ކައުންސިލް އިންތިހާބު ކެމްޕޭނަށް އެމްޑީޕީގެ ލީޑަރޝިޕް އަތޮޅު ތެރެއަށް

ކުރިއަށް އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނަށް އެމްޑިޕީގެ ލީޑަރޝިޕްގެ ބޭފުޅުން އަތޮޅު ތެރެއަށް ފުރާވަޑައިގެންފި އެވެ.

އެމްޑީޕީގެ ޗެއަރޕާސަން އާއި އިސްކޮށް ހަރަކާތްތެރިވާ ބައެއް ބޭފުޅުން ހުކުރުދުވަހު ހެނދުނު ބ އަތޮޅުގެ ރަށްތަކަށް ވަނީ ފުރާވަޑައިގަންނަވާފަ އެވެ. އަދި އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް އާއި ރައްޔިތުން މަޖިލީހުގެ ބައެއް މެންބަރުން މިހާރުވެސް ބައެއް ރަށްރަށުގައި ދަނީ ކެމްޕެއިންގެ ހަރަކާތްތައް ކުރިއަށް ގެންދަމުންނެވެ. 

އެގޮތުން ބ. ތުޅާދޫ ހަރުގެ ހުޅުވުން ހުކުރު ދުވަހު ކުރިއަށް ދާއިރު ގދ. ގައްދޫ ގައި އެމްޑިޕީ ބޮޑު ދިދަ ނެގުމުގެ ހަރަކާތެއް ހުކުރު ދުވަހު ހެނދުނު ވަނީ ކުރިއަށް ގެންގޮސްފަ އެވެ.  އަދި މާލެ ސިޓީގެ ކައުންސިލް އިންތިޚާބަށް އެމްޑީޕީ އިން ނުކުންނަ ކެންޑިޑޭޓުންނާ އެކު ކުރީގެ ރައީސް އިބްރާހިމް މުހައްމަދު ސޯލިހް ވެސް ވަނީ ދޮރުން ދޮރަށް ހިންގަވައިފަ އެވެ. މި ހަރަކާތުގައި ކުރީގެ ރައީސް އިބްރާހިމް މުހައްމަދު ސޯލިހު ވަނީ އެމްޑީޕީގެ ކެންޑިޑޭޓުންނާ އެކު ގޭގެ އަށް ޒިޔާރަތް ކުރައްވާ އާންމުންގެ ގިނަ ބަޔަކާ ބައްދަލު ކުރައްވާފަ އެވެ.

އޭގެ އިތުރުން ހުކުރު ދުވަހު ހަވީރު މާލެ ސިޓީ އެމްޑީޕީގެ މޭޔަރު އާދަމް އާޒިމް އާއި އެކު ދޮރުންދޮރަށް ހަރަކާތް ކުރިއަށްދާނެ ކަމަށް އެމްޑީޕީ އިން ބުނެ އެވެ. އަދި ހުކުރު ދުވަހުގެ ރޭ އައްޑޫ ސިޓީގައި އެމްޑީޕީގެ ޖަލްސާއެއް ބާއްވަން ހަމަޖެހިފައިވާއިރު ހޮނިހިރު ދުވަހުގެ ރޭ ކުރީގެ ރައިސް އިބްރާހިމް މުހައްމަދު ސޯލިހް ބައިބެރިވެވަޑައިގަންނަވާ ޖަލްސާއެއް ށ. ފޯކައިދޫ ގައި ވެސް އޮންނާނެ ކަމަށް އެމްޑިޕީ އިން މައުލޫމާތުދެ އެވެ.