ދުނިޔެ އޮތީ ނުރައްކާތެރި ހާލަތެއްގައި، ހަނގުރާމައެއްގެ ތެރެއަށް ވަންނަން ބޭނުމެއް ނޫން: މެޑްވެޑޭވް

ދުނިޔެ މިހާރު އޮތީ ވަރަށް ނުރައްކާތެރި ފައްތަރެއްގައި ކަމަށާއި، ނަމަވެސް ބައިނަލްއަޤުވާމީ ބޮޑު ހަނގުރާމައެއްގެ ތެރެއަށް ވަންނަން ރަޝިޔާ އިން ބޭނުން ނުވާ ކަމަށް އެ ޤައުމުގެ ސެކިއުރިޓީ ކައުންސިލްގެ ޑެޕިއުޓީ ޗެއާމަން ޑިމިޓްރީ މެޑްވެޑޭވް ވިދާޅުވެއްޖެ އެވެ. 

ރަޝިޔާގެ ވެރި ރަށް މޮސްކޯގެ ބޭރުގައި ހުންނަ އޭނާގެ ރަސްމީ ގެކޯލުގައި ރޮއިޓާސް އާއި، ރަޝިޔާގެ ތާސް ނިއުސް އެޖެންސީގެ އިތުރުން، ވޯގޮންޒޯ ބްލޮގަރަށް ދެއްވި ބަސްދީގަތުމެއްގައި މެޑްވެޑޭޒް ވިދާޅުވީ، ދުނިޔޭގެ މަސްރަހު މިހާރު އޮތީ ނުރައްކާތެރި ޙާލަތެއްގައި ކަމަށެވެ. އަދި ކުރިމަތިވަމުންދާ ގޮންޖެހުން ތަކަށް ކެތް ކުރުމުގެ ޤާބިލުކަން، ނުވަތަ "ޕެއިން ތުރޯޝްހޯލްޑް" ދަށްވަމުންދާ ކަމަށް ވެސް އޭނާ ފާހަގަ ކުރެއްވި އެވެ. 

މީގެ ކުރިން ރަޝިޔާގެ ރައީސް ކަމާއި، ބޮޑު ވަޒީރުކަން ވެސް ކުރައްވާފައިވާ މެޑްވެޑޭވް ވިދާޅުވީ، ރަޝިޔާ އަކީ ދުނިޔޭގެ ފެންވަރުގެ ބޮޑު ހަނގުރާމައެއް ނުވަތަ، ގްލޯބަލް ކޮންފިކްޓަކަަށް ޝައުޤުވެރިވާ ޤައުމެއް ނޫން ކަމަށެވެ. އަދި ރަޝިޔާގެ ވެރިންނަކީ މޮޔައިންނެއް ނޫން ކަމަށާއި، ބައިނަލްއަޤުވާމީ ބޮޑު ކުރިމަތިލުމަކަށް ބޭނުން ވާނީ ކޮން ބައެއްތޯ އޭނާ ވަނީ ސުވާލު އުފައްދަވައިފަ އެވެ. ހަމަ އެއާ އެކު، މިއީ މީގެ ކުރިން ވެސް އެތައް ފަހަރެއްގެ މަތިން ރަޝިޔާ އިން ދައްކާފައިވާ ވާހަކަ ތަކެއް ކަމަށް ވެސް އޭނާ ވަނީ ހަނދާން ކޮށްދެއްވައިފަ އެވެ. 

ނަމަވެސް، މިހާާރު ދުނިޔޭގައި ކަންކަން ހިނގަމުންދާ ގޮތަށް ބަލާއިރު، ބައިނަލްއަޤުވާމީ ބޮޑު ހަނގުރާމައެއް ފެށުމުގެ ފުރުސަތު އެއްކޮށް ނެތް ކަމަށް ބުނާނެ ޖާގައެއް ނެތް ކަމަށް މެޑްވެޑޭވް ވިދާޅުވެފައިވެ އެވެ. އޭނާ ވިދާޅުވީ، ހިތާމަޔަކީ އެފަދަ ބޮޑު ކުރިމަތިލުމެއް އައުމުގެ ފުރުސަތު އޮތްކަން ޤަބޫލު ކުރަން ޖެހުން ކަމަށެވެ. 

މެޑްވެޑޭވް މިފަދައިން ވާހަކަ ދައްކަވާފައި މި ވަނީ ޔޫކްރެއިންގެ ހަނގުރާމައާ ގުޅިގެން ހުޅަނގުގެ ޤައުމު ތަކާއި، ރަޝިޔާއާ ދެމެދު އޮތް ގުޅުން އިންތިހާ އަށް ގޯސްވެފައިވާ ވަގުތެއްގަ އެވެ. ރަޝިޔާ އިން ޔޫކްރެއިންގެ ހަނގުރާމަ ފެށީއްސުރެ، މެޑްވެޑޭވް ގެންދަވަނީ ހުޅަނގުގެ ޤައުމު ތަކަށް އިންޒާރު ދެއްވަމުންނެވެ.