މަޝްވަރާތައް ކާމިޔާބު، އީރާން އިން އެއްބަސްވުމަކަށް ނުގޮސްފި ނަމަ ނަތީޖާ ހިތި ވާނެ: ޓްރަމްޕް

އެމެރިކާ އާއި އީރާންއާ ދެމެދު އޮމާންގައި ކުރިއަށް ގެންދިޔަ މަޝްވަރާތައް ކާމިޔާބު ކަމަށާއި، އީރާން އިން އެއްބަސްވުމަކަށް ނުގޮސްފި ނަމަ ނަތީޖާ ހިތި ވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

މެދު އިރުމަތީގެ ސަރަހައްދުގައި އެމެރިކާގެ ހަނގުރާމައިގެ އުޅަނދުތައް ތިބި ވަގުތެއްގައި، އެމެރިކާ އާއި އީރާންއާ ދެމެދު ވަނީ ނިއުކްލިއާ މައްސަލައިގެ މަޝްވަރާތައް ކުރިއަށް ގެންގޮސްފަ އެވެ. ނުސީދާ ގޮތެއްގައި ކުރިއަށް ގެންދިޔަ ބައްދަލުވުމަށް ފަހު، ދެ ޤައުމުން ވެސް ވަނީ އުންމީދު އައު ކޮށްފަ އެވެ. 

ޓްރަމްޕްގެ ލަގްޒަރީ ރިސޯޓު މާ-އަ-ލާގޯ އަށް ދަތުރު ކުރެއްވުމުގެ ތެރެއިން ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާން އާއެކު ދެކެވެމުން އަންނަނީ ވަރަށް ރަނގަޅު ވާހަކަ ތަކެއް ކަަމަށެވެ. ހުކުރު ދުވަހުގެ މަޝްވަރާ ތަކަށް ފަހު، އަންނަ ހަފުތާގެ ކުރީ ކޮޅު ވެސް އިތުރު މަޝްވަރާ ތަކެއް ކުރިއަށް ގެންދާނެ ކަމަށް ޓްރަމްޕް ވިދާޅުވި އެވެ. 

އެހެން ނަމަވެސް، އީރާން އިން އެއްބަސްވުމަކާ ހަމައަށް ނުގޮސްފި ނަމަ، އެކަމުގެ ނަތީޖާ ވަރަށް ހިތި ވާނެ ކަމަށް ވިދާޅުވެ ޓްރަމްޕް ވަނީ އިންޒާރެއް ދެއްވައިފަ އެވެ. މީގެ ކުރިން ވެސް ޓްރަމްޕް ވިދާޅުވެފައި ވަނީ، އީރާން އަށް އެއްބަސްވުމަކަށް އަންނަން ޖެހޭ ކަމަށާއި، އެ ނޫނީ އެ ޤައުމާ ދެކޮޅަށް އަސްކަރީ ބާރު ބޭނުން ކުރަން ޖެހޭނެ ކަމަށެވެ. 

މަޝްވަރާ ތަކާ ގުޅޭ ގޮތުން އީރާންގެ ފޮރިން މިނިސްޓަރު އައްވާސް އަރާގްޗީ ވެސް ވިދާޅުވެފައި ވަނީ، މަޝްވަރާ ތަކަކީ ރަނގަޅު ފެށުމެއް ކަމަށެވެ. އެގޮތުން މަޝްވަރާ ތަކުގައި މައިގަނޑު ގޮތެއްގައި ވާހަކަ އަމާޒުކޮށްފައި ވަނީ އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ކަމަށް ވެސް އޭނާ ވިދާޅުވި އެވެ. 

އެމެރިކާ އާއި އީރާންއާ ދެމެދު އެންމެ ފަހުން މަޝްވަރާތައް ކުރިއަށް ގެންގޮސްފައި ވަނީ 2025 ވަނަ އަހަރުގެ ތެރޭގަ އެވެ. އެ ފަހަރުގެ މަޝްވަރާ ތަކުގައި ބައްދަލުވުން ތަކެއް ބާއްވަމުން އަންނަނިކޮށް، އިޒްރޭލް އިން އީރާން އަށް ދިން ހަމަލާގެ ސަބަބުން ފެށުނު ހަނގުރާމައިގައި ވަނީ މަޝްވަރާތައް މެދު ކެނޑިފަ އެވެ.