ޓްރަމްޕްގެ ބޯޑް އޮފް ޕީސްގެ ފުރަތަމަ ބައްދަލުވުން މި މަހުގެ 19 ގައި އެމެރިކާގައި

ޣައްޒާގެ ސަލާމަތަށްޓަކައި އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ ބޯޑް އޮފް ޕީސްގެ ފުރަތަމަ ބައްދަލުވުން މި މަހު އޮންނާނެ ކަމަށް ރިޕޯޓު ކޮށްފި އެވެ. 

އެމެރިކާގެ އެކްސިއޯސް ނޫހުން ބުނެފައިވާ ގޮތުގައި، އެ ބައްދަލުވުން އެމެރިކާގައި ބޭއްވުމަށް ހަަމަޖެހިފައި ވަނީ ފެބްރުވަރީ މަހުގެ 19 ވަނަ ދުވަހު އެވެ. ނަަމަވެސް، އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް އާއި، ސްޓޭޓް ޑިޕާޓްމަންޓް އިން އެއްޗެއް ބުނެފައި ނުވެ އެވެ. 

އެކްސިއޯސްގެ ރިޕޯޓުގައި ބުނެފައިވާ ގޮތުން އެ ބައްދަލުވުމަކީ ޣައްޒާ އަލުން އާރާސްތު ކުރުމަށް ބޭނުންވާ ފައިސާ ހޯދުމަށް ބާއްވާ ކޮންފަރެންސް އެކެވެ. މިކަން ރިޕޯޓު ކޮށްފައި ވަނީ ހަތަރު ޤައުމެއްގެ އިސްވެރިންނާ ހަވާލާދީ އެވެ. މި ބައްދަލުވުގެ ކަންކަން އަދި އޮތީ ފުރަތަމަ މަރުޙަލާގައި ކަމަށާއި، އިތުރު ބަދަލު ތަކެއް އައުމަކީ ވެސް އެކަށީގެންވާ ކަމެއް ކަމަށް ބުނެފައިވެ އެވެ. 

މި ބައްދަލުވުން ބޭއްވުމަށް ހަމަޖެހިފައި ވަނީ އެމެރިކާގެ ވެރި ރަށް ވޮޝިންޓަން ޑީސީގައި ބުންނަ އެމެރިކާގެ އިންސްޓިޓިއުޓް އޮފް ޕީސްގައި ކަމަށް ރިޕޯޓުތައް ބުނެ އެވެ. މީގެ އިތުރުން، އެ ބައްދަލުވުން އޮންނަ ދުވަހުގެ ކުރީ ދުވަހު، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އާއި، އެމެރިކާގެ ރައީސް ޓްރަމްޕް ވައިޓް ހައުސްގައި ބައްދަލު ކުރައްވާނެ ކަމަށް ވެސް ރިޕޯޓުތައް ބުނެ އެވެ. 

މިދިޔަ ޖަނަވަރީ މަހުގެ ތެރޭގައި ޓްރަމްޕް ވަނީ މި ބޯޑު އެކުލަވާލައި، އިއުލާން ކޮށްފަ އެވެ. އެ ބޯޑުގެ ރިޔާސަތު ބަލަހައްޓާނީ ޓްރަމްޕް ކަމަށްވާއިރު، އެ ބޯޑުގެ މައިގަނޑު މަޤުސަދަކީ ދުނިޔޭގެ ހަނގުރާމަތައް ޙައްލު ކުރުން ކަމަށް ވެސް ޓްރަމްޕް ވިދާޅުވެފައިވެ އެވެ. އެ ބޯޑާ އެކު، އދ އިން ކުރަމުން އަންނަ މަސައްކަތްތައް ބަލިކަށި ވެދާނެ ކަމުގެ ކަންބޮޑުވުން ވެސް ތަޖުރިބާކާރުން ވަނީ ފާޅު ކޮށްފަ އެވެ.