ޤައުމީ ފުޓްސަލް ޓީމަށް އެކަށީގެންވާ މަރުޙަބާއެއް ނުކިޔާ ކަމަށް ބުނެ ގިނަ ބަޔަކު ފާޑު ކިޔައިފި

ސާފް ފުޓްސަލް ޗެމްޕިއަންޝިޕް ކާމިޔާބު ކުރި ރާއްޖޭގެ ޤައުމީ ފުޓްސަލް ޓީމަށް އެކަށީގެންވާ މަރުޙަބާއެއް ނުކިޔާ ކަމަށް ބުނެ، ގިނަ ބަޔަކު ފާޑު ކިޔަން ފަށައިފި އެވެ. 

ތައިލެންޑުގައި ކުރިއަށް ދިޔަ ސާފް ޗެމްޕިއަންޝިޕް ކާމިޔާބު ކުރި ޤައުމީ ޓީމު އެނބުރި ރާއްޖެ އައިސްފައި ވަނީ އަންގާރަ ދުވަހުގެ ރޭ އެވެ. ޓީމަށް ރަސްމީކޮށް މަރުޙަބާ ދެންނެވުން ކުރިއަށް ގެންގޮސްފައި ވަނީ އާޓިފިޝަލް ބީޗުގަ އެވެ. ނަމަވެސް، ޤައުމީ ފުޓްސަލް ޓީމަށް އެކަށިގެންވާ ވަރުގެ މަރުޙަބާއެއް ކިޔާފައި ނުވާ ކަމަށް ބުނެ އެތައް ބަޔަކު ވަނީ ސޯޝަލް މީޑިއާގައި ފާޑު ކިޔައިފަ އެވެ.

އެގޮތުން ބައެއް ފަރާތްތަކުން ބުނެފައި ވަނީ، ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕް ކާމިޔާބު ކުރި ޓީމަށް އެއަށް ވުރެ ފެންވަރު ރަނގަޅު މަރުޙަބާއެއް ކިޔެން ވާނެ ކަމަށެވެ. އަދި އެ މަރުޙަބާ ދެންނެވުމުގެ އިންތިޒާމު ތަކާއި، ރޭވުންތެރިކަން ފުރިހަމަ ވާން ވާނެ ކަމަށް ވެސް ފާހަގަ ކޮށްފައިވެ އެވެ.

އަނެއް ބަޔަކު ފާހަގަ ކޮށްފައި ވަނީ، ޓީމަށް މަރުޙަބާ ދެންނެވުމަށް ސަރުކާރުން މާ ބޮޑު ސަމާލު ކަމެއް ދީފައި ނުވާ ކަމަށެވެ. އެގޮތުން ޓީމަށް މަރުޙަބާ ދެންނެވުމާއި، ކާމިޔާބީ ފާހަގަ ކުރުމަށް ބާއްވާ ޙަރަކާތަށް ސަރުކާރުން ދީފައިވާ ސަމާލުކަން ކުޑަ ކަމަށް ފާހަގަ ކޮށްފައިވެ އެވެ. ނަމަވެސް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކަމުގައި އެ އެސޯސިއޭޝަން އަށް ކުރެވެން ހުރި އެންމެ ފުރިހަމަ އަށް ކަންކަން ކޮށްފައިވާ ކަމަށް ބައެއް ފަރާތްތަކުން ފާހަގަ ކުރި އެވެ. 

މީގެ އިތުރުން އެއީ ސިޔާސީ ކަމެއް ނަމަ، ބައެއް މީހުން ވަރަށް ފޯރި ލާފައި އެކަންކަން ފުރިހަމަ ކުރާނެ ކަމަށް ބައެއް މީހުން ބުންޏެވެ. އެގޮތުން ސިޔާސީ ޙަރަކާތް ތަކަށް އެތައް ހާސް ބަޔަކު ޖަމާވާއިރު، ތާރީޚީ ކާމިޔާބީ ހޯދި ޤައުމީ ޓީމަށް މަރުޙަބާ ދެންނެވުމަށް ބޭއްވި ޙަރަކާތުގައި ބައިވެރިވި މީހުންގެ އަދަދު އިންތިހާ އަށް މަދު ކަމަށް ފާހަގަ ކޮށްފައިވެ އެވެ.

އަނެއް ބައި މީހުން ބުނެފައި ވަނީ، ސަރުކާރުން ކޮންމެ ކަމެއްގެ ކްރެޑިޓް ނަގަން އުޅޭއިރު، ޓީމަށް މަރުޙަބާ ދަންނަވައި، އުފާ ފާޅު ކުރުމުގެ ކަންކަން ފުރިހަމަ ކުރުމަށް އެހާ ބޮޑު ސަމާލު ކަމެއް ނުދޭ ސަބަބެއް ނުވިސްނޭ ކަމަށެވެ. އެ ކާމިޔާބީ ކުލަ ގަދަ ގޮތެއްގައި ފާހަގަ ކުރުމަށް ސަރުކާރުން ޚާއްސަ ސަމާލުކަމެއް ދިން ނަމަ، އެކަން ފުރިހަމަ ކުރެވުނީސް ކަމަށް ބައެއް މީހުން ދެކެ އެވެ.

ރާއްޖެ އިން ސާފް ފުޓްސަލް ޗެމްޕިއަންޝިޕް ކާމިޔާބު ކުރީ މުބާރާތުގައި ކުޅުނު ހުރިހާ މެޗަކުން ވެސް މޮޅުވެގެންނެވެ. މިއީ ފުޓްސަލްގައި ރާއްޖެ އިން ބައިނަލްއަޤުވާމީ ތައްޓެއް ކާމިޔާބު ކުރި ފުރަތަމަ ފަހަރެވެ.