އީ-ވޯޓު މެދުވެރިކޮށް 2028 ގައި އިންތިހާބެއް ބާއްވައިފި ނަމަ ޖަހާ ފާހަގަ ވެސް ނުފެންނާނެ: މައުރޫފް
ރައީސް ޑރ. މުއިއްޒުގެ ރިޔާސީ ބަޔާނުގައި ހިމެނޭ ގިނަ ވާހަކަތަކަކީ ހަގީގަތާ ހިލާފު ދޮގުތަކެއް ކަމަށް ތުހުމަތުކުރައްވައި، ކެންދޫ ދާއިރާގެ މެންބަރު މައުރޫފް ޒާކިރު ސަރުކާރަށް ވަރަށް ބޮޑަށް ފާޑުވިދާޅުވި. ސަރުކާރުން އިންތިޚާބުތައް އެއްކޮށްލުމަށާއި އީ-ވޯޓިން ތައާރަފުކުރަން އުޅެނީ ރިޔާސީ ދައުރު ދަންމާލައި ވޯޓުލުމުގެ ހައްގަށް އަސަރުކުރާ ފަދަ ޚުދުމުޚުތާރު މަގަކުން ކަމަށް އޭނާ ވިދާޅުވި. އެހެންކަމުން ކުރިއަށް އޮތް ލޯކަލް ކައުންސިލް އިންތިޚާބަކީ ސަރުކާރުގެ މިފަދަ ސިޔާސަތުތަކަށް "ނޫނެކޭ" ބުނަން ލިބޭ ފުރުސަތެއްކަން އޭނާ ފާހަގަކުރެއްވި.
ކެންދޫ ދާއިރާގެ މެންބަރު މައުރޫފް ޒާކިރު | ރާއްޖެ އެމްވީ
އީ-ވޯޓެއް މެދުވެރިކޮށް 2028 ނުވަތަ 2030 ވަނަ އަހަރުގެ އިންތިޚާބެއް ބާއްވައިފި ނަމަ، ރައްޔިތުން ވޯޓު ކަރުދާހުގައި ޖަހާ ފާހަގަ ނުފެންނަ ހިސާބަށް ކަންކަން ގޮސްދާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
މައުރޫފް މިހެން ވިދާޅުވީ އިދިކޮޅު އެމްޑީޕީން ބޭއްވި "ހޭވައްލާ ތައްޔާރު" ޖަލްސާގައި ވާހަކަދައްކަވަމުންނެވެ.
މައުރޫފް ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހުގައި އިއްވެވި ރިޔާސީ ބަޔާނަކީ "ރިޔާސީ ބުހުތާނެއް" ކަމަށެވެ. އެމްޑީޕީގެ ޕާލިމެންޓްރީ ގުރޫޕުން ރައީސްގެ ބަޔާން ދިރާސާކުރިއިރު، އޭގައި ހިމެނޭ ވާހަކަތަކުގެ 90 އިންސައްތައަކީ ހަގީގަތާ ހިލާފު ދޮގު ވާހަކަތައްކަން ހާމަވެފައިވާ ކަމަށް އޭނާ ވިދާޅުވި އެވެ. އަދި ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުމަށްޓަކައި ރައީސް މުއިއްޒު ގެންދަވަނީ އާ ތާރީޚުތަކެއް ދީގެން ރައްޔިތުންގެ ލޮލުގައި އަނދުން އެޅުވުމަށް މަސައްކަތް ކުރައްވަމުން ކަމަށްވެސް މައުރޫފް ތުހުމަތު ކުރެއްވި އެވެ.
