ކުރިއަށް އޮތް ލޯކަލް ކައުންސިލް ތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ވާދަކުރާ ގއ.ކޮލަމާފުށީގެ އެމްޑީޕީގެ ކެންޑިޑޭޓުންނާއި، އެމްޑީޕީގެ ކުރީގެ ޗެއަރޕާސަން ފައްޔާޒް ބައްދަލުކުރައްވައިފި

ކުރިއަށް އޮތް ލޯކަލް ކައުންސިލް ތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ވާދަކުރާ ގއ.ކޮލަމާފުށި އެމްޑީޕީގެ ކެންޑިޑޭޓުންނާއި، އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް ބައްދަލުކުރައްވައިފި އެވެ.

އެ ޓީމާއި ފައްޔާޒް ބައްދަލުކުރެއްވީ ގއ.ކޮލަމާފުށީގައި އަންގާރަ ދުވަހު އެވެ. ފައްޔާޒް އެ ރަށަށް ވަޑައިގަންނަވާފައި މި ވަނީ ގއ.ކޮލަމާފުށި އިންޖީނުގެއާއި ފެނަކަ އޮފީސް ހިންގުމާއި ހަވާލުވެ ހުރި އަބްދުﷲ ނާސިރު ސިޔާސީ ބޭނުމަށް މަޤާމުން ވަކިކޮށްފައިވާ ދަނޑިވަޅެއްގަ އެވެ. ނާސިރު މަޤާމުން ވަކިކުރީ ވަޒީފާގެ މަގާމު ދަށްކުރުމުން ވެސް މިނިވަން ސިޔާސީ ފިކުރު ފާޅުކުރުން ހުއްޓާނުލުމުން ކަމަށް އެމްޑީޕީގެ ކުރީގެ ޗެއަރޕަސަން ފައްޔާޒް ވަނީ ވިދާޅުވެފަ އެވެ. 

ކުރިއަށް އޮތް ލޯކަލް ކައުންސިލް ތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ތައްޔާރުވުމަށް އެމްޑީޕީގެ ޓީމުތަކުން ދަނީ ރާއްޖޭގެ އެކި ސަރަހައްދުތަކުގައި ހަރަކާތްތެރިވެވަޑައިގަންނަވަމުންނެވެ. މި ޓީމުތަކުގައި އެމްޑީޕީގެ އިސް ސަފުގައި މަސައްކަތް ކުރާ ބޭފުޅުން ހިމެނެ އެވެ.

އެގޮތުން ހޯމަ ދުވަހުގެ ރޭ ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ވާދަކުރާ ޅ.ހިންނަވަރު އެމްޑީޕީގެ ކެންޑިޑޭޓުންނާއި ކެންޕެއިން ޓީމްތަކާއި ކުރީގެ ރައީސް އިބްރާހިމް މުހައްމަދު ސޯލިހު ވަނީ ބައްދަލުކުރައްވާފަ އެވެ. އަދި ކެމްޕެއިން ހަރަކާތްތަކުގައި ބައިވެރިވަޑައިގަންނަވަމުންދާކަން ފާހަގަކޮށްލެވެ އެވެ.

މީގެ އިތުރުން މި އިންތިޚާބުގައި ވާދަ ކުރާ އދ.ދިގުރަށު ކެންޑިޑޭޓުންގެ، އދ.ދިގުރަށުގައި ކުރިއަށްދިޔަ ކެންޕެއިން ހަރަކާތްތަކުގައި ކުރީގެ ނައިބު ރައީސް ފައިސަލް ނަސީމް ގެންދަވަނީ ބައިވެރިވެވަޑައިގަންނަވަމުންނެވެ. އަދި ރާއްޖޭގެ އެކި ހިސާބުތަކުގައި ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުގެ އޮރިއެންޓޭޝަން ޕްރޮގްރާމްތައް ބާއްވަމުންދާ ކަން ފާހަގަކުރެވެ އެވެ.

މާލޭގައި، އެމްޑީޕީގެ މޭޔަރ ކެންޑިޑޭޓް އާދަމް އާޒިމް އާއި  އެމްޑީޕީ ގެ ކެންޑިޑޭޓުން ގެންދަނީ ގޭގެ އަށް ޒިޔާރަތް ކޮށް ޕާޓީގެ ކެންޑިޑޭޓުންނަށް ތާއީދު ހޯދުމުގެ މަސައްކަތް ކުރިއަށް ގެންދަވަމުންނެވެ.