އީރާން-އެމެރިކާ މަޝްވަރާތަކަށް ތައްޔާރު، ބައްދަލުވާ ތަން ކަނޑައެޅުމުގެ މަސައްކަތް ކުރިއަށް: އީރާން

އެމެރިކާ އާ އެކު ކުރިއަށް އޮތް ދުވަސްތަކުގައި މަޝްވަރާތައް ބޭއްވުމަށް ވާންޖެހޭ ތައްޔާރީތައް ނިމިފައިވާ ކަމަށާއި، މަޝްވަރާތައް ބާއްވާނެ ތަނަކާ ގުޅޭގޮތުން މިހާރު މަޝްވަރާކުރަމުންދާ ކަމަށް އީރާނުގެ ފޮރިން މިނިސްޓްރީން ބުނެފި އެވެ.

އަންގާރަ ދުވަހު ވާހަކަދައްކަވަމުން އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ވިދާޅުވީ، މަޝްވަރާތަކަށް ބޭނުންވާ ޕްލޭންތައް މިހާރު އެކުލަވާލާފައިވާ ކަމަށާއި، މަޝްވަރާތައް ބާއްވާނެ ތަނެއް ކަނޑައެޅުމުން އެކަން އިއުލާނުކުރާނެ ކަމަށެވެ.

ސަރަހައްދީ ގައުމުތަކުގެ އެއްބާރުލުމަށް ޝުކުރު އަދާކުރުން

ތެހެރާނާއި ވޮޝިންޓަނާ ދެމެދު ޚާރިޖީ ގުޅުންތައް ގާއިމުކުރުމަށް މަގުފަހިކޮށްދިނުމަށް މަސައްކަތްކުރާ ގައުމުތަކަށް ބަޣާއީ ވަނީ ޝުކުރު އަދާކުރައްވާފަ އެވެ. އޭނާ ވިދާޅުވީ "ހެޔޮ ނިޔަތާއެކު މަޝްވަރާތަކަށް ބޭނުންވާ މާހައުލު ގާއިމުކޮށްދިނުމަށް މަސައްކަތްކުރާ ހުރިހާ އެކުވެރި ގައުމުތަކެއްގެ" މަސައްކަތް ބަލައިގަންނަ ކަމަށެވެ.

މީގެ އިތުރުން ބަގާއީ ވިދާޅުވީ، މަޝްވަރާތައް ބާއްވާނެ ވަގުތާއި ތަނަކީ މީޑިއާތަކުން އަމިއްލައަށް ގޮތްގޮތަށް ވާހަކަދައްކަންޖެހޭ ކަމެއް ނޫން ކަމަށެވެ. އަދި އުސޫލެއްގެ ގޮތުން ބަލާއިރު، މަޝްވަރާތައް ބާއްވާނެ ވަގުތާއި ތަނަކީ އެހާ އުނދަގޫ ކަންތައްތަކެއް ނޫން ކަމަށާއި، އެއީ މީޑިއާގައި ތަފާތު ގޮތްގޮތަށް ވާހަކަ ފެތުރުމަށް ބޭނުންކުރާ ބަހަނާއަކަށް ވެގެންނުވާނެ ކަމަށް އޭނާ ނޫސްވެރިންނަށް ވިދާޅުވި އެވެ.

ބަޣާއީ ފާހަގަކުރެއްވި ގޮތުގައި ތުރުކީވިލާތާއި، އޮމާން އަދި ސަރަހައްދީ އެހެން ބައެއް ގައުމުތަކުން ވަނީ މި މަޝްވަރާތައް އެ ގައުމުތަކުގައި ބޭއްވުމަށް ތައްޔާރަށް އޮތްކަން ހާމަކޮށްފަ އެވެ. އަދި އެ ގައުމުތަކުން ހުށަހެޅި ހުށަހެޅުންތަކަކީ ވަރަށް އަގުހުރި ހުށަހެޅުންތަކެއްގެ ގޮތުގައި އޭނާ ސިފަކުރެއްވި އެވެ.

