އެޕްސްޓީން ފައިލްސް ގައި ކުރީގެ ރައީސް ވަހީދުގެ ނަން ހިމެނިފައި ވަނިކޮށް، ޕްރެޝަރ ބޮޑުވެ ރައީސުލްޖުމްހޫރިއްޔާގެ ސްޕެޝަލް އެންވޯއިގެ މަޤާމުން އިސްތިއުފާދެއްވައިފި
އެޕްސްޓީން ފައިލްސް ގައި ކުރީގެ ރައީސް ޑރ. ވަހީދު ގެ ނަން މަދުވެގެން 240 ފަހަރު އައިސްފައި ވޭ. މަޤާމުން ވަހީދު އިސްތިއުފާދެއްވީ އަންގާރަ ދުވަހު.
ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު | ރައީސް އޮފީސް
އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީން އާ ގާތްގުޅުމެއް އޮތްކަން ފަޅާ އަރާ، ބޮޑެތި ފާޑުކިޔުންތަކެއް އަމާޒުވެފައި ވަނިކޮށް، ރައީސުލްޖުމްހޫރިއްޔާގެ ސްޕެޝަލް އެންވޯއިގެ މަޤާމުގައި ހުންނެވި ކުރީގެ ރައީސް ޑރ. މުޙައްމަދު ވަހީދު ޙަސަން އެ މަޤާމުން އިސްތިއުފާ ދެއްވައިފި އެވެ.
ރައީސް އޮފީހުން ބުނީ އެމަނިކުފާނު ގެ އިސްތިއުފާގެ ސިޓީ އަންގާރަ ދުވަހުގެ ހެނދުނުގެ ވަގުތެއްގައި ރައީސުލްޖުމްހޫރިއްޔާއަށް ފޮނުއްވާފައި ވާ ކަމަށެވެ.
އެމެރިކާގެ ޖަސްޓިސް ޑިޕާޓްމަންޓުން ހާމަ ކުރި ލިޔުންތަކުން ތަފާތު އެކި ފަހަރު މަތިން މާލީ އަދި އެހެނިހެން ކަންކަމުގައި އެޕްސްޓީން ގެ ލަފާ އަށް ވަހީދު އެދިފައިވާކަން ވަނީ ހާމަވެފަ އެވެ. މިކަން ހާމަކޮށްދޭ އެތައް މެއިލްތަކެއް އެ ދެމެދުގައި ބަދަލުކޮށްފައި ވެ އެވެ. އެ އާއި އެކު އާއްމުން އޭނާ މަޤާމުން ވަކިކުރުމަށް ގޮވާލަމުން އައި ނަމަވެސް ވަހީދު އަމިއްލަފުޅަށް އިސްތިއުފާ ދެއްވުމާއި ހަމައަށް ވެސް މަޤާމުގައި ދެމިހުރުމުގެ ފުރުސަތު ރައީސް މުއިއްޒު ވަނީ ދެއްވާފަ އެވެ.
މިހާރުގެ ރައީސް މުއިއްޒު އަކީ ވަހީދު ގެ ވެރިކަމުގައި ހައުސިން މިނިސްޓަރ އެވެ. އެއީ މުއިއްޒު ވަޒީރުކަމަށް އައްޔަން ކުރި ފުރަތަމަ ވެރިކަމެވެ. މީގެ އިތުރުން ވަހީދު އާއި މުއިއްޒު އާއި ދެ ބޭފުޅުންނަކީ ސިޔާސީ ގޮތުން ވަރަށް އެކުގައި މަަސައްކަތް ކުރައްވާ ގާތް ދެ އެކުވެރިންކަން ކުރިން އެކި ޕްލެޓްފޯމްތަކުގައި ރައީސް މުއިއްޒު އާއި ވަހީދު ވެސް ފާހަގަކުރައްވާފައިވެ އެވެ. އެޕްސްޓީން ފައިލްސް ގައި ކުރީގެ ރައީސް ޑރ. ވަހީދު ގެ ނަން މަދުވެގެން 240 ފަހަރު އައިސްފައި ވެ އެވެ.
ރައީސް މުހައްމަދު ނަޝީދުގެ ވެރިކަން ބަދަލުވީ ބަޣާވާތަކުން ކަމަށް ތުހުމަތު ކުރެވިފައި ވުމާއެކު ކޮމަންވެލްތުން އޭރު ރައީސް ޑރ. މުހައްމަދު ވަހީދުގެ ސަރުކާރަށް ކުރިމަތިކުރުވަމުން ގެންދިޔަ ދިޔަ ޕްރެޝަރ ކުޑަ ކުރުމަށް އެޕްސްޓީން ޑރ. ވަހީދަށް އެހީތެރިވެދިންކަން ވަނީ ހާމަވެފަ އެވެ.
