ކައުންސިލްތަކުގެ ބާރު ކަނޑުވާލުމަށްފަހު، ފަލާހު އެދުނީ ކައުންސިލްތަކުން އެހީތެރިކަން ދިނުމަށް
ކުޅުދުއްފުށީގައި ބޭއްވި ކެމްޕޭން ޖަލްސާއެއްގައި ފަލާހު މިފަދައިން ވިދާޅުވިއިރު، ސަރުކާރުން ވަނީ ގާނޫނަށް ބަދަލުތަކެއް ގެނެސް ކައުންސިލްތަކުން މުވައްޒަފުން ނެގުމާއި، ބިން ކުއްޔަށް ދިނުން ފަދަ ބާރުތައް ހަނިކޮށްފަ. މީގެ އިތުރުން ކައުންސިލްތަކުގެ ބޭންކު އެކައުންޓުތައް ހިންގުމުގައި ފިނޭންސް މިނިސްޓްރީގެ އުސޫލުތަކަށް ތަބާވާންޖެހޭ ގޮތަށް މިހާރު ވަނީ ހަމަޖައްސާފަ.
ރައްޔިތުން މަޖިލީހުގެ މެންބަރު އިބްރާހިމް ފަލާހު | ސޯޝަލް މީޑިއާ
މުޢިއްޒުގެ ސަރުކާރުން ލާމަރުކަޒީ ގާނޫނަށް ގެނެސްފައިވާ އިސްލާހު ތަސްދީގުކޮށް ކައުންސިލްތަކުގެ ބާރު ކަނޑުވާލުމަށްފަހު ރައްޔިތުން މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީ ޕީޖީ ލީޑަރު އިބްރާހިމް ފަލާހު ކައުންސިލްތަކުގެ އެހީތރެިކަމަށް އެދިއްޖެ އެވެ.
މިއަހަރުގެ އޭޕްރީލް މަހު ބާއްވާ ލޯކަލް ކައުންސިލް އިންތިހާބު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ކުޅުދުއްފުށިން ވާދަކުރާ ޕީއެންސީ ކެންޑިޑޭޓުންގެ ކެމްޕޭން އިފްތިތާހުކުރުމުގެ ޖަލްސާގައި ފަލާހު ވިދާޅުވީ، ރައީސުލްޖުމްހޫރިއްޔާ އަކީ ރައްޔިތުންނަށް ވައުދުވެވަޑައިގަންނަވާ ވައުދު ފުއްދައިދޭ ހިތުން، ފުއްދައިދިނުމުގެ ހެޔޮ ނިޔަތުގައި އެކަން ކުރައްވާ ބޭފުޅެއް ކަމަށެވެ.
އަޅުގަނޑުމެންގެ އިއްޒަތެރި ރައީސުލްޖުމްހޫރިއްޔާއަކީ ތަކުރާރުކޮށް ދަންނަވާލަން ޖެހޭނީ އެ މަނިކުފާނަކީ ރައްޔިތުންނަށް ވައުދުވެވަޑައިގަންނަވާ ވައުދުފުޅު، ފުއްދައިދޭ ހިތުން، ފުއްދައިދިނުމުގެ މަގުސަދުގައި، ނިޔަތުގާ، ހެޔޮ ނިޔަތުގާ އެކަން ކުރައްވާ ބޭފުޅެއް. އެހެންވީމާ އެ މަނިކުފާނު މި ތަރައްގީއަށްޓަކާ، ރާއްޖޭގެ އެކި ކަންކޮޅުތަކުގަ، މިފަދަ ސިޓީތަކުގަ ފައްޓަވާފަ މިހިރަ މަޝްރޫއުތައް، ބޮޑެތި ބިޔަ މަޝްރޫއުތައް ނިންމުމަށްޓަކާ ކައުންސިލްތަކުގެ އެހީ ވަރަށް ބޮޑަށް ބޭނުންވާނެ.ޕީއެންސީ ޕީޖީ ލީޑަރު އިބްރާހިމް ފަލާހު
ފަލާހު އެފަދައިން ވިދާޅުވިއިރު މުޢިއްޒު ސަރުކާރުން ވަނީ ކައުންސިލްތަކުގެ ބާރުތައް ހަނިކޮށް ކައުންސިލްތަކުގެ އަމިއްލާ ބާރު ކަނޑުވާލާފަ އެވެ. އެގޮތުން ކައުންސިލުތަކުގެ ދައުރުގެ ފަހު އަހަރުގެ ތެރޭގައި ދާއިމީ މުވައްޒަފުންނާއި، ކޮންޓްރެކްޓް މުވައްޒަފުން ނުނެގޭ ގޮތައް ހެދުމުގެ އިތުރުން، ބިމާއި ފަޅު ކުއްޔަށް ނުދެވޭ ގޮތަށް ހަދައި ތަރައްގީގެ އައު މަޝްރޫއުތައް ހިންގުން ހުއްޓުމަކަށް ގެނެސް މުޢިއްޒު ސަރުކާރުން ވަނީ ގާނޫނަށް ބަދަލުގެނެސްފަ އެވެ.
އޭގެ އިތުރުން މިހާރު ކައުންސިލުގެ ބޭންކު އެކައުންޓުތައް ވެސް ހިންގަންޖެހޭނީ ފައިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުންނެވެ.
