ހޯމަ ދުވަހު ގެ މަޖިލީހުގެ ޖަލްސާ ފަސްކޮށްފި، ސަބަބެއް ނާންގާ

ހޯމަ ދުވަހު ބާއްވާނެ ކަމަށް އިއުލާންކޮށްފައިވާ ރައްޔިތުންގެ މަޖިލީހުގެ މި ދައުރުގެ ދެވަނަ ޖަލްސާ ފަސްކޮށްފި އެވެ.

މަޖިލީހުގެ އިދާރާ އިން ބުނީ އެ ޖަލްސާ ފަސްކޮށްފައި ވަނީ އަންގާރަ ދުވަހަށް ކަމަށެވެ. ނަމަވެސް އެ ޖަލްސާ ފަސްކުރި ވަކި ސަބަބެއް މަޖިލީހުގެ އިދާރާ އިން ހާމަކޮށްފަ އެއް ނުވެ އެވެ. 

މަޖިލީހުގެ މި ދައުރުގެ ފުރަތަމަ ޖަލްސާ ބާއްވާފައި ވަނީ ނިމިދިޔަ ހަފްތާގެ ބުރާސްފަތި ދުވަހު އެވެ. އެ ޖަލްސާގައި އޮތީ މި އަހަރުގެ ދައުރު ފެށުމާއި، ރައީސް ޑރ. މުހައްމަދު މުއިއްޒު ރިޔާސީ ބަޔާން އިއްވެވުމެވެ. 

ހޯމަ ދުވަހު ޖަލްސާ އެއް އޮންނާނެ ކަަމަށް އަންގާފައި ވަނީ އެ ދުވަހުގެ ޖަލްސާ ނިންމަވާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲ އެވެ. އެ ޖަލްސާ އަށް ހާޒިރުވާން މެމްބަރުންނަށް އަންގާފައި ވަނީ އާދިއްތަ ދުވަހު ހަވީރު ގާތްގަނޑަކަށް 5 ޖަހަނިކޮށެވެ. 

އެ ޖަލްސާ ފަސްވިކަން މެމްބަރުންނަށް އަންގާފައި ވަނީ އާދިއްތަ ދުވަހުގެ 23:12އިގަ އެވެ. މި ޖަލްސާ ފަސްކޮށްފައި ވާ އިރު ސަރުކާރު ހިންގާ ޕާޓީ ޕީއެންސީގެ މަޖިލީހުގެ ބައެއް މެމްބަރުން މި ވަގުތު ލޯކަލް ކައުންސިލް އިންތިޚާބުގެ ކެމްޕެއިން އަށް އަތޮޅުތެރޭގެ އެކި ހިސާބުތަކުގައި ހަރަކާތްތެރި ވެވަޑައިގަންނަވަމުންދާކަން ފާހަގަކޮށްލެވެ އެވެ.