ކުރީ ސަރުކާރުގައި ހިތާދޫ ބަނދަރު މަޝްރޫއުގެ 90 އިންސައްތަ މަސައްކަތް ނިންމި ނަމަވެސް މިސަރުކާރުގައި މަސައްކަތް ކުރިއަށް ނުދޭ

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ބ.ހިތާދޫ ބަނދަރު މަޝްރޫއުގެ 90 އިންސައްތަ މަސައްކަތް ނިންމި ނަމަވެސް ސަރުކާރު ބަދަލު ވެގެން ދިއުމާއެކު މަސައްކަތް ހުއްޓިފައިވާ ކަމަށް އެމްޑީޕީގެ ގައުމީ މަޖިލީހުގެ ހިތާދޫ ދާއިރާގެ ރައީސް އާޔަތުﷲ ހުސެއިން ވިދާޅުވެއްޖެ އެވެ. 

ރާއްޖެޓީވީގެ ވައުދުނާމާ ޕްރޮގްރާމްގައި އާޔަތުﷲ ވިދާޅުވީ، ކުރީ ސަރުކާރުގައި ހިތާދޫގައި އަދި މުޅި ދާއިރާގައި ތަރައްގީގެ ގިނަ މަޝްރޫއުތައް ކުރިއަށް ގެންދިޔަ ކަމަށެވެ.

ހިތާދޫއަށް އިޝާރާތް ކުރައްވައި އާޔަތުﷲ ވިދާޅުވީ ހިތާދޫގައި އިންޖީނުގެ ހުރީ ރަށުގެ މެދުގައި ކަމަށާއި، އަރާ ދުމުގެ ސަބަބުން ރައްޔިތުން ދިރިއުޅެމުން ދިޔައީ ވަރަށް ތަކުލީފުގައި ކަަމަށެވެ. ބ.އަތޮޅުގައި އެންމެ ބޮޑަށް ފެން ތަޣައްޔަރުވެފައި އޮތް ރަށަކީ ވެސް ހިތާދޫ ކަމަށާއި، ކުރީ ސަރުކާރުން ފެނާއި ނަރުދަމާ ނިޒާމުގެ މަސައްކަތް ކުރިއަށް ގެންދިޔަ ކަަމަށް އޭނާ ވިދާޅުވި އެވެ. އަދި ވެރިކަން ބަަދަލުވެގެން ދިޔައިރު މިމަޝްރޫއުގެ 95 އިންސައްތަ މަސައްކަތް ނިންމައި، ޓެސްޓިން މަރުހަލާ ނިންމާފައިވާ ކަމަށް އާޔަތުﷲ ވިދާޅުވި އެވެ. 

މީގެ އިތުރުން އާޔަތުﷲ ވިދާޅުވީ ބަނދަރުގެ މަޝްރޫއުގެ 90 އިންސައްތަ ނިމިފައިވީ ނަމަވެސް ވެރިކަން ބަދަލުވުމާއެކު އެ މަސައްކަތް ހުއްޓިފައިވާ ކަމަށެވެ. މަސައްކަތް ކުރިއަށް ނުދަނީ އެމްޓީސީސީގެ ވެހިކަލްތަކަށް އަޅާނެ ތެޔޮ ނެތިގެން ކަމަށް މައުލޫމާތު ލިބޭ ކަމަށް އޭނާ ވިދާޅުވި އެވެ. ނަމަވެސް މުވައްޒަފުން ނަގާ ވަރަށް ނަގަމުންދާ ކަމަށާއި، މިއީ ކަންބޮޑުވާ މައްސަލައެއް ކަމަށް އާޔަތުﷲ ވިދާޅުވި އެވެ. 