މަޝްވަރާތައް ބާއްވާނެ ތަނަކާ ގުޅޭގޮތުން މީޑިއާގައި ފެތުރޭ ޚަބަރުތައް

އީރާނުން މިފަދައިން ވާހަކަދައްކާފައިވަނީ، މި މަޝްވަރާތައް އިސްތަންބޫލްގައި ބޭއްވުމަށް ތައްޔާރުވަމުންދާ ކަމަށް މީޑިއާތަކުން ރިޕޯޓުކޮށްފައިވާ ދަނޑިވަޅެއްގަ އެވެ. ހޯމަ ދުވަހު ރޮއިޓާސް ނިއުސް އެޖެންސީން ވަނީ، އީރާނުގެ ނިއުކްލިއާ ހަކަތައިގެ ޕްރޮގްރާމަށް އަމާޒުކޮށްގެން އީރާނާއި އެމެރިކާއިން އާ ބުރެއްގެ މަޝްވަރާތަކެއް ބޭއްވުމަށް ރާވަމުންދާ ކަމަށް، ނަން ހާމަނުކުރާ އީރާނާއި އެމެރިކާގެ އޮފިޝަލުންނާ ހަވާލާދީ ރިޕޯޓުކޮށްފަ އެވެ.

އެ ރިޕޯޓުގައިވާ ގޮތުން، މި މަޝްވަރާތަކުގައި އީރާނުގެ ފޮރިން މިނިސްޓަރު އައްބާސް އަރާގްޗީ އާއި އެމެރިކާގެ ޚާއްސަ މަންދޫބު ސްޓީވް ވިޓްކޮފް ބައިވެރިވެވަޑައިގަންނަވާނެ އެވެ. އަދި ގަތަރާއި، ސައުދީ އަރަބިއްޔާ، ޔުނައިޓެޑް އަރަބް އެމިރޭޓްސް (ޔޫއޭއީ) އަދި މިސްރުގެ މަންދޫބުން ވެސް ދެ ގައުމުގެ ދެމެދުގަ އާއި ގިނަ ގައުމުތައް ބައިވެރިވާ ބައްދަލުވުންތަކުގައި ބައިވެރިވާނެ ކަމަށް ބެލެވެ އެވެ.

ރޮއިޓާސްގެ މި ރިޕޯޓާ ގުޅިގެން އީރާނުގެ އޮފިޝަލުން ވަގުތުން އެއްވެސް އެއްޗެއް ބުނެފައެއް ނުވެ އެވެ. އެމެރިކާގެ ނިއުސް ވެބްސައިޓެއް ކަމަށްވާ އެކްސިއޯސް އިންވެސް ވަނީ މިފަދަ ރިޕޯޓެއް ޝާއިއުކޮށްފަ އެވެ.

މި ރިޕޯޓުތައް އާންމުވެފައި ވަނީ، އީރާނާއި އެމެރިކާ އާ ދެމެދު ބާއްވާ ނިއުކްލިއާ މަޝްވަރާތަކުގެ ފްރޭމްވޯކަށް ކުރިއެރުންތަކެއް ލިބެމުންދާ ކަމަށާއި، އެމެރިކާ އިން އީރާނަށް ހަމަލާއެއް ދީފާނެ ކަމަށް ދެކެވޭ ވާހަކަތައް އީރާނުގެ ސަލާމަތީ ކަންކަމާ ބެހޭ އިސް އޮފިޝަލް އަލީ ލަރީޖާނީ ދޮގުކުރެއްވި ފަހުންނެވެ. އޭނާގެ ވާހަކަތަކަށްފަހު، އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ އީރާނުން ވޮޝިންޓަނާ މުއާމަލާތް ކުރަން ފަށާފައިވާ ކަމަށް ވިދާޅުވެފަ އެވެ.

މި ކުރިއެރުންތައް އައިސްފައިވަނީ ސަރަހައްދީ ނުތަނަވަސްކަން ބޮޑުވެ، އީރާނަށް އަސްކަރީ ގޮތުން ދޭ ކޮންމެ ހަމަލާއަކަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އެ ގައުމުން ދެމުންދާ ދަނޑިވަޅެއްގަ އެވެ.

ނިއުކްލިއާ އެއްބަސްވުމަކާ ގުޅިގެން އެމެރިކާއިން ކުރިން ހުށަހަޅާފައިވާ ބައެއް ޝަރުތުތަކަށް އީރާނުގެ އޮފިޝަލުން ވަނީ މީގެ ކުރިން އިންކާރުކުރައްވާފަ އެވެ. އޭގެ ތެރޭގައި ޔުރޭނިއަމް މުއްސަނދިކުރުން މުޅިން ހުއްޓާލުމާއި، އީރާނުގެ މިސައިލް ޕްރޮގްރާމަށް ހުރަސްތަކެއް ކުރިމަތިކުރުން ހިމެނެ އެވެ.