ސާފް ފުޓްސަލް ޗެމްޕިއަންޝިޕް ކާމިޔާބު ކުރި ޤައުމީ ޓީމަށް ހޫނު މަރުޙަބާ ކިޔަން ރައީސް ވަޑައިނުގަންނަވާ

ދާދި ފަހުން ނިމުނު ސާފް ފުޓްސަލް ޗެމްޕިއަންޝިޕް ކާމިޔާބު ކުރި ރާއްޖޭގެ ފުޓްސަލް ޤައުމީ ޓީމު ރާއްޖެ އަތުވުމުން މަރުޙަބާ ކިޔައިފި އެވެ. 

ތައިލެންޑުގައި ކުރިއަށް ދިޔަ މުބާރާތުގެ ޗެމްޕިއަންކަން ރާއްޖެ އިން ހޯދީ ކުޅުނު ހަ މެޗުން ވެސް މޮޅުވެގެންނެވެ. ޕާކިސްތާން، ބަންގްލަދޭޝް، އިންޑިއާ، ނޭޕާލް، ބޫޓާން އަދި ސްރީ ލަންކާ ވާދަ ކުރި މުބާރާތް ރާއްޖެ އިން ކާމިޔާބު ކުރިއިރު، މިއީ ސާފް ފުޓްސަލް ޗެމްޕިއަންޝިޕް ބޭއްވި ފުރަތަމަ ފަހަރެވެ.

މުބާރާތުގެ ތައްޓާ އެކު އަންގާރަ ދުވަހުގެ ރޭ ރާއްޖޭގެ ޓީމު މާލެ އައިއިރު، ވެލާނާ އިންޓަނޭޝަނަލް އެއާޕޯޓް އިން ޓީމަށް މަރުޙަބާ ދެންނެވީ ކުޅިވަރު ވަޒީރު ޢަބްދުالله ރާފިޢު އެވެ. މީގެ އިތުރުން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤު (ޓޮމް) ވެސް ވަނީ ޓީމަށް މަރުޙަބާ ދެންނެވުމަށް ވަޑައިގެންފަ އެވެ. 

އެއަށް ފަހު ތައްޓާ އެކު ޓީމު މާލެ އައިއިރު، ރަސްމީ މަރުޙަބާ ދެންނެވުމާއި އުފާ ފާޅު ކުރުން ފެށުނީ ޒުވާނުންގެ މަރުކަޒާ ހަމައިންނެވެ. ޒުވާނުންގެ މަރުކަޒާ ހަމައިން ތައްޓާ އެކު ޓީމު އާޓިފިޝަލް ބީޗަށް އައިއިރު، ޓީމަށް މަރުޙަބާ ދެންނެވުމަށް ގިނަ އަދަދެއްގެ ބަޔަކު ވަނީ އެއްވެފަ އެވެ.

އާޓިފިޝަލް ބީޗަށް އައުމަށް ފަހު، ސާފް ފުޓްސަލް ޗެމްޕިއަންޝިޕްގެ ތަށި ވަނީ ކުޅިވަރު ވަޒީރު ރާފިޢު އާއި އެފްއޭއެމްގެ ރައީސް ޓޮމްއާ ހަވާލު ކޮށްފަ އެވެ. ކުރިން އިންތިޒާމު ކޮށްފައި އޮތީ، އާޓިފިޝަލް ބީޗަށް ޓީމު އައުމާ އެކު، ރައީސުލްޖުމްހޫރިއްޔާ ޑޮކްޓަރު މުޙައްމަދު މުއިއްޒު ޓީމަށް މަރުޙަބާ ދަންނަވާ ގޮތަށެވެ. 

އެއަށް ފަހު، ސާފް ފުޓްސަލް ޗެމްޕިއަންޝިޕްގެ ތަށި ރައީސްއާ ހަވާލު ކުރުމަށް ފަހު، ރައީސް އެ ހަފްލާގައި ވާހަކަ ދައްކަވާ ގޮތަށް ވެސް އޮތީ ހަމަޖައްސައިފަ އެވެ. ޙަރަކާތް ރޭވިފައި އޮތް ގޮތް ކުޅިވަރު ވުޒާރާ އިން ހާމަކުރިއިރު އެކަންކަން ހިމަނާފައި އޮތް ނަމަވެސް، ފަހުބް ބަދަލުވީ ސަބަބެއް ހާމަ ކޮށްފައި ނުވެ އެވެ.

މިއީ ސާފް ފުޓްސަލް ޗެމްޕިއަންޝިޕް ބޭއްވި ފުރަތަމަ ފަހަރެވެ. ރާއްޖެ އަކީ ސާފް ފުޓްސަލް ޗެމްޕިއަންޝިޕް ކާމިޔާބު ކުރި ފުރަތަމަ ޤައުމަށް ވާއިރު، މިއީ ބައިނަލްއަޤުވާމީ މައިދާނުގައި ފުޓްސަލް އިން ހޯދި ފުރަތަމަ ތައްޓެވެ. އެހެންކަމުން މިއީ ރާއްޖެ އަށް ހުރިހާ ގޮތަކުން ވެސް ޚާއްސަ ކާމިޔާބީ އެކެވެ.