ށ. ފޯކައިދޫ އިން ރައީސް ޞާލިހަށް ހޫނު މަރުހަބާއެއް

ށ. ފޯކައިދޫ ކައުންސިލްގެ ދައުވަތަކަށް އެރަށަށް ވަޑައިގަތުމުން، ކުރީގެ ރައީސް އިބްރާިމް މުހައްމަދު ޞާލިހު އަށް އެރަށު ރައްޔިތުން ހޫނު މަރުހަބާއެއް ކިޔައިފި އެވެ. 

ރައީސް ޞާލިހު އެރަށަށް ވަޑައިގެންނީ ހޮނިހިރު ދުވަހުގެ ހަވީރު އެވެ. އެމަނިކުފާނަށް މަރުހަބާ ދެންނެވުމަށްޓަކައި ރަށުގެ ކުދި ބޮޑު އަދި އުމުރުން ދުވަސްވީ އެތައް ބަޔަކު ބަނދަރު ސަރަހައްދަށް އެއްވެފައިވެ އެވެ. އެމަނިކުފާނާ ސަލާމް ކުރެއްވި އާންމުން ދިޔައީ ނިމިގެން ދިޔަ އެމްޑީޕީ ސަރުކާރުގައި ފޯކައިދޫއަށް އެމަނިކުފާނުގެ ކޮށްދެއްވި ކަންތައްތަކާއި، އެކަހެރިވެފައި އޮތް އޮތުން ނިމުމަކަށް ގެނެސް ތަރައްގީގެ ސަފުގައި ހިމަނާ ދެއްވާފައިވާތީ ޝުކުރު އަދާކޮށްފަ އެވެ. 

ރައީސްގެ މި ދަތުރުފުޅުގައި ކައުންސިލުން އެރަށުގައި ޒަމާނީ ފެންވަރަށް ތަރައްގީކޮށް ނިންމާފައިވާ ވޮލީކޯޓު ހުޅުވައި ދެއްވާފައިވެ އެވެ. މި ވޮލީ ކޯޓަކީ ކައުންސިލްގެ ހަރަދުގައި ތަރައްގީ ކޮށްފައިވާ އައުޓްޑޯ ޒަމާނީ ކޯޓެކެވެ. މި ކޯޓުގެ ފުރަތަމަ ފިޔަވަހީގެ ތެރެއިން ކޯޓުގައި ޓާފް އަޅާ ތަރައްގީ ކޮށްފައިވާ އިރު، ދެވަނަ ފިޔަވަހީގެ ދަށުން ވަށާ ފެންސް ޖެހުމަށް ވަނީ ނިންމާފަ އެވެ.

މީގެ އިތުރުން އެމްޑީޕީ ނޫ ބަހާރު ޖަގަހަ ރައީސް ސޯލިޙް ހުޅުވައިދެއްވި އެވެ. މި ޖަގަހައަކީ ކުރިއަށް އޮތް ލޯކަލް ކައުންސިލް އިންތިހާބުގައި ކެމްޕޭނުގެ ކަންކަން ކުރިއަށް ގެންދިއުމަށް ހުޅުވި ޖަގަހައެކެވެ. ރައީސް ޞާލިހު ވަނީ ޖަގަހަ ހުޅުވުމުގެ ގޮތުން އެމްޑީޕީ ގެ ދިދަ ނަންގަވާފަ އެވެ. މީގެ އިތުރުން ކައުންސިލް އިންތިޚާބުގައި ވާދަކުރާ ފޯކައިދޫ އެމްޑީ ގެ ކެންޑިޑޭޓުންނާއި ލީޑް ޓީމާއި އެމަނިކުފާނު ބައްދަލު ކުރައްވާނެ އެވެ. އަދި ހޮނިހިރު ދުވަހުގެ ރޭ އެމްޑީޕީގެ ޖަލްސާއެއް ބޭއްވުމަށް ވަނީ ހަމަޖެހިފަ އެވެ. 

ރައީސް ސޯލިޙް ގެ މި ދަތުރުފުޅުގައި ފޯކައިދޫ އެމްޑީޕީ ގެ މެންބަރުންނާ ވެސް ބައްދަލުކުރެއްވުމަށް ވަނީ ހަމަޖެހިފަ އެވެ. މީގެ އިތުރުން އެރަށުގައި ކައުންސިލް އިންތިހާބަށް ޑޯ ޓު ޑޯ އަށް ކެންޑިޑޭޓުންނާއެކު ވަޑައިގަތުމަށް ވަނީ ހަމަޖެހިފަ އެވެ.

ރައީސް ސޯލިޙް ވެރިކަމުގައި ފޯކައިދޫ ގައި ތަރައްގީގެ ގިނަ މަސައްކަތްތަކެއް ފައްޓަވައި ނިންމަވާފައިވެ އެވެ. މީގެ ތެރޭގައި ފެނާ ނަރުދަމާ، ބަނދަރުގެ މަސައްކަތް، ކޮމިއުނިޓީ ސެންޓަރު، ހެލްތް ސެންޓަރުގެ އެކްސްޓެންޝަން އިމާރާތް ހިމެނެ އެވެ.