ފާއިތުވި 50 އަހަރު ހިތާދޫ ރައްޔިތުން ކުރި އުއްމީދެއް ހަގީގަތަކަށް ހަދައިދިނީ އެމްޑީޕީ ސަރުކާރުންކަން ފާހަގަކުރައްވައި އާޔަތުﷲ ވިދާޅުވީ، ރައްޔިތުން ތަރައްގީ ބޭނުންވާ ކަމަށާއި، ރަށުގެ އުމްރާނީ ކުރިއެރުމަށް މަސައްކަތް ކުރާ ކަމަށެވެ. ނަމަވެސް އިގްތިސާދީ ފުދުންތެރި ބަޔަކަށް ވުމަށް ރައްޔިތުން ކުރަމުންދާ މަސައްކަތްތަކަށް ސަރުކާރުން ހުރަސް އަޅަމުންދާ ކަމަށް އޭނާ ވިދާޅުވި އެވެ. 

މިވީހާތަނަށް ވަރަށް ގިނަ ސަރުކާރުތަކުން ހުރީ ރާއްޖޭގެ އެކި ރަށްރަށުގެ އުމްރާނީ ތަރައްގީ އަށް ވަރަށް ބޮޑަށް އިހުމާލުވެފަ. ވަރަށް ބައިވަރު އިންފްރާސްޓަކްޗަރތަކެއް ނުކުރެވިފައި ހުރީ. އޭގެ ސަބަބުން ރަށުގެ އިގްތިސާދާ ރަށުގެ އާއްމު ހާލަތާއި މިހުރިހާ ކަމެއް ދިޔައީ ވަރަށް ބޮޑަށް ދަށަށް. އެކަމަކު އެމްޑީޕީން ފަށާފައި ހުރި ކަންތައްތައް ވަކިން ޚާއްސަކޮށް ފެނާއި ނަރުދަމާ އަޅުގަނޑު ހަމަ ވަރަށް ބޮޑަށް ފާހަގަކޮށްލަން ހިތާދޫއަކީ ވެސް. 25 އަހަރު ކަމަށް ބަލަމާ. ރައީސް މައުމޫނުގެ ދައުރުން ފެށިގެން ތި ނަރުދަމާއެއްގެ ވާހަކަ އެމީހުން ދައްކާ. އެކަމެއް ނުވޭ. އޭގެ ސަބަބުން ހިތާދޫގެ ފެން ވަނީ ވަރަށް ބޮޑަށް ތަގައްޔަރުވެފަ. އަޅުގަނޑު ހުދު އަމިއްލައަށް އެކަން ތަޖުރިބާ ކުރިން ކުރީގަ. ކޮންމެހެން ވަކި މީހަކަށް ބަދު ބަހެއް ބުނަނީއެއް ނޫން. ހިތާދޫ ފެނުގައި ހަގީގަތުގައި ފެން ވަރާއިރުގައި ހިރުވާ ގޮތްވޭ. އެހައި ބޮޑަށް ފެން ތަގައްޔަރުވެފައި. އެކަން ހައްލު ކޮށްދިނީ އެމްޑީޕީގެ ސަރުކާރުން. 

އެމްޑީޕީގެ ގައުމީ މަޖިލީހުގެ ހިތާދޫ ދާއިރާގެ ރައީސް އާޔަތުﷲ ހުސެއިން

ރައީސް ޑރ.މުހައްމަދު މުއިއްޒު އެރަށުގެ ތަރައްގީ އަށް ގިނަ ވައުދުތަކެއް ވެވަޑައިގެންނެވިކަން ފާހަގަކުރައްވައި އާޔަތުﷲ ވިދާޅުވީ މިހާތަނަށް އެއްވެސް ވައުދެއް ފުއްދާފައިނުވާ ކަމަށެވެ. 

އެގޮތުން އެރަށުގެ ސްކޫލުގައި މަލްޓިޕަރޕަސް ހޯލެއް ގާއިމް ކުރުމާއި، މާ މަޑުއްވަރި ކިޔާ ރަށް ކައުންސިލްއާ ހަވާލު ކުރުމާއި، ސިއްހީ މަރުކަޒު އިތުރަށް ތަރައްގީ ކުރުމާއި، ޕޮލިސް ސްޓޭޝަން ގާއިމް ކުރުމާއި، ބިން ހިއްކައި ގޮނޑުދޮށް ހިމާޔަތް ކުރުން ހިމެނޭ ކަމަށް އޭނާ ވިދާޅުވި އެވެ.