ށ. މާއުނގޫދޫ ޔޫތު އެސޯސިއޭޓް، ކުޑަކުއްޖެއްގެ ކަރުގައި ހިފި މައްސައެއް ފުލުހުން ތަހުގީގު ކުރަނީ
މި މައްސަލައިގެ މައުލޫމާތު އެނގޭ ފަރާތެއް ރާއްޖެ އެމްވީ އަށް މައުލޫމާތު ދެއްވަމުން ބުނީ، މި މާރާމާރީގައި 16 އަހަރު ކުއްޖާގެ ކަރުގައި މުހައްމަދު ނާޒިމް ހިފުމުގެ ސަބަބުން، އަނިޔާގެ ނިޝާން ކުއްޖާގެ ކަރުމަތިން ފާހަގަވާކަމުގަ.
ށ. މާއުނގޫދޫ | އެމްޓީސީސީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ށ. މާއުނގޫދޫ ޔޫތު އެސޯސިއޭޓްގެ މަގާމަށް އައްޔަނުކުރައްވާފައިވާ މުހައްމަދު ނާޒިމް، 16 އަހަރުގެ ކުޑަކުއްޖަކަށް އަނިޔާކޮށް މާރާމާރީ ހިންގި ކަމަށް ތުހުމަތު ކުރެވޭ މައްސަލައެއް ފުލުހުން ތަހުގީގު ކުރަން ފަށައިފި އެވެ.
މި ހާދިސާއާ ގުޅިގެން ފުލުހުންގެ މީޑިއާ އޮފިޝަލް "ރާއްޖެ އެމްވީ" އަށް މައުލޫމާތު ދެއްވަމުން ވިދާޅުވީ، މާއުނގޫދޫ ގައި 16 އަހަރުގެ ފިރިހެން ކުއްޖެއްގެ ގައިގައި ޖަހައި މާރާމާރީ ހިންގާފައިވާ މައްސަލައެއް ފެބްރުއަރީ މަހުގެ 4 ވަނަ ދުވަހުގެ ރޭ ފުލުހުންނަށް ހުށަހަޅާފައިވާ ކަމަށެވެ. މި މާރާމާރީގައި އަނިޔާވި ކުއްޖާއަށް މާއުނގޫދޫ ހޮސްޕިޓަލަށް ގެންގޮސް ފަރުވާ ދީފައިވާ ކަމަށް ވެސް ފުލުހުން މައުލޫމާތު ދީފައިވެ އެވެ.
މި މައްސަލައިގެ ތަފްސީލް އެނގޭ ފަރާތަކުން "ރާއްޖެ އެމްވީ" އަށް ކިޔައިދިން ގޮތުގައި، މުހައްމަދު ނާޒިމް އެ ކުއްޖާއަށް ހަމަލާދީފައިވަނީ ކަރުގައި ހިފައިގެން ކަމަށާއި، އެކަމުގެ ސަބަބުން ކުއްޖާގެ ކަރުމަތީގައި އަނިޔާގެ ނިޝާންތައް ފާޅުވާން ހުރި ކަމަށެވެ. ނަމަވެސް، މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެފައިވެ އެވެ.
މި މައްސަލައިގައި ތުހުމަތު ކުރެވޭ މުހައްމަދު ނާޒިމަކީ މި ސަރުކާރުގެ ނުފޫޒުގަދަ ފަރާތްތަކާ ގާތް ގުޅުމެއް އޮންނަ ފަރާތަކަށް ވުމުން، މި މައްސަލަ އިންސާފުވެރިކަމާއެކު ކުރިއަށްދާނެ ކަމުގެ މާބޮޑު އުއްމީދެއް ނެތް ކަމަށް އެ ރަށުން މައުލޫމާތު ދިން ފަރާތުން ބުނެފައިވެ އެވެ.
މި ސަރުކާރުގެ ސިޔާސީ މަގާމުތަކުގައި ތިއްބަވާ ފަރާތްތަކުން ހިންގާ އެކި ބާވަތުގެ ކުށްތަކަށް، ކަމާބެހޭ މުއައްސަސާތަކުން ފިޔަވަޅު ނާޅާކަމުގެ ޝަކުވާ އާންމުންގެ މެދުގައި ވަނީ ބޮޑުވެފަ އެވެ. މި މައްސަލަ ފުލުހުން މިހާރު ދަނީ އިތުރަށް ތަހުގީގު ކުރަމުންނެވެ.
