ރާއްޖެ އަށް 4 ބިލިއަން ޑޮލަރު ގެންނާނެ ކަމަށް ބުނެ ވަހީދުގެ ފިނޭންސް މިނިސްޓަރުގެ ބޮލަށް އެރިގެން މީހަކު އުޅުނު މައްސަލައިގައި ވެސް ލަފާ ހޯދީ އެޕްސްޓީންގެ ފަރާތުން

ޑރ. މުހައްމަދު ވަހީދު ހަސަން މަނިކުގެ ވެރިކަމުގައި ރާއްޖެ އަށް 4 ބިލިއަން ޑޮލަރު ގެންނާނެ ކަމަށް ބުނެ އޭރުގެ ފިނޭންސް މިނިސްޓަރުގެ ބޮލަށް އެރިގެން މީހަކު އުޅުނު މައްސަލައިގައި ވެސް ޑރ. ވަހީދު ލަފާ ހޯއްދެވީ އެޕްސްޓީންގެ ފަރާތުން ކަން ހާމަ ވެއްޖެ އެވެ.

ޖަނަވަރީ 26، 2013 ގައި ލަފަޔަކަށް އެދި އޭރުގެ ރައީސް ޑރ. ވަހީދު އެޕްސްޓީން އަށް ފޮނުވި އީމެއިލެއް ގައި ފިނޭންސް މިނިސްޓަރު ވިދާޅުވަމުން ގެންދަވަނީ، ނަން ހާމަކުރަން ބޭނުންނުވާ ފަންޑް މެނޭޖަރަކު ރާއްޖޭގައި 4 ބިލިއަން ޑޮލަރު ބަހައްޓަން ތައްޔާރަށް ހުރި ކަމަށެވެ. އަދި ސަރުކާރުގެ ޕްރޮމިސަރީ ނޯޓުތަކެއްގެ ބަދަލުގައި، އޭގެ ތެރެއިން ވަކި އިންސައްތައެއް ލޯނެއްގެ ގޮތުގައި ދޫކުރަން އެ ފަރާތުން ބޭނުންވާ ކަމަށެވެ. މި 4 ބިލިއަން ޑޮލަރު ޖަމާކުރާނީ މަރުކަޒީ ބޭންކަށް ކަމަށާއި، ނަމަވެސް، މި ލޯނު ލިބިގަތުމަށްޓަކައި ސަރުކާރުގެ ފުރިހަމަ މިލްކުވެރިކަން އޮންނަ، ކޮންސްޓްރަކްޝަން މަސައްކަތްކުރާ ޚާއްޞަ ކުންފުންޏެއް (ސްޕެޝަލް ޕާޕަސް ވެހިކަލް) އުފެއްދުމަށް އެ ފަރާތުން ޝަރުޠުކުރާ ކަމަށާއި، މިފަދަ ކުންފުންޏެއް އުފެއްދޭނީ ހަމައެކަނި ރައީސުލްޖުމްހޫރިއްޔާގެ ގަރާރަކުން ކަމަށް ވަހީދު ވިދާޅުވެފައިވެ އެވެ.

މީގެ އިތުރުން، އެ ފަންޑް މެނޭޖަރު ލޯނުގެ ގޮތުގައި ދޫކުރާ ފައިސާއިން ވަކި އިންސައްތައެއް 'އަޕް ފްރަންޓް' ފީއެއްގެ ގޮތުގައި ރާއްޖެ އިން ނަގާނެ ކަމަށްވެސް މަޢުލޫމާތު ލިބިފައިވާ ކަމަށް ވަހީދު އަމިއްލަ އަށް ފޮނުއްވާފައިވާ މެއިލް ގައިވެ އެވެ.

މިކަމާ ބެހޭގޮތުން ވަހީދަށް އެކަށީގެންވާ ވަރުގެ މަޢުލޫމާތެއް ލިބިފައެއް ނުވާ ކަމަށާއި، އެ ފަންޑް މެނޭޖަރަކީ ކާކުކަމެއް ނޭނގޭ ކަމަށް ވިދާޅުވެފައިވެ އެވެ.

