މިސަރުކާރުން އަތޮޅު ކައުންސިލުންތައް އުވާލީ އަތޮޅުގެ އެސެޓް ސަރުކާރަށް ނެގުމަށް: ނ.އަތޮޅު ކައުންސިލްގެ ކުރީގެ ރައީސް ޒާފިރު

ރައީސް ޑރ.މުހައްމަދު މުއިއްޒުގެ ސަރުކާރުން އަތޮޅު ކައުންސިލުންތައް އުވާލީ އަތޮޅުގެ އެސެޓް ސަރުކާރަށް ނެގުމަށް ކަމަށް ނ.އަތޮޅު ކައުންސިލްގެ ކުރީގެ ރައީސް އަލީ ޒާފިރު ވިދާޅުވެއްޖެ އެވެ. 

ބުރާސްފަތި ދުވަހުގެ ފަށާއިރު ޕްރޮގްރާމްގައި ޒާފިރު ވަނީ މިސަރުކާރުން ލާމަރުަކަޒީ ނިޒާމުގެ ބާރު ހަނިކުރުމަށް ކުރަމުންދާ މަސައްކަތްތަކަށް ވަރަށް ބޮޑަށް ފާޑު ވިދާޅުވެފަ އެވެ. 

ޒާފިރު ވިދާޅުވީ، މިއީ މަރުކަޒީ ސަރުކާރެއް ކަމަށާއި، ހުރިހާ ބާރެއް އެއްކުރުމަށް މަސައްކަތް ކުރަމުންދާ ކަމަށެވެ. އަތޮޅު ކައުންސިލްތައް މިސަރުކާރުން އުވާލީ، ބަޖެޓާއި، އަތޮޅުގެ އެސެޓް ސަރުޚާރަށް ނެގުމުގެ މަގުސަދުގައި ކަމަށް އޭނާ ވިދާޅުވި އެވެ. އަދި ކުރިއަށް އޮތީ ކައުންސިލް އިންތިޚާބު ކަމަށާއި، ވަރަށް ފައިސާ ބޭނުންވާނެ ކަމަށް އޭނާ ވިދާޅުވި އެވެ. 

މިދިޔަ ރިޔާސީ ބަޔާނުގައި ދެއްކެވި ވާހަކަ އެއް އަދި މި ރިޔާސީ ބަޔާނާ ހިސާބަށް 365 ދުވަސް ގާތްގަނޑަކަށް ވެގެން މިދިޔައީ. މިވީ މުއްދަތުގެ ތެރޭގައި އަތޮޅު ކައުންސިލްތައް ފައިސާ ދޭން އޭރުގައި ދަންނަވާފައި ކުއްލި އަކަށް އަތޮޅު ކައުންސިލްތައް އުވާލީމަ ފަސޭހައެއް ނުންތޯ ފައިސާ ނުދީ ވީއެއްނުންތޯ ފައިސާ ވެސް މިއަހަރުގެ ކައުންސިލް އިންތިޚާބުގައި ވެސް ބޭނުންކޮށްލަން ސަރުކާރަށް ލިބޭނެ އެއްޗެއްނުންތޯ އެއީ. އެފުރުސަތު އެ ހޯދަނީ. 

ނ.އަތޮޅު ކައުންސިލްގެ ކުރީގެ ރައީސް އަލީ ޒާފިރު

ޒާފިރު ވިދާޅުވީ ރައްޔިތުން ކައުންސިލްތައް އިންތިޚާބު ކުރަނީ ރައީސް އާއި ރައްޔިތުންގެ މަޖިލިސް މެންބަރުން އިންތިޚާބު ކުރާ އުސޫލުން 5 އަހަރުގެ މުއްދަތަށް ކަމަށެވެ. ނަމަވެސް އެއް އަހަރު ކައުންސިލަރުންނަށް މަސައްކަތް ނުކުރެވޭ ގޮތް ހަދާފައިވާ ކަމަށާއި، އޭގައި ސަރުކާރުގެ ހެޔޮ ނިޔަތެއް ނެތް ކަމަށް އޭނާ ވިދާޅުވި އެވެ. އަދި ވިދާޅުވީ އެ އުސޫލުން ކައުންސިލަރުންނަށް މަސައްކަތް ނުކުރެވޭނަމަ  މަޖިލިސް މެންބަރުންނާ ރައީސްއަށް ވެސް އެންމެ ފަހު އަހަރު މަސައްކަތް ކުރެވިގެން ނުވާނެ ކަަމަށެވެ. 

މީގެ އިތުރުން ޒާފިރު ވިދާޅުވީ އަތޮޅު ކައުންސިލްތަކުން އަތޮޅުގެ ތަރައްގީ އަށް ވަރަށް ގިނަ މަސައްކަތްތައް ކޮށްފައިވާ ކަމަށާއި، ހެޔޮ ބަދަލުތައް ގެނެސްފައިވާ ކަމަށެވެ. އަދި އެކަން ރައްޔިތުން ވެސް ބަލައިގަނެފައިވާ ކަމަށް އޭނާ ވިދާޅުވި އެވެ.