ޔޫވީ އަތުން މޮޅުވެ، ގްރީން އިން އުންމީދެއް ހޯދައިފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ، ކުލަބު ގްރީން ސްޓްރީޓްސް އިން މުހިންމު މޮޅެއް ހޯދައިފި އެވެ. 

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ގްރީން އިން ކާމިޔާބު ކުރީ 1-0 އިންނެވެ. ދެ ޓީމަށް ވެސް މޮޅެއް ހޯދުމަށް މުހިންމުވެފައި އޮތް މެޗުގައި، ގްރީން އިން ލަނޑު ޖެހީ ވެސް ފުރަތަމަ ހާފުގަ އެވެ. 

މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، ގްރީން އިން ވަނީ 22 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. އެ ލަނޑު ޖަހައި ގްރީން އަށް ލީޑު ނަގައިދިނީ އަންސަރު އިބްރާހީމް އެވެ. އެ ލަނޑު އަންސަރު ޖެހީ ގްރީންގެ މުޙައްމަދު ސަހާއު ތަނަވަސްކޮށްދިން ފުރުސަތެއްގަ އެވެ. 

އޭގެ ފަހުން މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ޔޫވީ އިން މަސައްކަތް ކުރިއިރު، ގްރީން އިން ވަނީ ލީޑު ފުޅާ ކުރަން މަސައްކަތް ކޮށްފަ އެވެ. ނަމަވެސް މެޗުގައި އިތުރު ލަނޑެއް ޖެހޭ ގޮތެއް ނުވި އެވެ. 

ޔޫވީ އަތުން ހޯދި މުހިންމު މޮޅާ އެކު ގްރީން އިން ވަނީ ލީގު ތާވަލްގެ ހަތް ވަނަ މަގާމަށް ޖެހިލައިފަ އެވެ. އެއީ މިހާތަނަށް ލީގުގައި ކުޅެފައިވާ 16 މެޗުން 11 ޕޮއިންޓާ އެކު އެވެ. ގްރީން އަތުން ބަލިވި ޔޫވީ އޮތީ، 16 މެޗުން އަށް ޕޮއިންޓާ އެކު ލީގު ތާވަލްގެ އެންމެ ފުލުގަ އެވެ. ނުވަ ވަނައިގައި އޮތީ ކުލަބު ވެލެންސިއާ އެވެ. ނަމަވެސް އެއީ މި ދެ ޓީމަށް ވުރެ އެއް މެޗު މަދުން ކުޅެގެންނެވެ.