ރައީސް މުއިއްޒު ވެވަޑައިގެންފައިވާ ވައުދުތަކަށް ފާޑުވިދާޅުވަމުން މައުރޫފް ވިދާޅުވީ، 10 ރިޒޯޓު ތަރައްގީކޮށް ކޮންމެ ދިވެހި ރައްޔިތަކަށް އަހަރަކު 400 ޑޮލަރު ދޭނެ ކަމަށް ބުނާ ބުނުމަކީ ބުއްދިއަށް ގަބޫލުކުރެވޭނެ ކަމެއް ނޫން ކަމަށެވެ. ހަލާލު ޓޫރިޒަމްގެ ވާހަކަ ދައްކަވާއިރު، ރަލާއި އޫރުމަސް ނުވިއްކާ ހިންގާ ރިޒޯޓުތަކަކުން އެފަދަ އާމްދަނީއެއް ހޯދައިގެން ރައްޔިތުންނަށް ބަހާނެ ގޮތެއް ފަހުމް ނުވާ ކަމަށް އޭނާ ވިދާޅުވި އެވެ. ކޮންމެ ފުރުސަތެއް ލިބުނަސް ރައީސް ކުރައްވާ ކަމަކީ ރައްޔިތުންނަށް އޮޅުވާލުމަށް ދޮގު ހެއްދެވުން ކަމަށްވެސް މައުރޫފް ވިދާޅުވި އެވެ.
ވިދާޅުވީ، 10 ރިޒޯޓް ހަދާފައި، އަހަރަކު 400 ޑޮލަރު ދޭނަމޭ، މި ބޭފުޅާއަކީ ޙަލާލު ޓޫރިޒަމްގެ ވާހަކަ ވެސް ދެއްކެވި ވަރަށް ބޮޑަށް. އަޅުގަނޑު ހިތަށްއަރަނީ، މި ބޭފުޅާ މި ހައްދަވާ ރިޒޯޓުތަކުގައި ހަމަގައިމުވެސް ރަލާއި އޫރުމަހެއް ނުވިއްކާނެއޭ. ނުވިއްކާ، ދިވެހި ރިޒޯޓް ހަދާ ކޮންމެ ދިވެހި ރައްޔިތަކަށް އެއިން ހަތަރު ސަތޭކަ ޑޮލަރު ދޭނެ ގޮތެއް އަޅުގަނޑުގެ ބުއްދިއަކަށެއް ފަހުމެއްނުވޭ. ކޮންމެ އިންތިޚާބަކާ ދިމާކޮށް، ކޮންމެ ޕޯޑިއަމެއް ލިބުނަސް، ކޮންމެ މައިކެއް ލިބުނަސް، ކޮންމެ މުނާސަބަތްގައިވެސް މީނާއަށް ފުރުޞަތު ލިބިއްޖިއްޔާމުން ކުރާ ކަމަކީ، ރައްޔިތުންނަށް އޮޅުވާލުމަށްޓަކައި ދޮގެއް ހަދަނީ. ދޮގުހަދަމުން، ހަދަމުންގޮސް ދޮގު އެއީ، ތެދެއްހެން ހީވާ މިންވަރަށް މީނާ މި ދަނީ ދޮގުހަދަމުން.ކެންދޫ ދާއިރާގެ މެންބަރު މައުރޫފް ޒާކިރު
މައުރޫފް އިތުރަށް ވިދާޅުވީ، ރައީސް މުއިއްޒު ވެރިކަމުގައި މާ ގިނަ ދުވަހު ބަހައްޓައިފި ނަމަ، ރައްޔިތުންނަށް ލިބިފައިވާ ވޯޓުލުމުގެ ހައްގު ގެއްލިގެން ހިނގައިދާނެ ކަމަށެވެ. ކުރިއަށް އޮތް ކައުންސިލް އިންތިޚާބަކީ ރައީސް މުއިއްޒުގެ ސިޔާސަތުތަކަށް "ނޫނެކޭ" ބުނަން ލިބޭ ހަނި ފުރުސަތެއްކަން ފާހަގަކުރައްވައި، މި އިންތިޚާބުގައި ނުބައިކޮށް ވޯޓު ދެވިއްޖެ ނަމަ، މިއީ ރައްޔިތުން ޖަހާ ފާހަގަ ފެންނާނެ އެންމެ ފަހު އިންތިޚާބަށް ވުމީ އެކަށީގެންވާ ކަމެއް ކަމަށް އޭނާ ވިދާޅުވި އެވެ.
