އޮބާމާގެ ދެމަފިރި ކަނބަލުންނަކީ ވަގުން ކަމަށް ބުނެ ނަސްލީ ގޮތުން ފުރައްސާރަކޮށް ޓްރަމްޕް ޕޯސްޓު ކުރި ފޮޓޯ، ވައިޓް ހައުސް އިން ޑިލީޓު ކޮށްލައިފި

އެމެރިކާގެ ކުރީގެ ރައީސް ބަރަކް އޮބާމާ އާއި، އޭނާގެ އަނބިކަނބަލުން މިޝެލް އޮބާމާ އަކީ ވަގުން ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް ޕޯސްޓު ކުރެއްވި ފޮޓޯ، ވައިޓް ހައުސް އިން ޑިލީޓު ކޮށްލައިފި އެވެ. 

ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓުގައި އޮބާމާ އާއި، އޭނާގެ އަނބިކަނބަލުންނަށް ވަނީ ވަރަށް ބޮޑަށް ފުރައްސާރަ ކޮށްފަ އެވެ. އެގޮތުން 2020 ވަނަ އަހަރުގެ ރިޔާސީ އިންތިޚާބަކީ އޮޅުވާލާފައިވާ އަދި ވަގަށް ނަގާފައިވާ އިންތިޚާބެއް ކަމަށް ބުނެ، އެ ޕޯސްޓުގައި ޓްރަމްޕް ވަނީ އޮބާމާގެ ދެމަފިރިންނަށް ނަސްލީ ގޮތުން ފުރައްސާރަ ކޮށްފަ އެވެ. އެގޮތުން އެފްރިކާ ނަސްލުގެ މަންޒަރު ތަކެއް ފެންނަ ކުރެހުމެއްގައި ޓްރަމްޕް ވަނީ އޮބާމާގެ ދެމަފިރިން ބޭނުން ކޮށްފަ އެވެ. 

އެކަމާ ގުޅޭ ގޮތުން މައުލޫމާތު ދެމުން ވައިޓް ހައުސްގެ އޮފިޝަލަކު ބުނެފައި ވަނީ، ވައިޓް ހުއުސްގެ މުވައްޒަފަކަށް އޮޅިގެން ހެދުނު ޕޯސްޓެއް ކަމަށެވެ. ނަން ހާމަ ނުކުރަން ޝަރުތު ކުރުމަށް ފަހު މައުލޫމާތު ދެމުން އެ އޮފިޝަލް ބުނެފައި ވަނީ، ވައިޓް ހައުސް އިން އެ ޕޯސްޓު ހުކުރު ދުވަހު ޑިލީޓު ކޮށްލާފައިވާ ކަމަށެވެ. 

ބުރާސްފަތި ދުވަހުގެ ރޭ ޓްރަމްޕްގެ އެކައުންޓުން ޕޯސްޓު ކޮށްފައިވާ އެ ވީޑިއޯ އަކީ މިނެޓެއްގެ ވީޑިއޯ އެކެވެ. އެގޮތުން 2020 ވަނަ އަހަރުގެ ރިޔާސީ އިންތިޚާބު އޭނާ އަށް ކާމިޔާބު ނުކުރެވުނީ ބަޔަކު އޮޅުވާލުމުން ކަމަށް ޓްރަމްޕް ވިދާޅުވާ ވިދާޅުވުން، އެ ވީޑިއޯ ގައި ތަކުރާރު ކުރައްވާފައިވެ އެވެ. މިިއީ އޭއައި ޓެކްނޮލޮޖީ ބޭނުން ކޮށްގެން ތައްޔާރު ކޮށްފައިވާ ވީޑިއޯ އަކަށްވާއިރު، ޓްރަމްޕްގެ އެ ޕޯސްޓާ ގުޅިގެން އެތައް ބައެއްގެ ފާޑު ކިޔުން އޭނާ އަށް އަމާޒުވެފައިވެ އެވެ. 

