އެމެރިކާގެ ވައިޓް ހައުސްގެ ޗީފް އޮފް ސްޓާފް ސޫޒީ ވައިލްސްގެ ކަމަށް ހެދިގެން އުޅުނު މީހަކާ އިނގިރޭސި ބޮޑުވަޒީރަށް މެސެޖުތަކެއް ބަދަލުކުރެއްވިއްޖެ
17 އޯގަސްޓު 2026 | ހޯމަ 18:47އެމެރިކާގެ ވައިޓް ހައުސްގެ ޗީފް އޮފް ސްޓާފް ސޫޒީ ވައިލްސްގެ ނަމުގައި އޮޅުވާލައިގެން މެސެޖުކުރި މީހަކާ އިނގިރޭސި ބޮޑުވަޒީރު އެންޑީ ބާންހަމް މުއާމަލާތް ކުރެއްވި މައްސަލައެއް ފެންމަތިވެއްޖެ. މި ހާދިސާ ސީރިއަސް މައްސަލައެއްގެ ގޮތުގައި ބަލަމުންދާއިރު، މީގެ ކުރިންވެސް އިނގިރޭސިވިލާތުގެ އިސް ސިޔާސީ ބޭފުޅުންނަށް މިފަދަ އޮޅުވާލުންތަކާ ކުރިމަތިލާން ޖެހިފައިވޭ
އިނގިރޭސިވިލާތުގެ ބޮޑުވަޒީރުކަމުގެ މަގާމަށް އަލަށް އައްޔަންކުރި އެންޑީ ބާންހަމް | ރޮއިޓާސް
އިނގިރޭސިވިލާތުގެ އާ ބޮޑުވަޒީރު އެންޑީ ބާންހަމް، އެމެރިކާގެ ވައިޓް ހައުސްގެ ޗީފް އޮފް ސްޓާފް ސޫޒީ ވައިލްސްގެ ކަމަށް ހެދިގެން އުޅުނު މީހަކާ މެސެޖުތަކެއް ބަދަލުކުރެއްވިއްޖެ ކަމަށް ބައެއް މީޑިއާތަކުން ހޯމަ ދުވަހު ރިޕޯޓުކޮށްފި އެވެ.
ނަން ހާމަނުކުރާ މަސްދަރުތަކާ ހަވާލާދީ މި ޚަބަރު އެންމެ ފުރަތަމަ ރިޕޯޓުކުރި "ޕޮލިޓިކޯ" އިން ބުނި ގޮތުގައި، ބޮޑުވަޒީރު ބާންހަމް ވަނީ ސޫޒީ ވައިލްސް ކަމަށް ހީކޮށް، ވަކި ސިއްރު މުއާސަލާތީ ވަސީލަތެއް މެދުވެރިކޮށް އެ މީހާއަށް "މެސެޖުތަކެއް" ފޮނުއްވާފަ އެވެ. ނަމަވެސް، ކުޑަވަގުތުކޮޅެއްގެ ތެރޭގައި އެއީ އޮޅުވާލުމެއް ކަމަށް ބޮޑުވަޒީރަށް ޝައްކުކުރެވުނެވެ.
މި ހާދިސާއަކީ ސީރިއަސް މައްސަލައެއްގެ ގޮތުގައި ބަލައި، ވޮޝިންޓަންގައި ހުންނަ އިނގިރޭސި އެމްބަސީން މިކަން ވައިޓް ހައުސްގެ ސަމާލުކަމަށް ގެނެސްފައިވާ ކަމަށް ޕޮލިޓިކޯއަށް މައުލޫމާތު ދިން ދެ މަސްދަރަކުން ކަށަވަރުކޮށްދެ އެވެ.
މި މެސެޖުތައް ބަދަލުކުރި ވަކި ތާރީޚެއް ނުވަތަ އެ މެސެޖުތަކުގައި ދެކެވުނު ވާހަކަތަކުގެ ތަފްސީލެއް އަދި މިހާތަނަށް އެނގިފައެއް ނުވެ އެވެ.
އެންޑީ ބާންހަމް އިނގިރޭސި ބޮޑުވަޒީރުކަމުގެ މަގާމާ ހަވާލުވެވަޑައިގަތީ، ލޭބަރ ޕާޓީގެ ކުރީގެ ލީޑަރު ކިއަރ ސްޓާމަރއަށް ފަހު، ޖުލައި މަހުގެ 20 ވަނަ ދުވަހު އެވެ.
މި ހާދިސާއާ ގުޅިގެން ބޮޑުވަޒީރުގެ އޮފީސް، ޑައުނިންގ ސްޓްރީޓްގެ ތަރުޖަމާނަކު ވިދާޅުވީ، ގައުމީ ސަލާމަތާ ގުޅުންހުރި ކަންކަމުގައި އެ އޮފީހުން ކޮމެންޓް ނުކުރާނެ ކަމަށެވެ. ނަމަވެސް، އެފަދަ މެސެޖުތަކެއް ބަދަލުކުރެވުނު ކަމަށް ބުނާ ވާހަކަ އޭނާ ދޮގެއް ނުކުރައްވަ އެވެ.
މިފަދަ އޮޅުވާލުމެއްގެ ޝިކާރައަކަށްވި އިނގިރޭސިވިލާތުގެ ފުރަތަމަ އިސް ސިޔާސީ ޝަޚުސިއްޔަތަކީ ބާންހަމްއެއް ނޫނެވެ.
2024 ވަނަ އަހަރު، ޔޫކްރެއިންގެ ކުރީގެ ރައީސް ޕެޓްރޯ ޕޮރޮޝެންކޯ ކަމަށް ހެދިގެން މީހަކު ވަނީ، އޭރުގެ އިނގިރޭސި ޚާރިޖީ ވަޒީރު ޑޭވިޑް ކެމަރަންއަށް ފޯނުން ގުޅައި އޮޅުވާލާފަ އެވެ. އެ ހާދިސާގެ ވީޑިއޯއެއް އިނގިރޭސި ސަރުކާރުން ވަނީ އާންމުކޮށްފަ އެވެ.
އެ ހާދިސާ ހިނގި ދުވަސްވަރު އިނގިރޭސި ޚާރިޖީ ވުޒާރާއިން ބުނެފައިވަނީ، އެކަން އާންމުކުރީ އެކަން ކުރި ބަޔަކު އެ ވީޑިއޯ ބޭނުންކޮށްގެން އޮޅުވާލުމެއް ނުވަތަ ނުބައި މައުލޫމާތެއް ފެތުރުމުގެ ފުރުސަތު ނުދިނުމަށްޓަކައި ކަމަށެވެ.
