ރަން ކާމިޔާބީ އުމެއިރު ޚާއްސަ ކުރީ ސާންތި، ބަކާ އަދި އިފްރާޙު އަށް

ތައިލެންޑުގައި ކުރިއަށް ދިޔަ ސާފް ފުޓްސަލް ޗެމްޕިއަންޝިޕް ދިވެހި ރާއްޖެ އިން ކާމިޔާބު ކުރިއިރު، ޓީމުގެ މެނޭޖަރު މުޙައްމަދު އުމެއިރު އެ ކާމިޔާބީ އިޙުސާން ޢަބްދުލް ޣަނީ (ސާންތި) އާއި، މުޙައްމަދު އާރިފް (ބަކާ) އަދި އިފްރާޙު އަރީފް އަށް ޚާއްސަ ކޮށްފި އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މިހާރުގެ ހިންގާ ކޮމެޓީގައި ވެސް ހިމެނޭ އުމެއިރު، އޭނާގެ ސޯޝަލް މިީޑިއާގައި ކުރި ޕޯސްޓެއްގައި ވަނީ އެކަން ހިއްސާ ކޮށްފަ އެވެ. އެ ޕޯސްޓުގައި އުމެއިރު ހިމަނާފައި ވަނީ ސާފް ފުޓްސަލް ޗެމްޕިއަންޝިޕްގެ ތައްޓާއި، ސާންތި ކޯޗާއި، ބަކާ އަދި އިފްރާޙުގެ ނަން ލިޔެފައިވާ ތިން ޖާޒީ އެވެ.

އެ ޕޯސްޓުގައި އުމެއިރު ބުނެފައި ވަނީ، ސާންތި ކޯޗަކީ އޭނާގެ ކެރިއަރުގައި އެންމެ ބޮޑު އެހީތެރިކަމަކާއި، އެއްބާރުލުމެއް ދިން ކޯޗު ކަމަށެވެ. ސާންތި ކޯޗުގެ ފަރާތުން ލިބުނު ޚިދުމަތަށް އަަބަދު ވެސް ޝުކުރު އަދާ ކުރާނެ ކަމަށް އޭނާ ވަނީ ބުނެފަ އެވެ. އުމެއިރުގެ ޕްރޮފެޝަނަލް ފުޓުބޯޅަ ކެރިއަރުގައި އޭނާ އަށް އެންމެ ފުރަތަަމަ އިރުޝާދު ދިނީ ސާންތި ކޯޗެވެ. ކެންސަރު ބައްޔަށް ފަރުވާ ހޯދުމުގެ ތެރޭގައި ސާންތި ކޯޗު ނިޔާވެފައި ވަނީ 2025 ވަނަ އަހަރު އެވެ.

މީގެ އިތުރުން އުމެއިރު ބުނީ، ބަކާ އާއެކު ޤައުމީ ޓީމާއި އަދި ކުލަބު ތަކުގައި ވެސް ވަރަށް ގިނަ ހަނދާންތައް އެކުލެވިގެންވާ ކަމަށެވެ. އަދި ބަކާ އަކީ އޭނާގެ ޙަޔާތުގައި ދިމާވި އެންމެ ހިތްހެޔޮ އެކަކު ކަމަށް އުމެއިރު ބުނެފައިވެ އެވެ. 2024 ވަނަ އަހަރުގެ ތެރޭގައި ބަކާ ނިޔާވީ ޙައްޖުގެ އަޅުކަން އަދާ ކުރުމަށް ފަހު އައިސް، ކުއްލިއަކަށް ދިމާވި ސިއްހީ ހާލަތެއްގައި ފަރުވާ ހޯދަމުން ގެންދަނިކޮށެވެ. 

ތިން ވަނަ ފަރާތެއްގެ ގޮތުގައި އިފްރާޙުގެ ނަން ހިމަނައި އުމެއިރު ބުނެފައި ވަނީ، އުމުރުން އެންމެ 15 އަހަރުން ފެށިގެން ދެ މީހުން އެކުގައި އުޅުނު ކަމަށެވެ. އެންމެ ކުޑަ ދުވަހުން ފެށިގެން ބޮޑެތި އުންމީދުތަކާ އެކު ވެސް، ދެ މީހުންގެ ދެ މެދުގައި ވަރަށް ގާތް ގުޅުމެއް އޮތް ކަމަށް ފާހަގަކޮށް އުމެއިރު ބުނީ، އިފްރާޙު އަކީ ވެސް ވަރަށް ހިތްހެޔޮ ރަޙުމަތްތެރިއެއް ކަމަށެވެ. ސްޓްރޯކެއް ޖެހި ފަރުވާ ހޯދަމުން ދަނިކޮށް، އިފްރާޙު ނިޔާވެފައި ވަނީ 2025 ވަނަ އަހަރުގެ ތެރޭގަ އެވެ.

މީގެ އިތުރުން އެ ޕޯސްޓުގައި އުމެއިރު ބުނެފައި ވަނީ، އެ ތިން ފަރާތަކީ ވެސް ރާއްޖެ  އިން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބު ކުރިއިރު، އެ ޓީމުގައި ހިމެނުނު ތިން ފަރާތް ކަމަށެވެ.