އަޅުގަނޑު މި ދަންނަވާ ވާހަކައަކީ، އީ-ވޯޓެއް މެދުވެރިކޮށް، 2028 ނުވަތަ 2030 ގައި އިންތިޚާބަކަށް ގޮސްފި ކަމުގައި ވާނަމަ، އަޅުގަނޑުމެންނަކަށް އަޅުގަނޑުމެންގެ ޖަހާ ފާހަގައެއް ނުފެންނާނޭ. މި ކައުންސިލް އިންތިޚާބަކީ ފަހަރުގައި އަޅުގަނޑުމެންނާ ނުބައިކޮށް ވޯޓު ޖެހިއްޖެ ކަމުގައި ވާނަމަ، އަޅުގަނޑުމެން ޖަހާ ފާހަގަ އަޅުގަނޑުމެންނަށް ފެންނަ އެންމެ ފަހު އިންތިޚާބު ވުމީ އެކަށީގެންވާ ކަމެއް. ބައްލަވާ! އޭނާގެ ބޮޑާކަމާއި، އެހެރަ ކިބުރުވެރިކަމެއްގައި ދައްކާ ވާހަކައާއި، އޭނާގެ ސިފަހުރި ގޮތް، ރައްޔިތުންނަށް މުޚާޠަބުކޮށް ވާހަކަދައްކަމުންދާއިރު ހީވަނީ ޖެއްސުމަށް ވާހަކަދައްކާހެން ރައްޔިތުންނަށް މަލާމާތްކޮށްފައި، މިހެން ހަދާނަމޭ، މިހެން ކުރާނަމޭ، ދެން ތިބޭފުޅުން ތިބެއްޖެހޭނީ ބުނާ ކަހަލަ އަޅުގަނޑުމެން މިއަދު މަޖިލީހުގައި އަޑުއަމުންދިޔައިރުގައި، މަޖިލީހުގެ ރައީސަށް ވެސް އަންގަނީތައް މި މީހުން ނެރެލައި، ފަހަތަށް އެނބުރިލާފައި ނެރެލާށޭ. ދެންނެވީމާ، އަޅުގަނޑުމެންގެ އެމް.ޑީ.ޕީގެ ޕާލިމެންޓްރީ ގްރޫޕް މެންބަރުންގެ ނަން އިއްވާފައި ނެރެންފައި ހުރީ. މި ލެވެލްގެ ބާރުވެރިކަމެއްގައި އޭނަ އަމިއްލައަށް ގަބޫލުކުރާ ކަހަލަ ތިމަންނާއަކީ ރަސްކަލެކޭ.ކެންދޫ ދާއިރާގެ މެންބަރު މައުރޫފް ޒާކިރު
ސަރުކާރުން އިންތިޚާބުތައް އެއްކޮށްލުމަށާއި ޚަރަދު ކުޑަކުރުމުގެ ނަމުގައި ރިފަރެންޑަމެއް ގެންނަން އުޅެނީ ރިޔާސީ ދައުރު ދަންމާލުމުގެ ބޭނުމުގައި ކަމަށް މައުރޫފް ތުހުމަތު ކުރެއްވި އެވެ. އަދި ރައީސް މުއިއްޒު އަމަލުކުރައްވަނީ ޚުދުމުޚުތާރު ރަސްކަލެއް ފަދައިން ކަމަށާއި، ދައުލަތުގެ މުއައްސަސާތައް ބަދަލުކުރަމުން ދަނީ އެ މަގަށް ކަމަށްވެސް އޭނާ ވިދާޅުވި އެވެ. މަޖިލީހުގެ ތަޅުމުގައި މެންބަރުންނާ މުޚާތަބު ކުރައްވާއިރުވެސް ރައްޔިތުންނަށް މަލާމާތްކޮށް ޖެއްސުން ކުރާ ފަދަ ރޫހެއް ރައީސްގެ ކިބައިން ފެންނަ ކަމަށް މައުރޫފް ވިދާޅުވި އެވެ.
