އީރާނާއި އެމެރިކާ އާ ދެމެދު މަޝްވަރާތައް ފަށައިފި

އީރާނުގެ ސުލްހަވެރި ނިއުކްލިއާ ޕްރޮގްރާމާއި އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާ ގުޅޭގޮތުން، އީރާނާއި އެމެރިކާއާ ދެމެދު މަޝްވަރާތައް ފަށާފައިވާ ކަމަށް ރިޕޯޓުތައް ބުނެފި އެވެ.

ނިއުކްލިއާ މަޝްވަރާތައް ކުރިއަށް ގެންދިއުމަށްޓަކައި އޮމާންގެ ވެރިރަށް މަސްކަޓަށް ވަޑައިގެން އުޅުއްވާ އީރާނުގެ ޚާރިޖީ ވަޒީރު ސައްޔިދު އައްބާސް އަރާގްޗީ ވަނީ، ހުކުރު ދުވަހުގެ ކުރީކޮޅު އޮމާންގެ ޚާރިޖީ ވަޒީރު ސައްޔިދު ބަދުރު ބިން ހަމަދު އަލް ބޫސައިދީއާ ބައްދަލުކުރައްވައި މަޝްވަރާ ކުރައްވާފަ އެވެ.

މި ބައްދަލުވުމުގައި އަރާގްޗީ އާއި ބޫސައިދީ ވަނީ އީރާނާއި އެމެރިކާއާ ދެމެދު ކުރިއަށްދާ މަޝްވަރާތަކުގެ އޮނިގަނޑާއި، އެ ކަންކަން ކުރިއަށްދާނެ ގޮތާ ގުޅޭގޮތުން ވާހަކަދައްކަވާފަ އެވެ.

ގައުމީ މަސްލަހަތު ހިމާޔަތްކުރުމަށްޓަކައި ޑިޕްލޮމެސީ ނުވަތަ ޚާރިޖީ ގުޅުންތަކުގެ ބޭނުން ހިފުމަށް އީރާނުން ގެންގުޅޭ ސިޔާސަތަށް އަލިއަޅުއްވާލައްވަމުން، އީރާނުގެ ސިޔާދަތާއި ގައުމީ ސަލާމަތަށް ނުރައްކާވާ ފަދަ ކޮންމެ ކަމަކުން ދިފާއުވުމަށް ތެހެރާން އޮތީ ފުރިހަމައަށް ތައްޔާރަށް ކަމަށް އަރާގްޗީ ވިދާޅުވި އެވެ. އަދި އެއްވެސް ފަރާތަކުން ކުރާ ނޭއްގާނީ އަމުރުތަކާއި ނުރައްކާތެރި އަމަލުތަކަށް ދޫނުދޭނެ ކަމަށްވެސް އޭނާ ފާހަގަކުރެއްވިއެވެ.

މީގެއިތުރުން، މި މަޝްވަރާތައް ބޭއްވުމަށް އޮމާނުން ފޯރުކޮށްދޭ އެހީތެރިކަމާއި، އެ ގައުމުން މިކަމަށް މެދުވެރިއެއްގެ ދައުރު އަދާކުރާތީ އީރާނުގެ ޚާރިޖީ ވަޒީރު ވަނީ ޝުކުރު އަދާކުރައްވާފަ އެވެ.

އޮމާންގެ ޚާރިޖީ ވަޒީރު ދެއްކެވި ވާހަކަފުޅުގައި، ޑިޕްލޮމެޓިކް މަރުހަލާތަކުގައި އީރާނުން ބަހައްޓާ އިޚްލާސްތެރިކަމާއި، ޒިންމާދާރުކަމުގެ އިތުރުން މިކަމަށް ދޭ ސީރިއަސްކަމަށް ތައުރީފު ކުރެއްވި އެވެ.

ސަރަހައްދީ ނުތަނަވަސްކަން އިތުރުވިޔަ ނުދިނުމަށް ސަރަހައްދުގެ ގައުމުތަކުން ހިފާފައިވާ އަޒުމަށް އިޝާރާތް ކުރައްވަމުން، ހުރިހާ ފަރާތްތަކަކުން ވެސް އިޚްލާސްތެރިކަމާއެކު ކުރިއަށްގެންދާ މި މަޝްވަރާތަކުގެ ސަބަބުން، އީރާނާއި އެމެރިކާއާ ދެމެދު ދާއިމީ އެއްބަސްވުމަކަށް ދިއުމަށް މަގުފަހިވާނެ ކަމަށް އުންމީދު ކުރައްވާ ކަމަށް އޮމާންގެ ޚާރިޖީ ވަޒީރު ވިދާޅުވި އެވެ.

މިދިޔަ ޖޫން މަހު އިޒްރޭލާ އެކު ކުރި 12 ދުވަހުގެ ހަނގުރާމައިގެ ތެރޭގައި، އެމެރިކާއިން އީރާނުގެ ނިއުކްލިއަރ މަރުކަޒުތަކަށް ބޮން އެޅުމާ ގުޅިގެން މެދުކަނޑާލާފައިވާ މަޝްވަރާތަކަށްފަހު، މިއީ އީރާނާއި އެމެރިކާ އާ ދެމެދުގައި ބާއްވާ ފުރަތަމަ ބައްދަލުވުމެވެ.

މި މަޝްވަރާތަކުގައި އީރާނުގެ ވަފުދުގެ އިސްވެރިއެއްގެ ގޮތުގައި ޚާރިޖީ ވަޒީރު އައްބާސް އަރަގްޗީ ބައިވެރިވެވަޑައިގަންނަވާއިރު، އެމެރިކާގެ ފަރާތުން ތަމްސީލުކުރައްވަނީ އެ ގައުމުގެ މަންދޫބު ސްޓީވް ވިޓްކޮފްއެވެ.