އައްޑޫ ރައްޔިތުން އެމްޑީޕީ އަށް ވޯޓުދޭންވީ އައްޑޫގެ ރައްޔިތުން ތާއަބަދު ގުނބޯހެއްދުމަށް ސަރުކާރަށް ފުރުސަތު ނުލިބޭނެކަން ދައްކަން: ޝުއާއު
ސަރުކާރުން އައްޑޫގެ ތަރައްގީ އަށް އިހުމާލުވެ، ބިންތައް ފޭރިގަނެ، އިގްތިސާދާއި މަގު ހެދުމުގެ މަޝްރޫއުތައް ހުއްޓުވާފައިވާ ކަމަށް ވިދާޅުވެ ޑެޕިއުޓީ މޭޔަރު މުހައްމަދު ޝުއާއު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ.
ޑެޕިއުޓީ މޭޔަރ އަދި ޑެޕިއުޓީ މޭޔަރ ކެނޑިޑޭޓް މުހައްމަދު ޝުއާއު އައްޑޫ ސިޓީގައި އޮތް އެމްޑީޕީގެ ޖަލްސާ ގައި ވާހަކަ ދައްކަވަނީ. | ރާއްޖެ އެމްވީ
ކުރިއަށް އޮތް ކައުންސިލް އަދި ޑަބްލިއުޑީސީ އިންތިޚާބުގައި އައްޑޫ ރައްޔިތުން އެމްޑީޕީ އަށް ވޯޓުދޭންވީ އައްޑޫގެ ރައްޔިތުން ތާއަބަދު ގުނބޯހެއްދުމަށް ސަރުކާރަށް ފުރުސަތު ނުލިބޭނެކަން ދައްކަން ކަމަށް ޑެޕިއުޓީ މޭޔަރ މުހައްމަދު ޝުއާއު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީ އިން އައްޑޫގައި ހުކުރު ދުވަހުގެ ރޭ ބޭއްވި ހޭވައްލާތައްޔާރު ޖަލްސާގައި ވާހަކަދައްކަވަމުންނެވެ. އައްޑޫގެ މަގު ހެދުމުގެ ބަދަލުގައި ޕާޓީގެ މަސައްކަތް ކުރުމަށް ސަރުކާރު މުވައްޒަފުން ބޭނުން ކުރަމުންދާ ކަމަށް ފާހަގަކުރައްވާ ޝުއާއު ވަނީ ރޯމާ ދުވާލު މި ސަރުކާރުން ވައްކަން ކުރަމުންދާ ކަމަށް ވިދާޅުވެފަ އެވެ.
އޭނާ ވިދާޅުވީ އައްޑޫގެ ކުރިމަގަށްޓަކާ އުންމީދު ކުރާ މީހެއްގެ ހައިސިއްޔަތުން މިދިޔަ ދޮޅު އަހަރު އައްޑޫގެ ކަންކަން ދިޔަ ގޮތާއި މެދު އައްޑޫގެ ރައްޔިތުން ވިސްނާލަން ޖެހޭ ކަަމަށެވެ. މި ސަރުކާރުން ވަނީ އައްޑޫ އާއި މެދު ބޮޑު ތަނުން އިހުމާލު ވެފައިކަމަށް އޭނާ ވިދާޅުވި އެވެ. މީގެ އިތުރުން އައްޑޫގެ މަގު ހެދުމުގެ މަސައްކަތް ހުއްޓިފައިވާ ކަމަށާއި އައްޑޫގެ އިގްތިސާދު ވެސް އޮތީ ހުއްޓުވާފައި ކަމަށް އޭނާ ވިދާޅުވި އެވެ.
އިދާރީ މިނިވަންކަން އޮތީ ހުއްޓުވާފައި. އަހަރުމެންގެ ބިން އޮތީ ފޭރިގަނެފައި. ސަރުކާރުގެ އަޅުންނަށް އަދުގެ މަޖިލިސް މެމްބަރުން ހަދާފައި އެ ވަނީ. މިއަދު އެމްޑީޕީ ހޮވާދޭން މަސައްކަތް ކުރަންވީ އަޅުވެތިކަމަށް ނޫނެކޭ ބުނަން. ތާއަބަދު ގުނބޯ ހައްދަން ފުރުސަތު ނުދޭނެކަން އަންގަން.ޑެޕިއުޓީ މޭޔަރ މުހައްމަދު ޝުއާއު
މިއީ އެކަތިގަނޑެއްގެ ގޮތުގައި އެމްޑީޕީ އިން މަސައްކަތް ކުރަން ޖެހޭ ވަގުތު ކަމަށް ޝުއާއު ވިދާޅުވި އެވެ. ކުރިއަށް އޮތް ކައުންސިލް އިންތިޚާބުގައި އަޅުވެތިކަމާއި ފޭރުމަށް ނޫނެކޭ ބުނުމަށް އެމްޑީޕީގެ ކެނޑިޑޭޓުންނަށް ވޯޓުދޭން ޖެހޭ ކަމަށް ޝުއާއު ވިދާޅުވި އެވެ. ޝުއާއު ވިދާޅުވީ މިހާރު ދިމާވެފައިވާ ބިރުވެރިކަމުން އަރައިގަނެވޭނެ ގޮތަކީ އެއީ ކަމަށެވެ. އައްޑޫގެ ކަންކަން ނިންމަން އައްޑޫ އަށް ފުރުސަތު ލިބެން ޖެހޭ ކަމަށް އޭނާ ވަނީ ވިދާޅުވެފަ އެވެ.
ރައްޔިތުންގެ ހައްގުގައި ބަސް ބުނާނެ ޕާޓީ އަކީ އެމްޑީޕީ ކަމަށާއި ރައްޔިތުންނަށްޓަކާ ފައިދާ ވާނެ ސިޔާސަތުތައް ހުރީ އެމްޑީޕީގެ ކަމަށް ވެސް ޝުއާއު ވިދާޅުވި އެވެ. އައްޑޫ އަށް އެންމެ ރަނގަޅު ގޮތަކީ އެމްޑީޕީގެ ކައުންސިލެއް އޮތުން ކަމަށް އޭނާ ވަނީ ފާހަގަކުރައްވާފަ އެވެ.
