އީރާނުން އެމެރިކާގެ ދިދަ ޖަހާފައިވާ ތެޔޮ ބޯޓަކަށް ހުރަސްއަޅައިފި
އީރާނުން ބުނާ ގޮތުގައި މި ފިޔަވަޅު އެޅީ އެ ބޯޓު ގަވާއިދާ ހިލާފަށް އެ ގައުމުގެ ކަނޑުގެ ސަރަހައްދަށް ވަނުމާ ގުޅިގެން ކަމަށާއި، ނަމަވެސް ބޯޓު މިހާރު ދަނީ އެމެރިކާގެ މަނަވަރެއްގެ ހިމާޔަތުގައި ދަނީ ދަތުރު ކުރަމުން. މި ހާދިސާ ހިނގާފައި މިވަނީ އެމެރިކާ އިން ހަމަލާއެއް ދީފި ނަމަ އެ ކަނޑުއޮޅި ބަންދުކުރާނެ ކަމުގެ އިންޒާރު އީރާނުން ދީފައިވާ ދަނޑިވަޅެއްގައި.
އީރާނުގެ އަސްކަރިއްޔާއިން މާރިޗު 12، 2025 ގައި އާންމުކޮށްފައިވާ މި ފޮޓޯއިން ފެންނަނީ، އޮމާން ކަނޑުގައި ކުރިއަށްދިޔަ އަސްކަރީ ތަމްރީނެއްގެ ތެރެއިން އެ ގައުމުގެ ކަނޑުގެ ސިފައިން މޮޓޯ ބޯޓެއްގައި ހަރަކާތްތެރިވާ މަންޒަރު. | އޭއެފްޕީ
އެމެރިކާގެ ދިދަ ޖަހާފައިވާ ތެޔޮ އުފުލާ ބޯޓަކަށް، ހޯމޫޒް ކަނޑުއޮޅިން ދަތުރުކުރަނިކޮށް އީރާނުގެ ހަތިޔާރު އެޅި އަސްކަރީ އުޅަނދުތަކަކުން ހުރަސްއަޅައި ސުވާލުކޮށްފައިވާ ކަމަށް އިނގިރޭސިވިލާތުގެ ކަނޑުގެ ސަލާމަތީ ކަންކަމާ ބެހޭ ކުންފުންޏެއް ކަމަށްވާ ވެންގާޑް ޓެކް އިން އަންގާރަ ދުވަހު ބުނެފިއެވެ.
އެ ކުންފުނިން ބުނި ގޮތުގައި މި ހާދިސާއަށްފަހު އެ ބޯޓު މިހާރު ދަނީ ދަތުރު ކުރިއަށް ގެންދަމުންނެވެ.
ވެންގާޑް ޓެކް އިން މައުލޫމާތު ދޭ ގޮތުގައި "ސްޓެނާ އިމްޕަރޭޓިވް" ނަމަކަށް ކިޔާ މި ބޯޓު އޮމާންގެ އުތުރުން ގާތްގަނޑަކަށް 16 ނޯޓިކަލް މޭލު (30 ކިލޯމީޓަރު) ބޭރުން ކަނޑުއޮޅި ހުރަސްކުރަނިކޮށް، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އަށް ނިސްބަތްވާ ހަތިޔާރު އެޅި ކުދި ހަ ބޯޓެއް ވަނީ އެ ބޯޓާ ކައިރިކޮށްފަ އެވެ.
އީރާނުގެ އަސްކަރީ އުޅަނދުތަކުން ރޭޑިއޯ މެދުވެރިކޮށް ބޯޓުގެ ކެޕްޓަނަށް ގުޅައި، "އިންޖީނު ނިއްވާލުމަށާއި ބޯޓަށް ސިފައިން އެރުމަށް ތައްޔާރުވުމަށް" އަމުރުކުރި ކަމަށް އެ ކުންފުނިން ބުނެ އެވެ. ނަމަވެސް، ބޯޓުގެ ދުވެލި ބާރުކޮށް ކުރިއަށް ދިޔަ ކަމަށާއި، އެ ބޯޓު އީރާނުގެ ކަނޑުގެ ސަރަހައްދަށް ވަދެފައި ނުވާނެ ކަމަށް ވެންގާޑް ޓެކް އިން ބުންޏެވެ.
"މިހާރު އެ ބޯޓަށް ހިމާޔަތް ދެމުން ދަނީ އެމެރިކާގެ ހަނގުރާމަމަތީ މަނަވަރަކުން،" ވެންގާޑް ޓެކް އިން ހާމަކުރި އެވެ.
މި ހާދިސާއާ ގުޅޭގޮތުން އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް (ޔޫ.ކޭ.އެމް.ޓީ.އޯ) އިން މީގެ ކުރިން ރިޕޯޓުކޮށްފައިވީ ނަމަވެސް، އެ އިދާރާއިން އޭރު ބޯޓުގެ ނަމެއް ނުވަތަ އެއީ ކޮން ގައުމެއްގެ ބޯޓެއްކަމެއް ހާމައެއް ނުކުރެ އެވެ.
އީރާނުގެ ދައުލަތާ ގުޅުން އޮންނަ ފާސް ނިއުސް އެޖެންސީން ބުނި ގޮތުގައި، ވަކި ގައުމެއް ހާމަނުކުރާ ބޯޓެއް ހޯމޫޒް ކަނޑުއޮޅިން އީރާނުގެ ކަނޑުގެ ސަރަހައްދަށް ގަވާއިދާ ހިލާފަށް ވަދެފައިވެ އެވެ. އަދި އެ ވަގުތު އީރާނުގެ އަސްކަރީ ޔުނިޓުތަކުން ވަނީ ބޯޓަށް ބޭނުންވާ ހުއްދަތައް ދެއްކުމަށް "އެދިފައި" ކަމަށް އެ އެޖެންސީން ބުނެ އެވެ.
"އެ ސަރަހައްދުގައި އޮތުމަށް އެ ބޯޓަށް ގާނޫނީ އެއްވެސް ހުއްދައެއް ނެތް،" ފާސް ނިއުސް އެޖެންސީން ބުންޏެވެ. "އެހެންކަމުން އެ ބޯޓަށް އިންޒާރު ދިނުމާއެކު ވަގުތުން ވަނީ އީރާނުގެ ސަރަހައްދުން ބޭރުވެފައި."
ދުނިޔޭގެ ބާޒާރަށް ބޭނުންވާ ތެޔޮ އަދި ގުދުރަތީ ގޭސް އުފުލުމުގައި މުހިންމު ދައުރެއް އަދާކުރާ ހޯމޫޒް ކަނޑުއޮޅިއަކީ މީގެ ކުރިންވެސް މިފަދަ އެތައް ހާދިސާތަކެއް ހިނގާފައިވާ ސަރަހައްދެކެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކަނޑުގެ ސިފައިންގެ އިސް އޮފިޝަލަކު މިދިޔަ ހަފުތާގައި ވަނީ، އެމެރިކާ އިން ހަމަލާއެއް ދީފި ނަމަ އެ ކަނޑުއޮޅި ބަންދުކުރާނެ ކަމުގެ އިންޒާރު ދީފައެވެ.
މަސްދަރު: އޭއެފްޕީ