ޓްރަމްޕްގެ އެ ޕޯސްޓަށް ފާޑު ވިދާޅުވި ބޭފުޅުންގެ ތެރޭގައި، ޓްރަމްޕްގެ ސަޕޯޓަރެއް ކަމަށްވާ ކަޅު ނަސްލުގެ ސެނެޓަރު ޓިކް ސްކޮޓް ވެސް ހިމެނެ އެވެ. އޭނާ އަކީ ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން ޕާޓީގެ މެމްބަރެކެވެ. އެކްސްގައި ކުރެއްވި ޕޯސްޓެއްގައި ސްކޮޓް ވިދާޅުވީ، އެއީ ވައިޓް ހައުސް އިން ކޮށްފައިވާ ވަރަށް ދަށު ދަރަޖައިގެ އަމަލެއް ކަމަށެވެ. އަދި އެއީ ވަރަށް ބޮޑު ނަސްލީ ތަފާތު ކުރުމެއް ކަމަށް އޭނާ ސިފަ ކުރެއްވި އެވެ. 

ނިއު ޔޯކް އަށް ނިސްބަތްވާ ރިޕަބްލިކަން ޕާޓީގެ މެމްބަރު މައިކް ލޯލާ ވިދާޅުވެފައި ވަނީ، އެކަމުގައި ޓްރަމްޕް މައާފަށް ވެސް އެދިވަޑައި ގަންނަވަން ޖެހޭނެ ކަމަށެވެ. ނަމަވެސް، އެ ވީޑިއޯއާ ގުޅޭ ގޮތުން އަމާޒުވަމުން ދިޔަ ފާޑު ކިޔުންތަކާ ގުޅިގެން، ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވަނީ އެކަން ދިފާއު ކުރައްވާ ވާހަކަ ދައްކަވައިފަ އެވެ. 

މި މައްސަލައާ ގުޅޭ ގޮތުން އޮބާމާގެ ދެމަފިރިންގެ ތަރުޖަމާނު ވާހަކަ ދައްކަވަން ބޭނުންފުޅެއް ނުވި އެވެ. އޮބާމާގެ ކުރީގެ އެހީތެރިޔެއް ކަމަށްވާ ބެން ރޯޑްސް އެކްސްގައި ކުރެއްވި ޕޯސްޓެއްގައި ވިދާޅުވީ، ޓްރަމްޕް އާއި އޭނާގެ މީހުން ނަސްލީ ގޮތުން ފުރައްސާރަ ކުރުމަށް ދޫކޮށްލުމަށް އެދޭ ކަމަށެވެ. އަދި އެމެރިކާގެ ރައްޔިތުން، އޮބާމާ އާއި އޭނާގެ އަނބިކަނބަލުން ދެކެ ލޯބިވާނެ ކަމަށާއި، އެ ޤައުމުގެ ތާރީޚުގައި އެ ދެމަފިރިންނަށް ފުރިހަމަ އިޙުތިރާމް އޮންނާނެ ކަމަށެވެ. 

މީގެ ކުރިން ވެސް ޓްރަމްޕް އަކީ، ނަސްލީ ގޮތުން މީހުންނާ ދިމާ ކުރުމާއި، މަލާމާތް ކުރުމުގެ ތާރީޚެއް އޮންނަ ބޭފުޅެކެވެ. އެގޮތުން މީގެ ކުރިން ވެސް ޓްރަމްޕް ވަނީ އޮބާމާ އަށް އެގޮތަށް މަލާމާތް ރައްދުވާ ގޮތައް ޕޯސްޓުތައް ކުރައްވައި އަދި ވާހަކަ ވެސް ދައްކަވައިފަ އެވެ. މީގެ އިތުރުން އެހެން ޤައުމު ތަކުގެ ރައްޔިތުންނާއި، ލީޑަރުންނަށް އަމާޒުކޮށް ވެސް ޓްރަމްޕް ވަނީ އެފަދަ ވާހަކަތައް ދައްކަވައިފަ އެވެ.