ރަޝިޔާގެ ޖާސޫސީ އިދާރާގެ ވެރިޔާގެ ނައިބަށް ބަޑިން ހަމަލާދީ ޒަޚަމްކޮށްލައިފި
ރަޝިޔާގެ އަސްކަރީ ޖާސޫސީ އިދާރާ (ޖީ.އާރް.ޔޫ) ގެ ޑެޕިއުޓީ ހެޑް ލެފްޓިނެންޓް ޖެނެރަލް ވްލަޑިމިއަރ އެލެކްސީވް އަށް މޮސްކޯގައި ބަޑިން ހަމަލާދީ ޒަޚަމްކޮށްލުމާ ގުޅިގެން ހޮސްޕިޓަލުގައި ފަރުވާދޭން ފަށައިފި. ޔޫރަޕިއަން ޔޫނިއަނުން ދަތިކުރުމުގެ ފިޔަވަޅު އަޅާފައިވާ މި އޮފިސަރަކީ ޔޫކްރެއިން ހަނގުރާމަ ފެށުނު ފަހުން މޮސްކޯގައި ހަމަލާއެއް އަމާޒުވި އަސްކަރިއްޔާގެ އެންމެ އިސް އެއް ވެރިޔާ.
ހަމަލާ އަމާޒުވި ލެފްޓިނަންޓް ޖެނެރަލް ވްލަޑިމިއަރ އެލެކްސީވް. | ރަޝިޔާ ޑިފެންސް މިނިސްޓްރީ
ރަޝިޔާގެ އަސްކަރިއްޔާގެ އިސް ޖެނެރަލަކަށް މޮސްކޯގައި ބަޑިން ހަމަލާދީ ޒަޚަމްކޮށްލައިފި އެވެ.
މޮސްކޯގެ ހުޅަނގު އުތުރު ސަރަހައްދެއްގައި ހުންނަ މީހުން ދިރިއުޅޭ އިމާރާތެއްގެ ތެރޭގައި ދިން މި ހަމަލާއާ ގުޅިގެން، ލެފްޓިނެންޓް ޖެނެރަލް ވްލަޑިމިއަރ އެލެކްސީވް ވަނީ ވަގުތުން ހޮސްޕިޓަލަށް ގެންގޮސްފަ އެވެ. ނަމަވެސް އޭނާގެ ހާލަތާ ގުޅޭ އެއްވެސް ތަފްސީލެއް އަދި މިހާތަނަށް އެނގިފައެއް ނުވެ އެވެ.
އެލެކްސީވް އަކީ ރަޝިޔާގެ އަސްކަރީ ޖާސޫސީ އިދާރާ، ޖީ.އާރް.ޔޫގެ ދެވަނައަށް އެންމެ އިސްވެރިޔާ އެވެ.
މީގެ ގާތްގަނޑަކަށް ހަތަރު އަހަރު ކުރިން ރަޝިޔާ އިން ޔޫކްރެއިން ގައި ހަނގުރާމަ ފެށިފަހުން، މޮސްކޯގައި ހަމަލާގެ އަމާޒަކަށްވި ރަޝިޔާ އަސްކަރިއްޔާގެ އެންމެ އިސް އޮފިސަރުންގެ ތެރޭގައި އޭނާ ހިމެނެ އެވެ.
2018 ވަނަ އަހަރު އިނގިރޭސިވިލާތުގެ ސަލިސްބަރީގައި ނާރވް އެޖެންޓް ނުވަތަ ވިހަ ގޭސް ބޭނުންކޮށްގެން ދިން ހަމަލާގެ ފަހަތުގައި ރަޝިޔާގެ އަސްކަރިއްޔާ ވާކަމަށް ތުހުމަތުކޮށް، ޔޫރަޕިއަން ޔޫނިއަން (އީ.ޔޫ) އިން ވަނީ އެލެކްސީވް އާ ދެކޮޅަށް ދަތިކުރުމުގެ ފިޔަވަޅުތައް އަޅާފަ އެވެ.
