ލާމަރުކަޒީ ނިޒާމް ދަމަހައްޓާ ރަށްރަށް ތަރައްގީކުރަން އެމްޑީޕީގެ ކެންޑިޑޭޓުންނަށް ވޯޓުދޭންޖެހޭ: ރައީސް ސޯލިޙް
ލާމަރުކަޒީ ނިޒާމަކީ އެމްޑީޕީގެ ސިޔާސަތެއްކަން ފާހަގަކުރައްވައި، މިހާރުގެ ސަރުކާރުން ކައުންސިލްތަކުގެ ބާރުތައް ހަނިކުރަމުންދާ ކަމަށް ރައީސް ސޯލިޙް ވިދާޅުވި. ރަށްރަށުގެ ތަރައްގީއަށް އެމްޑީޕީން ފެށި މަޝްރޫއުތައް މި ސަރުކާރުން ހުއްޓާލާފައިވާތީ، ރަށްތައް ކުރިއަރުވަން އެމްޑީޕީގެ ކެންޑިޑޭޓުން ހޮވަންޖެހޭ ކަމަށް އެމަނިކުފާނު ވިދާޅުވި.
ކުރީގެ ރައީސް އިބްރާހިމް މުހައްމަދު ޞާލިހު | މުންޝިދް
ލާމަރުކަޒީ ނިޒާމް ދަމަހައްޓާ ރަށްރަށް ތަރައްގީކުރަން އެމްޑީޕީގެ ކެންޑިޑޭޓުންނަށް ވޯޓުދޭންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިޙް ވިދާޅުވެއްޖެ އެވެ.
"ހޭވައްލާ ތައްޔާރު، ނޫ ބަހާރަކަށް ށ. ފޯކައިދޫ" ޖަލްސާގައި ވާހަކަ ދައްކަވަމުން ރައީސް ސޯލިޙް ވިދާޅުވީ ކުރަން ނުކުމެ މިތިބީ ގާނޫނު އަސާސީގައި އޮތްގޮތަށް ލާމަރުކަޒީ ނިޒާމް ހިންގަން ކަމަށެވެ. އަދި ލާމަރުކަޒީ ނިޒާމުގައި ބުނަނީ ރަށްތައް ހިންގަން ޖެހޭނީ އެރަށުގެ ރައްޔިތުން އައްޔަން ކުރާ ބައެއް ކަމަށާއި، މިއީ ފެށުނީއްސުރެ އެމްޑީޕީއިން ގަބޫލުކުރާ ސިޔާސަތު ކަމަށް އެމަނިކުފާނު ވިދާޅުވި އެވެ. ރައީސް ސޯލިޙް ވިދާޅުވީ ޒަމާނުއްސުރެ އޮތީ މާލެ ވަށާ އެނބުރޭ އިގްތިސާދެއް ކަމަށާއި، އެކަން ބަދަލު ނުކޮށް ރާއްޖެ ތަރައްގީ ނުކުރެވޭނެ ކަމަށެވެ. އަދި އެންމެ ފުރަތަމަ އެކަން ފެށީ 2008 ވަނަ އަހަރު އެމްޑީޕީގެ ފުރަތަމަ ވެރިކަމުގައި ކަމަށް ރައީސް ސޯލިޙް ވިދާޅުވި އެވެ.
ރައީސް ޞާލިހު ވިދާޅުވީ އެމްޑީޕީގެ ފުރަތަމަ ވެރިކަން 2012 ވަނަ އަހަރު ބަޣާވާތަކުން ވައްޓާލުމުން، އެމްޑީޕީ އިން ކުރަމުން އައި މަސައްކަތް ހުއްޓިގެން ދިޔަ ކަމަށެވެ. އޭގެ ފަހުން އައި ޕީޕީއެމް ވެރިކަމުގައި މަސައްކަތް ކުރީ ލާމަރުކަޒީ ނިޒާމާ ދިމާ އިދިކޮޅަށް ކަމަށާއި، މިހާރު އޮތް ޕީއެންސީ ސަރުކާރުން ވެސް ތަންފީޒު ކުރަމުންދަނީ ލާމަރުކަޒީ ނިޒާމާ ދެކޮޅު ސިޔާސަތެއް ކަމަށާއި، ސަރުކާރުން އަތޮޅު ކައުންސިލްތައް އުުވާލާ ކައުންސިލްތަކުގެ ބާރު ހަނިކޮށްފައިވާ ކަމަށާއި، މިއީ އެމްޑީޕީއާއި ޕީއެންސީގެ ތަފާތު ކަމަށް ރައީސް ސޯލިޙް ވިދާޅުވި އެވެ.
މިކަން ކުރެވޭނީ ސިޔާސަތު ދަންނަ ސަރުކާރެއް ގެނެސްގެން. އެއީ އެމްޑީޕީ. މި ނިޒާމަކީ ޕީއެންސީއާއި އެއްވެސް ގުޅުމެއް އޮތް ނިޒާމެއް ނޫން. ޕީއެންސީ ހޯދައިފި ނަމަ ރަށުގެ ހާލަތު ބަދަލުވެގެންދާނެ ގޮތް މަޑުމަޑުން ފެންނަމުންދޭ. އެބޭފުޅުންނަށް ކުރެވޭނީ މުއިއްޒު ވިދާޅުވާ ކަންކަން. މި 2 އަހަރު ކުރެވުނީ ހުކުރު މިސްކިތް ތަޅާލާ އެތަން ސަހަރާއަކަށް ހެދުން. އެހެންވީމާ މި ސަރުކާރަށް ނޫނެކޭ ބުނަން އެމްޑީޕީ ހޮވަން ޖެހޭ.ކުރީގެ ރައީސް އިބްރާހިމް މުހައްމަދު ސޯލިޙް
ރައީސް ސޯލިޙް ވިދާޅުވީ ނިމިގެން ދިޔަ އެމްޑީޕީ ވެރިކަމުގައި ކުރެވުނު ކަންކަމަކީ މީހުން ދިރިއުޅޭ ރަށްރަށުގައި ދިރިއުޅެވޭނެ ގޮތް ހެދުން ކަމަށެވެ. އަދި އިގްތިސާދީ މަސައްކަތް ފެށޭނެ ގޮތް އެމްޑީޕީ ސަރުކާރުން ހެދި ކަމަށެވެ. ނަމަވެސް މިވޭތުވެދިޔަ 2 އަހަރު މި ސަރުކާރުން ވަނީ ބޮޑެތި ވައުދު ކަމަށާއި، ބިންގާ އަޅައިފި ނަމަ 4 މަސް ތެރޭ ބިންގާ ވެސް ގެއްލޭ ކަމަށެވެ.
ރައީސް ސޯލިޙް ވިދާޅުވީ ރަށްްރަށުގައި އިގްތިސާދެއް ބިނާކުރަން ދަތުރުފަތުރުގެ ނިޒާމުން ގުޅާލުމާއި، ފެނާ ނަރުދަމާގެ މަސައްކަތް ފަށާ ނިމިފައިވާ ކަމަށެވެ. އެއީ އިގްތިސާދީ ހަރަކާތް ފެށުމަށް އެމްޑީޕީން ރަށްރަށުގައި ކުރި މަސައްކަތް ކަމަށް ރައީސް ސޯލިޙް ވިދާޅުވި އެވެ. ނަމަވެސް މި ސަރުކާރުން ރަށްރަށުގައި މިފަދަ މަސައްކަތެއް ނުކުރާ ކަމަށް އެމަނިކުފާނު ވިދާޅުވި އެވެ.
