ފުރަތަމަ ޑިވިޝަން އިން ޔޫވީ ރެލިގޭޓު ވެއްޖެ
ޔޫވީ އިން ފުރަތަމަ ޑިވިޝަންގެ ޖާގަ ހޯދީ 2016 ވަނަ އަހަރު. މިފަހަރުގެ ލީގުގެ އެންމެ ފުލުގައި އެ ޓީމު އޮތްއިރު، މިއީ ފާއިތުވި 10 އަހަރުގެ ތެރޭގައި ޔޫވީ އަށް އެންމެ ދަށް ނަތީޖާއާ ކުރިމަތިލާާން ޖެހުނު ސީޒަން. ލީގުގައި ކުޅެފައިވާ 17 މެޗުން އަށް ޕޮއިންޓާ އެކު ޔޫވީ އޮތީ 10 ވަނައިގައި.
ދިވެހި ޕްރިމިއާ ލީގުގައި ޔޫވީ އާއި ކުލަބު ވެލެންސިއާ ބައްދަލު ކުރި މެޗުގެ ތެރެއިން | އެފްއޭއެމް
ފުރަތަމަ ޑިވިޝަންގައި ވާދަ ކުރަމުން އަންނަތާ އެތައް އަހަރެއްވެފައިވާ ޔުނައިޓެޑު ވިކްޓަރީ (ޔޫވީ) ރެލިގޭޓު ވެއްޖެ އެވެ.
ޔޫވީ ރެލިގޭޓްވީ، ދިރާގު ދިވެހި ޕްރިމިއާ ލީގުގައި ހުކުރު ދުވަހުގެ ހަވީރު ކުލަބު ވެލެންސިއާއާ ދެކޮޅަށް ކުޅުނު މެޗު އެއްވަރު ވުމުންނެވެ. ލީގު ރޭވިފައި އޮތް ގޮތުން، 10 ޓީމު ވާދަ ކުރާ ލީގުގެ އެންމެ ފުލަށްދާ ދެ ޓީމު ރެލިގޭޓު ވާނެ އެވެ. ވެލެންސިއާ ބަލިކޮށް، ރެލިގޭޓު ނުވެ ސަލާމަތް ވުމުގެ ފުރުސަތު ޔޫވީ އަށް އޮތް ނަމަވެސް، އެ މެޗު ނިމުނީ ލަނޑެއް ނުޖެހި އެއްވަރު ވެގެންނެވެ.
މެޗުގައި ދެ ޓީމަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ. ނަމަވެސް، އެއްވެސް ޓީމަކަށް ލިބުނު ފުރުސަތެއްގެ ބޭނުން ކުރެވޭ ގޮތެއް ނުވި އެވެ. މެޗުގައި ވެލެންސިއާ އަށް ލީޑު ނަގައިދޭން އެންމެ ގިނަ ފުރުސަތު ލިބުނީ އެ ޓީމުގެ އީތަބް އިބްރާހީމް ޒަކީ އަށެވެ.
ޔޫވީ އިން ފުރަތަމަ ޑިވިޝަންގެ ޖާގަ ހޯދީ 2016 ވަނަ އަހަރު އެވެ. މިފަހަރުގެ ލީގުގެ އެންމެ ފުލުގައި އެ ޓީމު އޮތްއިރު، މިއީ ފާއިތުވި 10 އަހަރުގެ ތެރޭގައި ޔޫވީ އަށް އެންމެ ދަށް ނަތީޖާއާ ކުރިމަތިލާާން ޖެހުނު ސީޒަން އެވެ. ލީގުގައި ކުޅެފައިވާ 17 މެޗުން އަށް ޕޮއިންޓާ އެކު ޔޫވީ އޮތީ 10 ވަނައިގަ އެވެ.
ޔޫވީ އަތުން ޕޮއިންޓެއް ލިބުނު ވެލެންސިއާ އޮތީ ނުވަ ވަނައިގަ އެވެ. އެއީ އެ ޓީމު ކުޅެފައިވާ 17 މެޗުން ނުވަ ޕޮއިންޓާ އެކު އެވެ. ލީގުގެ ފަހު މެޗުގައި ކުލަބު އީގަލްސްއާ ދެކޮޅަށް ނިކުންނައިރު، ރެލިގޭޓުވުމުން ސަލާމަތް ވުމަށްޓަކައި ވެލެންސިއާ އަށް އެއީ މުހިންމު މެޗެކެވެ. ލީގުގެ އެންމެ ފުލަށް ދާ ދެ ޓީމު ރެލިގޭޓު ވާއިރު، ހަތް ވަނަ ޓީމާއި އަށް ވަނަ ޓީމަށް ޖެހޭނީ ރެލިގޭޝަން ޕްލޭ އޮފްގައި ވާދަ ކުރާށެވެ.
