފަރާތެއްގެ ދީލަތި އެހީއާއެކު 1999 ވަނަ އަހަރު ހެދި ބަނދަރެކެވެ. 

މާޅޮސް ބަނދަރު މަރާމާތު ކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއު އެމްޓީސީސީއާ ހަވާލު ކޮށްފައިވަނީ 1 މާރޗް 2023 ގަ އެވެ. މި މަޝްރޫއުގެ ޖުމްލަ އަގަކީ 69.47 މިލިއަން ރުފިޔާ އެވެ. އެމްޓީސީސީ އާއި މި މަޝްރޫއު ހަވާލުކުރީ 450 ދުވަސްތެރޭގައި ނިންމާ ގޮތަށެވެ.

މީގެ އިތުރުން އާޔަތުﷲ ވަނީ މާޅޮހުގެ ތަރައްގީ ހުއްޓިފައިވާތީ އެކަމުގެ ކަންބޮޑުވުން ވެސް ފާޅު ކުރައްވާފަ އެވެ.

އާޔަތުﷲ ވިދާޅުވީ މާޅޮހަކީ ކުޑަ އާބާދީއެއް ނަމަވެސް މިއީ ހައްގު މިންވަރު ނޫން ކަމަށެވެ. ރައީސް މުއިއްޒު ވައުދުވެވަޑައިގެންނެވި ގޮތަށް މަޝްރޫއުތައް ކުރިއަށް ގެންދަން ޖެހޭކަން ފާހަގަކުރައްވައި އާޔަތުﷲ ވިދާޅުވީ ސިއްހީ މަރުކަޒު ބޮޑު ކުރުމުގެ މަޝްރޫއު އަމަލީ މަސައްކަތް ފެށި ނަމަވެސް ބޯޑެއް ޖަހާ ބަންދު ކުރުން ފިޔަވައި އިތުރު ކަމެއް ނުކުރާ ކަމަށެވެ. އަދި ވިދާޅުވީ ޕޮލިސް ސްޓޭޝަންގެ މަސައްކަތް ވެސް 6 މަސް ދުވަހުން ނިންމޭނެ ކަމަށާއި، ނަމަވެސް އެ މަސައްކަތް ވެސް އެކަށީގެންވާ ބާރު މިނުގައި ކުރިއަށް ނުދާ ކަމަށް އާޔަތުﷲ ވިދާޅުވި އެވެ.