"ބިރުދެއްކުމާއި ފިއްތުންތަކެއް ނެތް": އެމެރިކާ އާ އެކު މަޝްވަރާކުރުމުގެ ޝަރުތުތައް އީރާނުގެ ރައީސް ޕެޒެޝްކިއަން ކަނޑައަޅުއްވައިފި

އެމެރިކާއާއެކު މަޝްވަރާކުރުމަށް އީރާނުން ކަނޑައަޅާ ޝަރުތުތައް ރައީސް ޕެޒެޝްކިއަން ކަނޑައަޅުއްވަމުން އެއީ "ބިރުދެއްކުމާއި ފިއްތުންތަކެއް ނެތް" މަޝްވަރާތަކަކަށް ވާންޖެހޭނެ ކަމަށް އޭނާ ވިދާޅުވެއްޖެ އެވެ.

އިރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އެމެރިކާ އާ އެކު މަޝްވަރާތައް ކުރިއަށް ގެންދިއުމަށް އެ ގައުމުގެ ޚާރިޖީ ވަޒީރަށް އިރުޝާދު ދެއްވާފައިވާ ކަމަށެވެ. ނަމަވެސް އެ މަޝްވަރާތައް ކުރިއަށް ގެންދަންވާނީ އިހުތިރާމް ގާއިމުވެފައިވާ، ބިރުދެއްކުންތަކުން މިންޖުވެފައިވާ މާހައުލެއްގައި ކަމަށް އެމަނިކުފާނު ވިދާޅުވިއެވެ.

އަންގާރަ ދުވަހު އެކްސްގައި ކުރެއްވި ސިލްސިލާ ޕޯސްޓުތަކެއްގައި ރައީސް ޕެޒެޝްކިއަން ވިދާޅުވީ، ސަރަހައްދުގެ "އެކުވެރި ސަރުކާރުތަކުން" އެދިގެން އެމެރިކާއިން ހުށަހަޅާފައިވާ މަޝްވަރާގެ ހުށަހެޅުމަށް ޖަވާބުދާރީވުމަށް ޚާރިޖީ ވަޒީރު އައްބާސް އަރާގްޗީއަށް އަންގަވާފައިވާ ކަމަށެވެ.

"ބިރުދެއްކުމާއި ބުއްދިއަށް ގަބޫލުނުކުރެވޭ ފަދަ އުންމީދުތަކެއް ނެތް، އަދި އެކަށީގެންވާ މާހައުލެއް އޮތް ނަމަ، އިހުތިރާމާއި، ދުރުވިސްނުމާއި، އަދި މަސްލަހަތަށް އިސްކަންދިނުމުގެ އުސޫލުތަކުގެ މައްޗަށް ބިނާކޮށް، އިންސާފުވެރި އަދި ހަމަހަމަ މަޝްވަރާތަކެއް ކުރިއަށް ގެންދިއުމަށް އަޅުގަނޑު ވާނީ ޚާރިޖީ ވަޒީރަށް އިރުޝާދު ދީފައި،" ރައީސް ޕެޒެޝްކިއަން ލިޔުއްވާފައިވެ އެވެ.

"މި މަޝްވަރާތައް ކުރިއަށް ގެންދަންވާނީ އީރާނުގެ ގައުމީ މަސްލަހަތުތަކުގެ އިންތަކުގެ ތެރެއިން،" ކަމަށްވެސް އެމަނިކުފާނު ވިދާޅުވިއެވެ. ރައީސް ޕެޒެޝްކިއަން މިހެން ވިދާޅުވެފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި އިރާނުގެ ޚާރިޖީ ވަޒީރު އަރަގްޗީ އަންނަ ހުކުރު ދުވަހު އިސްތަންބޫލްގައި ބައްދަލުކުރައްވާނެ ކަމަށް ރިޕޯޓުތައް ބުނަމުންދާ ދަނޑިވަޅެއްގައެވެ.

ޑިޕްލޮމެޓިކް ގޮތުން މިފަދަ ފުރުސަތެއް މި ހުޅުވުނީ، އެމެރިކާގެ ކަނޑުގެ ސިފައިންގެ ފައުޖުތައް ދާދިފަހުން އެ ސަރަހައްދަށް ފޮނުވުމާ ގުޅިގެން ހުޅުަނގު އޭޝިއާގެ މަސްރަހު ނުތަނަވަސްވެފައިވާ ދަނޑިވަޅެއްގައެވެ.

އެމެރިކާއިން އަސްކަރީ ގޮތުން ކިތަންމެ ކުޑަ ފިޔަވަޅެއް އެޅި ނަމަވެސް، އޭގެ ރައްދު ވަރުގަދަކޮށް ދޭނެ ކަމުގެ އިންޒާރު އިރާނުން ވަނީ ދީފައެވެ.

އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާދީއްތަ ދުވަހު އިންޒާރު ދެއްވި ގޮތުގައި، އެމެރިކާއިން އިރާނަށް ހަމަލާދީފި ނަމަ ސަރަހައްދީ ހަނގުރާމައެއް ފެށިގެންދާނެއެވެ.

ނިއުކްލިއާ އެއްބަސްވުމެއްގެ ޝަރުތެއްގެ ގޮތުން، އިރާނުގެ ނިއުކްލިއާ މުއްސަނދިކުރުމުގެ ޕްރޮގްރާމް މުޅިން ހުއްޓާލުމަށާއި މިސައިލް އުފެއްދުމުގެ ގާބިލުކަން ހަނިކުރުމަށް އެމެރިކާއިން މީގެ ކުރިން ކުރި ޑިމާންޑުތަކަށް އިރާނުގެ ކަމާބެހޭ ފަރާތްތަކުން ވަނީ އިންކާރުކޮށްފައެވެ.

އިރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ފޮރިން ޕޮލިސީ ހެޑް އަލީ ބަޣޭރީ ހޯމަ ދުވަހު ވިދާޅުވީ، އެ ގައުމުގައި ރައްކާކޮށްފައިވާ މުއްސަނދިކޮށްފައިވާ ޔުރޭނިއަމްގެ ކުރިމަގާ ގުޅޭގޮތުން އެއްވެސް މަޝްވަރާއެއް ނުކުރާނެ ކަމަށެވެ.

"މުއްސަނދިކޮށްފައިވާ ނިއުކްލިއާ މާއްދާތައް އެއްވެސް ގައުމަކަށް ބަދަލުކުރުމުގެ އެއްވެސް ގަސްތެއް އިރާނުގެ އޮފިޝަލުންގެ ނެތް. އަދި މަޝްވަރާތައް އެފަދަ ކަންކަމުގެ މައްޗަކަށް ބިނައެއް ނުވޭ،" ބަޣޭރީ ވިދާޅުވިއެވެ.