އީރާނުގެ ރައްދު ހަމަލާތަކުން ރައްކާތެރިވުމަށް ހިޔާވަހިތައް ތައްޔާރުކުރުމަށް އިޒްރޭލުގެ ކުރީގެ މިނިސްޓަރު ލީބަރމަން ގޮވާލައިފި

އިޒްރޭލުން އީރާނާ ދެކޮޅަށް އަސްކަރީ ފިޔަވަޅު އެޅުމަށް އެމެރިކާއަށް ބާރުއަޅަމުންދާ ދަނޑިވަޅެއްގައި، އީރާނުން ދީފާނެ ބަދަލުހިފުމުގެ ހަމަލާތަކަކުން ރައްކާތެރިވުމަށް އިޒްރޭލުގެ ވަޒަންވެރިންނަށް ރައްކައުތެރި ހިޔާވަހިތައް ތައްޔާރުކުރުމަށް އެ ގައުމުގެ ކުރީގެ މިލިޓަރީ އެފެއާޒް މިނިސްޓަރު އެވިގްޑޯ ލީބަރމަން ގޮވާލައިފި އެވެ.

ކަނާތު ފިޔައިގެ "ޔިސްރާއީލް ބެއިޓެއިނޫ" ޕާޓީގެ ލީޑަރު ލީބަރމަން ބުދަ ދުވަހު ގޮވާލީ، ރައްކާތެރި ހިޔާވަހިކަމެއް ނެތް އެތައް މިލިއަން ބަޔަކަށްޓަކައި މިހާރުން މިހާރަށް ތައްޔާރުވެ، އަމާން ތަންތަން ގާއިމުކުރަން ޖެހޭ ކަމަށެވެ.

ލީބަރމަން މިހެން ބުނެފައި މިވަނީ، މިދިޔަ ޖޫން މަހު 12 ދުވަހަށް ދެމިގެންދިޔަ ހަނގުރާމައިގައި އީރާނުން ދިން ވަރުގަދަ މިސައިލް ހަމަލާތަކުގައި އިޒްރޭލުގެ "ސްޓްރެޓީޖިކް އަމާޒުތަކަށް" ބޮޑެތި ގެއްލުންތަކެއް ލިބުނުކަމަށް އޭނާ އަމިއްލައަށް އެއްބަސްވުމަށްފަހުގަ އެވެ.

ޖޫން މަހުގެ 13 ވަނަ ދުވަހު އިޒްރޭލުން އީރާނާ ދެކޮޅަށް އުދުވާނީ ހަނގުރާމައެއް ފެށިއިރު، ފަހުން އެމެރިކާވެސް ވަނީ މި ހަނގުރާމައިގައި ބައިވެރިވެފަ އެވެ. މީގެ ރައްދުގައި އީރާނުގެ ހަތިޔާރު އެޅި ފައުޖުތަކުން ވަނީ އިޒްރޭލުން ހިފާފައިވާ ބިންތަކުގައި ހުރި މުހިންމު ތަންތަނަށާއި، ހުޅަނގު އޭޝިއާގައި ހުރި އެމެރިކާގެ އެންމެ ބޮޑު އަސްކަރީ މަރުކަޒު ކަމަށްވާ ގަތަރުގައި ހުންނަ އަލް-އުދައިދު އެއާ ބޭސްއަށް ހަމަލާދީފަ އެވެ.

އީރާނުން މެދުނުކެނޑި ދެމުންދިޔަ ރައްދު ހަމަލާތަކުގެ ސަބަބުން އިޒްރޭލުގެ ސަރުކާރަށް މަޖުބޫރުވީ ހަނގުރާމަ ހުއްޓާލުމުގެ އެއްބަސްވުމަކަށް ދިއުމަށެވެ. މީގެ އިތުރުން، އީރާނާ ދެކޮޅަށް ހަނގުރާމައަށް ދިއުމުގެ އެންމެ ފަހުގެ ނިންމުން އޮތީ އެމެރިކާގެ ރައީސް ޑޮނަލްޑް ޓްރަމްޕްގެ އަތްޕުޅުގައި ކަމަށްވެސް ލީބަރމަން ބުންޏެވެ.

ލީބަރމަން އިތުރަށް ބުނީ، މިހާރު މިއޮތީ އިޒްރޭލުން މަޑުމައިތިރިވެ، އިންތިޒާރު ކުރަންޖެހޭ މަރުހަލާއެއްގައި ކަމަށެވެ. އަދި ނިންމުންތައް ނިންމަވަނީ ރައީސް ޓްރަމްޕް ކަމަށްވާތީ، އެމަނިކުފާނަށް ނުފޫޒު ފޯރުވުމުގެ ގާބިލުކަން އިޒްރޭލުން އޮތީ ވަރަށް ކުޑަކޮށް ކަމަށްވެސް އޭނާ ތުހުމަތު ކުރިއެވެ.

