ޤާނޫނު ހުއްޓުވި ޕްލޭސްކޫލް އަލުން އައުޓްސޯސް ކުރަން ވޯޓު ދެވުނު އިރުވެސް ސަރުކާރު ކައުންސިލަރަކަށް ނޭނގުނު

ސަރުކާރުން ލާމަރުކަޒީ ޤާނޫނަށް ގެނައި ބަދަލުތަކާއެކު، ލޯކަލް އޮތޯރިޓީ ކުންފުނިތަކުގެ މަސައްކަތްތައް ހުއްޓި، ކުޅުދުއްފުށީ ޕްލޭ ސްކޫލުގެ ޚިދުމަތް ދިނުމަށް ބީލަމަށްލާން ކައުންސިލުން ނިންމި ނިންމުމަށް ވޯޓު ދެއްވުމަށްފަހުވެސް، އެކަން ހިނގާދިޔަ ގޮތް ނޭނގޭ ކަމަށް ސަރުކާރު ކައުންސިލަރު އިބްރާހިމް އަޙުމަދު ވިދާޅުވެއްޖެއެވެ.

މިދިޔަ ހުކުރު ދުވަހުގެ ރޭ ކުޅުދުއްފުށީގައި ޕީއެންސީގެ ކެމްޕެއިން ރަސްމީކޮށް އިފްތިތާޙުކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން ކައުންސިލަރު އިބްރާހިމް ވިދާޅުވީ، ޕްލޭ ސްކޫލުގެ ޚިދުމަތް ދިނުމަށް ނިންމާނީ ކައުންސިލްގެ ކުންފުނިން ކަމަށެވެ. އަދި ކައުންސިލްގެ ކުންފުނި ރަޖިސްޓްރީ ކުރުމުގެ މަސައްކަތް ފެށުނީ އަދި ކިރިޔާކަމަށް އޭނާ ވިދާޅުވެފައިވެއެވެ.

އެރޭގެ ޖަލްސާގައި އިބްރާހިމް މިހެން ވިދާޅުވި ނަމަވެސް ކުޅުދުއްފުށި ސިޓީ ކައުންސިލުން ވަނީ ރައީސް މުޢިއްޒު ލާމަރުކަޒީ ޤާނޫނަށް ގޯސް ބަދަލުތައް ގެނައުމުގެ ކުރިން, 2025 ވަނަ އަހަރު ޕްލޭ ސްކޫލު މަރަމާތުކޮށް ނިންމައި ހުޅުވަން ތައްޔާރުކޮށްފައެވެ.

އެހެންނަމަވެސް, ޕްލޭ ސްކޫލް ނުހުޅުވި ލަސްވަނީ އަބަދު "ގޮތް ބަދަލުކުރަން" އުޅޭތީ ކަމަށް ވިދާޅުވެ އިތުރުފުޅުހައްދަވާފައިވާއިރު، ޖަލްސާގެ ޕޯޑިއަމްގައި ހުންނަވައި އޭނާ ދެން ވިދާޅުވީ ހައިރާންކުރުވަނިވި ވާހަކަފުޅެކެވެ.

"ޕްލޭ ސްކޫލު ކަންތައް ނުހިނގަ އޮތީ ދެން އަޅުގަނޑަކަށް ނޭނގެ ކިހިނެތް ކަމެއް ވެފަ މި އޮތީކީ"

ސަރުކާރުގެ ކައުންސިލަރު އިބްރާހީމް ވިދާޅުވެފައިވެއެވެ.

އިބްރާހިމް މިފަދައިން ވިދާޅުވެފައިވީ ނަމަވެސް، ކުޅުދުއްފުށި ސިޓީ ކައުންސިލް ވެބްސައިޓުގައި ހިއްސާކޮށްފައިވާ ރަސްމީ ލިޔެކިޔުންތަކުން ދައްކާ ގޮތުގައި މިދިޔަ ނޮވެމްބަރު 24، 2025 ވީ ހޯމަ ދުވަހު ބޭއްވި ކުޅުދުއްފުށީ ކައުންސިލުގެ ހަތަރުވަނަ ދައުރުގެ 232 ވަނަ ޢާންމު ބައްދަލުވުމުގައި ވަނީ މުހިންމު ނިންމުމެއް ނިންމާފައެވެ.

އެއީ ޕްލޭ ސްކޫލުގެ ޚިދުމަތްދޭނެ ފަރާތެއް ބީލަން އުޞޫލުން ހޯދުމަށެވެ. މި ނިންމުމަށް ވޯޓު ދެއްވި 6 ކައުންސިލަރުންގެ ތެރޭގައި ކައުންސިލަރު އިބްރާހިމް އަޙުމަދުގެ ނަންވެސް ހިމެނެއެވެ.

މިކަމާ ގުޅިގެން ކުޅުދުއްފުށީގެ ގިނަ ރައްޔިތުންގެ ފާޑުކިޔުންތަށް ކައުންސިލަރަށް އަމާޒުވަމުންދާއިރު, ޚާއްޞަކޮށް 2024 ވަނަ އަހަރު ބޭއްވި ބައި-އިލެކްޝަނުގައި ކުޅުދުއްފުށީ އުތުރު ދާއިރާގެ މެޖޯރިޓީ ރައްޔިތުން އޭނާ އިންތިޚާބު ކުރެއްވީ ސަރުކާރުގެ މައި ޕާޓީ ތަމްސީލުކޮށް، ސިޓީގެ ތަރައްޤީއަށް މަސައްކަތް ކުރުމަށް ކަމަށްވާއިރު، ކައުންސިލުން ނިންމާ މުހިންމު ނިންމުންތަކާ މެދު "އަޅުގަނޑަކަށް ނޭނގެ" އޭ ވިދާޅުވުމަކީ ޒިންމާދާރުކަން ކުޑަ އަމަލެއްގެ ގޮތުގައި ރައްޔިތުން ދަނީ ސިފަކުރަމުންނެވެ.

އަމިއްލައަށް ވޯޓު ދެއްވައިގެން ނިންމި ކަމެއްގެ މަޢުލޫމާތު ނޭނގޭ ކަމަށް ބޮޑު ޖަލްސާއެއްގައި ވިދާޅުވުމުން، މިއީ ސިޓީގެ މުހިންމު މަޝްރޫޢުތަކާ މެދު ސަރުކާރުގެ ކެނޑިޑޭޓުން ބަހައްޓަވާ ފަރުވާކުޑަކަން ހާމަވާ ކަމެއްގެ ގޮތުގައި ހާމަވާއިރު, ކުރިއަށް އޮތް ލޯކަލް ކައުންސިލް އިންތިޚާބުގެ ހުރިހާ ގޮނޑިއެއް ޕީއެންސީއަށް ލިބިއްޖެނަމަ މަޝްރޫޢުތަކުގެ ވާނުވާ ކައުންސިލަރުންނަށް އެނގިވަޑައިގެންފާނެކަމާ މެދު ޝައްކު ކުރާކަމުގައި ގިނަ ރައްޔިތުން ދެކެއެވެ.