ޔޫވީ ބަލިކޮށް، ނިއު ރޭޑިއަންޓް އަލުން ތިން ވަނަ އަށް ޖެހިލައިފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ، ނިއު ރޭޑިއަންޓް ސްޕޯޓްސް ކުލަބުން އަލުން ލީގު ތާވަލްގެ ތިން ވަނަ މަގާމަށް ޖެހިލައިފި އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ނިއު ރޭޑިއަންޓް އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން ނިއު ރޭޑިއަންޓް އިން ވަނީ ރަނގަޅަށް ކުޅެފަ އެވެ. އެގޮތުން ލަނޑު ޖަހަން އެ ޓީމުން ފުރުސަތު ތަކެއް ތަނަވަސް ކުރިއިރު، މެޗުގައި ނިއު ރޭޑިއަންޓް އިން ލީޑު ނެގީ ފުރަތަމަ ހާފު ނިމެން ވެފައި ވަނިކޮށެވެ. އެގޮތުން ފުރަތަމަ ހާފުގެ 36 ވަނަ މިނެޓުގައި ނިއު ރޭޑިއަންޓް އަށް ލަނޑު ޖަހައި ލީޑު ނަގައިދިނީ މުޙައްމަދު ނިޒާމް އެވެ. 

މެޗުގެ ދެ ވަނަ ހާފުގައި ވެސް ނިއު ރޭޑިއަންޓް އިން ރަނގަޅަށް ކުޅެފައިވާއިރު، އެ ޓީމުން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެގޮތުން މެޗުގެ 65 ވަނަ މިނެޓުގައި ނިއު ރޭޑިއަންޓްގެ ދެ ވަނަ ލަނޑު ޖެހީ ބިދޭސީ ކުޅުންތެރިޔާ އަލްހާޖީ ގޭރޯ އެވެ.

މޮޅާއެކު ނިއު ރޭޑިއަންޓް އިން ލީގު ތާވަލްގެ ތިން ވަނަ މަގާމަށް ޖެހިލިއިރު، ޔޫވީއާ ދެކޮޅަށް ނިކުތްއިރު އެ ޓީމު އޮތީ ހަަތަރު ވަަނައިގަ އެވެ. މީގެ ކުރިން ތިން ވަނައިގައި ބުރު ސްޕޯޓްސް ކުލަބު އޮތްއިރު، މިހާރު އެ ޓީމު އޮތީ ހަތަރު ވަަނައިގަ އެވެ. 

ލީގުގައި މިހާތަނަށް ކުޅެފައިވާ 15 މެޗުން 30 ޕޮއިންޓާ އެކު ނިއު ރޭޑިއަންޓް އޮތީ ތިން ވަނައިގަ އެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި ބުރަށް ލިބެނީ 27 ޕޮއިންޓެވެ. އެއް ވަނައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް 15 މެޗުން ލިބެނީ 43 ޕޮއިންޓެވެ. ދެ ވަަނައިގައި އޮތް އޮޑި ސްޕޯޓްސް ކުލަބަށް 15 މެޗުން ލިބެނީ 35 ޕޮއިންޓެވެ.