އެމެރިކާގެ މަނަވަރާ ދިމާލަށް އައި އީރާނުގެ ޑްރޯނަކަށް ހަމަލާދީ ވައްޓާލައިފި

އަރަބި ކަނޑުގެ ސަރަހައްދުން އެމެރިކާގެ މަތިންދާބޯޓު އުފުލާ މަނަވަރަކާ "ނުރައްކާތެރި" މިންވަރަކަށް ކައިރިވި އީރާނުގެ ޑްރޯނެއް، އަންގާރަ ދުވަހުގެ ހެނދުނުގެ ވަގުތެއްގައި އެމެރިކާގެ ހަނގުރާމަމަތީ ބޯޓަކުން ބަޑިޖަހައި ވައްޓާލާފައިވާ ކަމަށް އެމެރިކާގެ އަސްކަރިއްޔާ އިން ބުނެފި އެވެ.

މި ހާދިސާ ހިނގާފައިވަނީ އީރާނުގެ ދެކުނު އައްސޭރިފަށާ ގާތްގަނޑަކަށް 500 މޭލު ބޭރުން، އަރަބި ކަނޑުގެ ސަރަހައްދުން އެމެރިކާގެ މަނަވަރު "ޔޫއެސްއެސް އެބްރަހަމް ލިންކަން" ދަތުރުކުރަމުން ދަނިކޮށެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ތަރުޖަމާނު ކެޕްޓަން ޓިމް ހޯކިންސް ބުނީ، އީރާނުގެ ދެކުނު އައްސޭރިފަށާ ގާތްގަނޑަކަށް 500 މޭލު ބޭރުން "ޔޫއެސްއެސް އަބްރަހަމް ލިންކަން" ދަތުރުކުރަމުން ދަނިކޮށް، އީރާނުގެ "ޝާހިދު-139" މަރުކާގެ ޑްރޯނެއް އެއްވެސް ބޭނުމެއް ނެތި އެ މަނަވަރާ ދިމާލަށް މިސްރާބު ޖެހި ކަމަށެވެ. 

މަނަވަރާއި އޭގެ ފަޅުވެރިންގެ ސަލާމަތަށްޓަކައި، އަމިއްލަ ދިފާއުގައި އެ ޑްރޯން ވައްޓާލާފައިވަނީ އެ މަނަވަރުން އުދުއްސާލި "އެފް-35ސީ" މަރުކާގެ ހަނގުރާމަމަތީ ބޯޓަކުން ކަމަށް ހޯކިންސް ވިދާޅުވިއެވެ. މި ހާދިސާގައި އެމެރިކާގެ އެއްވެސް ސިފައިންގެ މީހަކަށް އަނިޔާއެއް ލިބިފައި ނުވާއިރު، އެމެރިކާގެ އެއްވެސް އާލާތަކަށް ގެއްލުމެއް ލިބިފައެއް ނުވެއެވެ.

އަންގާރަ ދުވަހުގެ ފަހުގެ ވަގުތެއްގައި ހޯމޫޒް ކަނޑުއޮޅި ސަރަހައްދުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އަށް ނިސްބަތްވާ ދެ ބޯޓަކާއި "މުހާޖިރު" މަރުކާގެ ޑްރޯނެއް، އެމެރިކާގެ ދިދަ ޖަހާފައިވާ އަދި އެމެރިކާގެ ފަޅުވެރިން ތިބި ވިޔަފާރި އުޅަނދަކާ ކައިރިވެ، އެ އުޅަނދަށް އަރައި ހިފަހައްޓާނެ ކަމުގެ އިންޒާރު ދީފައިވެއެވެ. ހޯކިންސް ވިދާޅުވީ އެމެރިކާގެ ގައިޑެޑް މިސައިލް ޑިސްޓްރޯޔަރަކުން އެކަމަށް އިޖާބަދީ، މިހާރު އެ ވިޔަފާރި އުޅަނދަށް ހިމާޔަތް ދެމުންދާ ކަމަށެވެ.

"ސެންޓްކޮމްގެ ފައުޖުތަކުން ދަނީ މެދުއިރުމަތީގައި އެމެރިކާގެ މުވައްޒަފުންނާއި، މަނަވަރުތަކާއި، މަތިންދާބޯޓުތަކުގެ ސަލާމަތްތެރިކަން ކަށަވަރުކުރުމަށް އެންމެ މަތީ ފަންތީގެ ފަންނީ ހުނަރާއެކު މަސައްކަތް ކުރަމުން. ބައިނަލްއަގުވާމީ ކަނޑުގެ ސަރަހައްދާއި ވައިގެ ސަރަހައްދުގައި އީރާނުން ކުރިއަށްގެންދާ ފުރައްސާރަކުރުންތަކާއި ދެމުންދާ އިންޒާރުތަކަށް ކެތެއް ނުކުރެވޭނެ." ސެންޓްކޮމް އިން ބުނެފައިވެ އެވެ.

އިތުރަށް ހޯކިންސް ބުނެފައި ވަނީ އީރާނުން ދައްކަމުންދާ ބޭނުމެއް ނެތް އުދުވާނީ އަމަލުތަކުގެ ސަބަބުން، ސަރަހައްދީ ހަމަޖެހުން ގެއްލުމުގެ ފުރުސަތު ބޮޑުވެގެންދާ ކަމަށެވެ.