"އެމީހުން އަބަދުވެސް ބޭނުންވަނީ ފިނޭންސް މިނިސްޓަރު ބެންކޮކް ނުވަތަ ރާއްޖެއިން ބޭރުގެ ކޮންމެވެސް ތަނެއްގައި ބައްދަލުކުރުމަށެވެ. ރާއްޖޭގެ ކްރެޑިޓް ރޭޓިންގް އެއް ނެތް އިރު އަދި ދައުލަތުގެ ދަރަނި މިހާ މަތީގައި އޮތްއިރު، މިހާ ބޮޑު ޢަދަދެއްގެ ފައިސާ މިތަނުގައި ބަހައްޓަން އެމީހުން ބޭނުންވާނީ ކީއްވެގެން ހެއްޔެވެ؟ މިކަމާ މެދު އަޅުގަނޑު ވަރަށް ބޮޑަށް ކަންބޮޑުވެއެވެ،" ވަހީދު ލިޔުއްވާފައިވެ އެވެ.

އެހެން ކަމުން މިކަމުގައި ކަންތައް ކުރަންވީ ކިހިނެއްތޯ ޑރ. ވަހީދު އެޕްސްޓީން ގެ ގާތުގައި އައްސަވާފައިވެ އެވެ.

އަދި މިކަމުގައި ވަރަށް ކަންބޮޑުވެފައި ހުންނެވި ކަމަށާއި ފިނޭންސް މިނިސްޓަރުގެ އިތުރުން، ސިޔާސީ އިސް ބޭފުޅަކާއި ކޯލިޝަންގެ ޕާލަމެންޓްރީ ގްރޫޕުގެ ލީޑަރު ވެސް ހުންނެވީ މިކަމުގެ ފަހަތުގައި ކަމަށް ވަހީދު ލިޔުއްވާފައިވެ އެވެ.

"އޭނާ އަކީ ރިޔާސީ އިންތިޚާބުގައި އަޅުގަނޑާ އެންމެ ވާދަވެރިވާނެ ފަރާތަށް ވެސް ވެދާނެއެވެ." ވަހީދު ވިދާޅުވި އެވެ.

މި އީމެއިލްގެ ޖަވާބުގައި އެޕްސްޓީން ޖެހިގެން އައި ދުވަހު ބުނެފައިވަނީ އެއީ ފްރޯޑެއް ކަމަށެވެ.

އަދި މިކަމާ ދުރުގައި ހުންނަވެމަށް އެޕްސްޓީން ޑރ. ވަހީދަށް ލަފާ ދީފައިވެ އެވެ. އެހެން ނަމަވެސް، އިތުރަށް އެޕްސްޓީން ލިޔެފައިވާ ގޮތުގައި ޑރ. ވަހީދުގެ ސިޔާސީ ވާދަވެރިޔާ ލަދުގަންނަވާލަން ބޭނުންފުޅު ނަމަ، އޭނާ މޮޔައެއްގެ ގޮތުގައި ފެންނާނެ ގޮތަކަށް ކަންކަން ރާވާލެވިދާނެ ކަމަށް އެޕްސްޓީން ބުނެފައިވެ އެވެ.

"އޭނާ މިކަމަށް އެއްބަސް ކުރުވަންވީ، ސަބަބުތައް ބަޔާންކޮށް، ވީހާވެސް ގިނަ ތަފްޞީލާއެކު މެމޯއެއް ހުށަހެޅުމަށް އެދިވަޑައިގަންނަވާށެވެ. އޭރުން މިއީ މަކަރެއްކަން ސާބިތުވާ ދުވަހު، "ފުރުޞަތެއް ދޫކޮށްލީއޭ" ބުނެ އޭނާ އަށް ދެއްކޭނެ އެއްވެސް އުޒުރެއް ނޯންނާނެއެވެ. ކޮންމެއަކަސް ތިޔަ ހުންނެވީ ސަލާމަތުން ކަމަށްވާތީ އުފާކުރަމެވެ،" އެޕްސްޓީން ދިން ލަފާ ގައިވެ އެވެ.

އެޕްސްޓީންގެ ލަފަޔަށް ވަރަށް ބޮޑަށް ޝުކުރު އަދާ ކުރައްވާ ޑރ. ވަހީދު ވަނީ އިތުރު އީމެއިލް އެއް ފޮނުއްވާފައެވެ. އޭގައި ތިޔައީ ތިމަންނާ ސަލާމަތްކޮށްދިން ފަރާތޭ، އަޅުގަނޑު ކަންތައް ކުރާނީ ހަމަ ތިޔަ ބުނި ގޮތަށޭ ޑރ. ވަހީދު ވިދާޅުވި އެވެ.