ފަހު ވަގުތު ވެލެންސިއާ އަތުން ޓީސީ މޮޅުވެއްޖެ

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ވެލެންސިއާއާ ދެކޮޅަށް ކުޅުނު މެޗުން، ފަހު ވަގުތު ޓީސީ ސްޕޯޓްސް ކުލަބު މޮޅުވެއްޖެ އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ޓީސީ އިން ކާމިޔާބު ކުރީ 1-0 އިންނެވެ. މެޗުގައި ޓީސީ އިން ހަމައެކަނި ލަނޑު ޖެހީ ވެސް މެޗުގެ އެންމެ ފަހު ވަގުތުގެ ތެރޭގަ އެވެ.

މެޗުގައި ޓީސީ އިން ވަނީ ރަނގަޅަށް ކުޅެ، ލަނޑު ޖަހަން ވެސް ފުރުސަތު ތަކެއް ތަނަވަސްކޮށްފަ އެވެ. ނަމަވެސް މެޗުގެ ފަހު ވަގުތާ ހަމައަށް ދިޔައިރު ވެސް، ޓީސީ އަށް އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ. މެޗު އެއްވަރު ވާނެ ކަމަށް ބެލެވިފައި ވަނިކޮށް، ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޓީސީ އަށް ލަނޑު ޖަހައި ލީޑު ނަގައިދިނީ ބިދޭސީ ކުޅުންތެރިޔާ ޕްރިންސް ބޯޑޫ އެވެ. 

ވެލެންސިއާ އަތުން ހޯދި މުހިންމު މޮޅާ އެކު ޓީސީ އޮތީ ލީގު ތާވަލްގެ ހަ ވަނަ މަގާމުގަ އެވެ. އެއީ މިހާތަނަށް ލީގުގައި އެ ޓީމު ކުޅެފައިވާ 16 މެޗުން 15 ޕޮއިންޓާ އެކު އެވެ. ޓީސީ އަތުން ބަލިވި ވެލެންސިއާ އޮތީ ލީގު ތާވަލްގެ ނުވަ ވަނައިގަ އެވެ. ރެލިގޭޓުވުމުގެ ބިރު ބޮޑުވެފައިވާ ވެެލެންސިއާ އިން މިހާތަނަށް ކުޅެފައިވާ 16 މެޗުން އެ ޓީމަށް ލިބެނީ އަށް ޕޮއިންޓެވެ.