އެެމެރިކާ އާ އެކު ބޭއްވި މަޝްވަރާ ތައް ނިމުނު ތަނުން އީރާނަށް ދަތިކުރުމުގެ ފިޔަވަޅު އަޅައިފި
އީރާނުގެ ތެޔޮ އުފުލާ ކަމަށް ބުނާ 14 އުޅަނދަކާ އެކު އެއްވެސް މުޢާމަލާތެއް ކުރުން ހުއްޓުވުމަށް އަމުރުކުރާނެ ކަމަށް ސްޓޭޓް ޑިޕާޓްމަންޓުން ބުނެފައިވާއިރު މީގެ ތެރޭގައި ތުރުކީ، އިންޑިއާ އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދިދަ ޖަހާފައިވާ އުޅަނދުތައް ހިމެނޭ.
ވެނެޒުއޭލާގެ އުތުރުގެ ސްޓޭޓެއް ކަމަށްވާ ކަރަބޯބޯގެ ޕުއެރްޓޯ ކަބެއްލޯ އަށް، 2020 މެއި މަހުގެ 25 ގައި އީރާނުގެ ދިދަ ޖަހާފައިވާ ތެޔޮ ޓޭންކަރު "ފޯޗޫން" އައުމަށްފަހު، އެ ސަރަހައްދުގައި ހުންނަ އެލް ޕަލީޓޯ ރިފައިނަރީގައި ބަނދަރުކޮށްފައި. | ގެޓީ އިމޭޖަސް
އީރާނުން ބޭރުކުރާ ތެލުގެ މިންވަރު މަދުކުރުމަށްޓަކައި، އެމެރިކާއިން ދަތިކުރުމުގެ އައު ފިޔަވަޅުތަކެއް ހުކުރު ދުވަހު އިޢުލާނުކޮށްފި އެވެ.
މި ފިޔަވަޅުތަކުގެ ތެރޭގައި 14 އުޅަނދަކަށް އަމާޒުކޮށް ފިޔަވަޅު އެޅުން ހިމެނޭއިރު، މިކަން އިޢުލާނުކޮށްފައިވަނީ ދެކޮޅުވެރި ދެ ޤައުމު ގެ ގޮތުގައި ބެލޭ އެމެރިކާ އާއި އީރާނުން އޮމާންގައި ކުރިއަށްގެންދިޔަ ނުސީދާ މަޝްވަރާތައް ނިންމާލިތާ ކުޑަވަގުތުކޮޅެއްގެ ތެރޭގަ އެވެ.
އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓް ވިދާޅުވީ، އީރާނުން ތެލުގެ އާމްދަނީ ބޭނުންކުރަނީ "ދުނިޔޭގެ އެކި ކަންކޮޅުތަކުގައި ހަމަޖެހުން ނަގާލުމުގެ ހަރަކާތްތަކަށް ފަންޑުކުރުމަށާއި، އީރާނުގެ އެތެރޭގައި ފިއްތުންތައް އިތުރުކުރުމަށް" ކަމަށެވެ.
ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ "މެކްސިމަމް ޕްރެޝަރު" ނުވަތަ އެންމެ މަތީ ދަރަޖައަށް ފިއްތުންތައް ކުރިމަތިކުރުމުގެ ސިޔާސަތުގެ ދަށުން، އީރާނުގެ ސަރުކާރުން ޣައިރުގާނޫނީ ގޮތުން ބޭރުކުރާ ތެލާއި ޕެޓްރޯކެމިކަލް އެކްސްޕޯޓް ދަށްކުރުމަށް ޓްރަމްޕް އިސްކަންދެއްވާ ކަމަށް ޕިގޮޓް ނެރުއްވި ބަޔާނެއްގައި ވިދާޅުވި އެވެ.
އީރާނުގެ ތެޔޮ އުފުލާ ކަމަށް ބުނާ 14 އުޅަނދަކާއެކު އެއްވެސް މުޢާމަލާތެއް ކުރުން ހުއްޓުވުމަށް އަމުރުކުރާނެ ކަމަށް ސްޓޭޓް ޑިޕާޓްމަންޓުން ބުނެފައިވެ އެވެ. މީގެ ތެރޭގައި ތުރުކީ، އިންޑިއާ އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދިދަ ޖަހާފައިވާ އުޅަނދުތައް ހިމެނެ އެވެ.
މީގެ އިތުރުން، 15 ކުންފުންޏަކާއި ދެ މީހަކާ ދެކޮޅަށް ދަތިކުރުމުގެ ފިޔަވަޅު އަޅާފައިވާކަން ވެސް އެމެރިކާއިން ވަނީ ހާމަކޮށްފަ އެވެ.
ޓްރަމްޕްގެ ފުރަތަމަ ދައުރުން ފެށިގެން، އެހެން ހުރިހާ ޤައުމުތަކަކުން އީރާނުގެ ތެޔޮ ގަތުން ހުއްޓުވުމަށްޓަކައި އެމެރިކާއިން ދަނީ ދަތިކުރުމުގެ ފިޔަވަޅުތައް އަޅަމުންނެވެ.
އީރާނުގެ ނިއުކްލިއާ ޕްރޮގްރާމާ ގުޅޭގޮތުން އީރާނުގެ ފޮރިން މިނިސްޓަރު ހުކުރު ދުވަހު އޮމާންގައި ޓްރަމްޕްގެ އިސް މަންދޫބުންނާ ނުސީދާކޮށް ބައްދަލުކުރައްވާފައިވާއިރު، އެ ބައްދަލުވުމުގައި "އުންމީދީ މާޙައުލެއް" އޮތް ކަމަށް އޭނާ ވިދާޅުވި އެވެ.
ރައީސް ޓްރަމްޕް ވަނީ އީރާނާ ދެކޮޅަށް އަސްކަރީ ބާރުގެ ބޭނުންކުރާނެ ކަމުގެ އިންޒާރު ދެއްވައި، އީރާނުގެ އައްސޭރިފަށުގެ ސަރަޙައްދުތަކުގައި އެމެރިކާގެ އަސްކަރީ ހަރަކާތްތައް އިތުރުކުރައްވާފަ އެވެ.