އީރާނާ ގާތުގައި އެމެރިކާގެ އަސްކަރީ ބާރުތައް ވަރުގަދަކުރަމުންދާ ދަނޑިވަޅެއްގައި، އިޒްރޭލުގެ  އަސްކަރީ ޗީފް އޮފް ސްޓާފް ޖެނެރަލް އީޔާލް ޒާމިރް އާއި މޮސާޑް ޖާސޫސީ އިދާރާގެ ވެރިޔާ ޑޭވިޑް ބަރނިއާ ހިމެނޭހެން އިޒްރޭލުގެ އިސް އޮފިޝަލުންތަކެއް ފާއިތުވި ހަފުތާތަކުގައި ވަނީ ވޮޝިންގޓަނަށް ޒިޔާރަތްކޮށްފަ އެވެ.

އެމެރިކާގެ ނޫސް އެޖެންސީއެއް ކަމަށްވާ "އެކްސިއޯސް" އިން ރިޕޯޓްކޮށްފައިވާ ގޮތުގައި، އީރާނަށް ހަމަލާދިނުމުގެ ހުއްދަ ދިނުމަށް އިޒްރޭލުން ޓްރަމްޕަށް ބާރުއަޅަމުންދިޔަ ނަމަވެސް، މިހާތަނަށް އޭނާ ހުންނެވީ އެކަމަށް ފަސްޖެހިފަ އެވެ.

އެމެރިކާގެ އޮފިޝަލަކާ ހަވާލާދީ އެ ނޫހުން ބުނެފައިވަނީ، ހަމަލާދޭން ހަގީގަތުގައި ބޭނުންވަނީ އިޒްރޭލުން ކަމަށާއި، ރައީސް ޓްރަމްޕް އަދި އެފަދަ ނިންމުމަކާ ގާތަށްވެސް ވަޑައިނުގަންނަވާ ކަމަށެވެ.

މި ރިޕޯޓް އައިސްފައިވަނީ، ތެހެރާންގެ ނިއުކްލިއާ ޕްރޮގްރާމާ ގުޅޭ މަޝްވަރާތައް އަލުން ފަށާފާނެ ކަމަށް ދެ ފަރާތުންވެސް ބުނުމާ ގުޅިގެން، އީރާނާއި އެމެރިކާއާ ދެމެދު އޮތް އަސްކަރީ ކުރިމަތިލުމުގެ ބިރު ފާއިތުވި ދުވަސްތަކުގައި ކުޑަވެފައިވާ ދަނޑިވަޅެއްގަ އެވެ.

މިދިޔަ މަހު ރައީސް ޓްރަމްޕް ވަނީ އީރާނަށް ހަމަލާދޭނެ ކަމުގެ އިންޒާރު ދެއްވައި، އެ ގައުމުގެ ދައުލަތުގެ މުއައްސަސާތައް ހިފުމަށް ހަމަނުޖެހުން ހިންގާ ފަރާތްތަކަށް ގޮވާލައްވައި، "އެހީތެރިކަން އަންނަނީ" ކަމަށް ވިދާޅުވެފަ އެވެ.

އީރާނުގެ އޮފިޝަލުން ވަނީ އެ ގައުމަށް ދޭ ކޮންމެ ހަމަލާއަކަށް ވަގުތުން ވަރުގަދަ ރައްދެއް ދޭނެ ކަމުގެ އިންޒާރު ދެއްވާފައެވެ. އަދި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކާއި ފައުޖުތަކުގެ އިތުރުން، އިޒްރޭލުން ހިފާފައިވާ ފަލަސްތީނުގެ ސިޓީތަކަށް ވެސް ހަމަލާދޭނެ ކަމަށް ވަނީ ބުނެފަ އެވެ.

އޭގެ ފަހުން ޓްރަމްޕް ވަނީ އަސްކަރީ ފިޔަވަޅުގެ އިންޒާރުތައް ދޫކޮށްލައްވައި، އީރާނާއެކު ނިއުކްލިއާ އެއްބަސްވުމަކަށް ދިއުމަށް ގޮވާލައްވަން ފައްޓަވާފަ އެވެ.

އެކްސިއޯސް އިން ޓްރަމްޕްގެ ތިން ސީނިއާ އެޑްވައިޒަރުންނާ ހަވާލާދީ ބުނެފައިވަނީ، އީރާނަށް އަސްކަރީ ހަމަލާއެއް ދިނުމަކީ ރަނގަޅު ނިންމުމެއް ކަމާމެދު ޓްރަމްޕާއި އޭނާގެ އަރިސް ބޭފުޅުން މިހާރު ޝައްކު ކުރައްވާ ކަމަށެވެ.

އީރާނުގެ އިސްލާމީ އިންގިލާބުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ ވަނީ، އެމެރިކާ އިން އީރާނާ ދެކޮޅަށް ފަށާ ކޮންމެ ހަނގުރާމައެއް މުޅި ސަރަހައްދީ ހަނގުރާމައަކަށް ބަދަލުވެގެންދާނެ ކަމުގެ އިންޒާރު ދެއްވާފަ އެވެ.