ރައީސް މުއިއްޒުގެ ރިޔާސީ ބަޔާނަކީ އަވާމެންދުރެއް ފަދަ އެއްޗެއް، ރިޔާސީ ބަޔާނަށް ދޮގުބަޔާނޭ ރައްޔިތުން ކިޔަން ފަށައިފި: އެމްޑީޕީގެ ރައީސް ޝާހިދު

ރައީސް ޑރ. މުހައްމަދު މުއިއްޒުގެ ރިޔާސީ ބަޔާނަކީ އަވާމެންދުރެއް ފަދަ އެއްޗެއް ކަމަށާއި، ރިޔާސީ ބަޔާނަށް ދޮގުބަޔާނޭ ރައްޔިތުން ކިޔަން ފަށައިފި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

މި އަހަރަށް ރައްޔިތުންގެ މަޖިލީސް ހުޅުއްވައިދެއްވަމުން ބުރާސްފަތި ދުވަހު މުއިއްޒު އިއްވެވި 3 ގަޑީއިރުގެ ދިގު 3 ވަނަ ރިޔާސީ ބަޔާނަށް ވަރަށް ބޮޑަށް ފާޑު ވިދާޅުވެ، ކުރީގެ ޚާރިޖީ ވަޒީރު ޝާހިދު ވިދާޅުވީ، ރައީސް މުއިއްޒުގެ މި ހިނގާ ރިޔާސީ ދައުރުގައި މި އިއްވެވި ރިޔާސީ ބަޔާން ވެސް ފާހަގަވެގެން މިދިޔައީ، ފާއިތުވެދިޔަ 2 ރިޔާސީ ބަޔާނެކޭ އެއްފަދަ، އަވާމެންދުރެއް ފަދަ ރިޔާސީ ބަޔާނެއްގެ ގޮތުގައި ކަމަށެވެ. އޭގެ އިތުރުން ޝާހިދު ވިދާޅުވި ގޮތުގައި މުއިއްޒު ގެ ރިޔާސީ ބަޔާން ސިފަ ކުރެެވެނީ "ނަނާ ހުވަފެނެއްގެ ގޮތުގަ އެވެ.

"މިއަދުގެ ރިޔާސީ ބަޔާން އޮތީ، އިންތިޚާބެއް ބޯމަތިވެފަ އޮތީތީ ރައްޔިތުންނަށް ދެއްކެވި ނަނާ ހުވަފެނެއްގެ ގޮތުގައި."

ޝާހިދު ވިދާޅުވީ، ފާއިތުވެދިޔަ 2 އަހަރުގެ ރިޔާސީބަޔާނުގައި ވަޢުދު ވެވަޑައިގެންނެވި އެއްވެސްކަމެއް ކުރެވިފައި ނެތް އިރު އެ ވަޢުދުތައް ވަޅުލައި ކަފުންކޮށްފައި، އިތުރު ދޮގުތަކެއް ރައްޔިތުންގެ ކުރިމަތީ ހާމަ ކުރެއްވުމަކީ ރައްޔިތުން އަގެއްނެތް ބަޔަކަށް މުއިއްޒު ހެއްދެވުން ކަމުގަ އެވެ.

"މިއަދުގެ ޙަޤީޤަތަކީ ފަތު އަޑުކިޔާފައި ތަކެތީގެ އަގު އުފުލެމުން ދިއުން. ޑޮލަރުގެ އަގު އަތް ނުފޯރާފަށަށް އުފުލި، ވިޔަފާރިތައް އިނދަޖެހި، އިޤްތިޞާދު ފާލުން ނެއްޓި، މުޅި ޤައުމަށް ކުރިމަތިވެފައިވާ ގިލަންވެރިކަމަށް އެއްވެސް ހަލެއް ފެންނަންނެތުން،" ކަމަށް ޝާހިދު ވިދާޅުވި އެވެ.

ރައްޔިތުންގެ އުދާސްތަކަށް ތަސައްލީއެއް ނުލިބޭ ކަމަށާއި، ރިޔާސީ ބަޔާނުން ރައްޔިތުންގެ އުދާސް ތަކަށް ތަސައްލީއެއް ލިބުމުގެ ބަދަލުގައި ލިބުނީ ނާއުއްމީދާއި މާޔޫސްކަން ކަމަށް ވެސް ޝާހިދު ވިދާޅުވި އެވެ.