ޓީސީ އިން ގްރީން ބަލިކޮށްފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ގްރީން ސްޓްރީޓްސްއާ ދެކޮޅަށް ކުޅުނު މެޗުން، ޓީސީ ސްޕޯޓްސް ކުލަބު މޮޅުވެއްޖެ އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ޓީސީ އިން ކާމިޔާބު ކުރީ 2-0 އިންނެވެ. މެޗުގައި ޓީސީ އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ދެ ޓީމުގެ ފަރާތުން ދާދި ހަމަހަމަ ކުޅުމެއް ފެނުނުއިރު، ޓީސީ އިން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. ނަމަވެސް، އެއްވެސް ފުރުސަތެއްގެ ބޭނުން ނުކުރެވުނު އިރު، ފުރަތަމަ ހާފު ނިމުނީ ލަނޑެއް ނުޖެހި އެވެ. 

މެޗުގެ ދެ ވަނަ ހާފުގެ 60 ވަނަ މިނެޓުގައި ޓީސީ އިން ވަނީ ލަނޑު ޖަހައި ކުރި ހޯދައިފަ އެވެ. އެ ލަނޑު އެ ޓީމަށް ޖަހައިދިނީ ޙުސެއިން މުޙައްމަދު ޝަރީފް އެވެ. އޭގެ ފަހުން މެޗުގެ 74 ވަނަ މިނެޓުގައި މުޙައްމަދު ދާނިޝް އިބްރާހީމް ވަނީ ޓީސީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

ގްރީން އަތުން ހޯދި މުހިންމު މޮޅާ އެކު، ޓީސީ އޮތީ ލީގު ތާވަލްގެ ހަތް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 15 މެޗުން 12 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އަށް ވަނައިގައި ގްރީން އަށް ލިބެނީ އަށް ޕޮއިންޓެވެ. ނުވަ ވަަނައިގައި އޮތް ކުލަބު ވެލެންސިއާ އަށް ވެސް އަށް ޕޮއިންޓު ލިބޭއިރު، ފުލުގައި އޮތް ޔުނައިޓެޑު ވިކްޓްރީ (ޔޫވީ) އަށް ލިބެނީ ހަތް ޕޮއިންޓެވެ.

ލީގު ތާވަލްގެ އެންމެ ފުލަށް ދާ ދެ ޓީމު ރެލިގޭޓު ވާނީ ރީޖަނަލް ލީގުގެ މާލޭ ލީގަށެވެ. މިވަގުތު ރެލިގޭޓު ވުމުގެ ބިރު އެންމެ ބޮޑަށް އޮތީ ވެލެންސިއާ އާއި ޔޫވީ އަށެވެ.