އެމެރިކާ ދެކެ ބިރެއް ނުގަނޭ، ޔުރޭނިއަމްގެ ހައްގު ދޫކޮށެއް ނުލާނަން: އަރާގްޗީ

އީރާން އަށް ބިރު ދެއްކުމުގެ ގޮތުން އެމެރިކާ އިން އަސްކަރީ ގޮތުން ފިއްތުންތައް ކުރިމަތި ކުރި ނަމަވެސް، ޔުރޭނިއަމް މުއްސަނދި ކުރުމުގެ ހައްގު ދޫކޮށް ނުލާނެ ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

އާދިއްތަ ދުވަހު، އީރާންގެ ވެރި ރަށް ތެހެރާންގައި އޮތް ފޯރަމެއްގައި ވާހަކަ ދައްކަވަމުން އަރާގްޗީ ވަނީ، އެމެރިކާ އިން އީރާން އަށް ކުރިމަތި ކުރަމުންދާ ފިއްތުންތަކާ އެކު ވެސް، އެ ޤައުމުން ބޯ ގުދު ނުކުރާނެ ކަމަށް ވިދާޅުވެ، އިންޒާރު ދެއްވައިފަ އެވެ. 

އަރާގްޗީ ވިދާޅުވީ، އީރާންގެ ސުލްޙަވެރި ނިއުކްލިއާ ޕްރޮގްރާމް އާއި، ޔުރޭނިއަމް މުއްސަނދި ކުރުމުގެ މަސައްކަތަށް ޓަކައި އެ ޤައުމުން މިހާތަނަށް ވަރަށް ބޮޑު ޤުރުބާނީއެއް ވެފައިވާ ކަމަށެވެ. އަދި ހަނގުރާމައެއް ކުރިމަތިވި ކަމުގައި ވިޔަސް، ޔުރޭނިއަމް މުއްސަނދި ކުރުން ހުއްޓައި ނުލާން ނިންމީ، އީރާންގެ އަމަލުތައް ބަހައްޓަންވީ ގޮތް ބުނެދިނުމުގެ ހައްގު އެއްވެސް ބަޔަކަށް ލިބިގެން ނުވާތީ ކަމަށް އޭނާ ވިދާޅުވި އެވެ. 

މިފަދަ މޭރުމަކުން އަރާގްޗީ ވާހަކަ ދައްކަވާފައި މި ވަނީ، އެމެރިކާ އާއި އީރާންއާ ދެމެދު ހުކުރު ދުވަހު އޮމާންގައި ކުރިއަށް ގެންދިޔަ މަޝްވަރާ ތަކަށް ފަހު އެވެ. އެ މަޝްވަރާ ތަކުގައި އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވެސް ބައިވެރިވެ ވަޑައިގެންނެވިއިރު، އޭގެ ދެ ދުވަސް ފަހުން އަރާގްޗީ މި ވަނީ އެމެރިކާ ދެކެ ބިރު ނުގަންނަ ކަމަށް ވިދާޅުވެފަ އެވެ. ގަލްފު ސަރަހައްދަށް އެމެރިކާގެ އަސްކަރީ މަނަވަރުތައް ފޮނުވައިގެން އީރާން އަށް ބިރު ނުދެއްކާނެ ކަމަށް އަރާގްޗީ ވިދާޅުވި އެވެ. 

އީރާންގެ ނިއުކްލިއާ މައްސަލައިގައި އެމެރިކާ އާއި އީރާންއާ ދެމެދު ނުތަނަވަސްކަން ބޮޑުވެފައިވާއިރު، އީރާން އިން ތަކުރާރުކޮށް ބުނަމުން ދަނީ އެ ޤައުމުގެ ނިއުކްލިއާ މަސައްކަތަކީ ހަމައެކަނި ސުލްހަވެރި ބޭނުން ތަކަށް ކުރިއަށް ގެންދާ މަސައްކަތް ތަކެއް ކަމަަށެވެ. އެހެން ނަމަވެސް، އެމެރިކާ އިން އަންނަނީ އީރާންއާ ދެކޮޅަށް ދަތި ކުރުމުގެ ފިޔަވަޅުތައް އެޅުމާ އެކު، އިންޒާރު ވެސް ދެމުންނެވެ.