އީރާން، ޗައިނާ، ރަޝިޔާ ގުޅިގެން އިންޑިއާ ކަނޑުގައި އަސްކަރީ ތަމްރީން ތަކެއް
މި ތަމްރީނުތައް ކުރިއަށް ގެންދަނީ އެމެރިކާއިން އީރާނަށް އަމާޒުކޮށް ބިރުދެއްކުމުގެ ބަސްމަގު ވަރުގަދަކޮށް އީރާނުގެ އައްސޭރިފަށާ ކައިރިއަށް އަސްކަރީ ބާރުތައް ޖަމާކޮށްފައިވާ ދަނޑިވަޅެއްގައި.
މި ފޮޓޯއިން ފެންނަނީ 2019 ވަނަ އަހަރުގެ ޑިސެމްބަރު މަހުގެ 27 އިން 30 އަށް، އިންޑިއާ ކަނޑުގެ އުތުރު ގައި އަދި އޮމާން ކަނޑުގައި އީރާނާއި، ރަޝިޔާ އަދި ޗައިނާގެ ކަނޑުގެ ސިފައިން ގުޅިގެން ކުރިއަށްގެންދިޔަ ބޮޑު އަސްކަރީ ތަމްރީނުތަކުގެ މަންޒަރެއް. | ޕްރެސްޓީވީ
އީރާނާއި، ޗައިނާ އަދި ރަޝިޔާއިން ގުޅިގެން ކަނޑުގެ އަސްކަރީ ތަމްރީނުތަކެއް ބޭއްވުމަށް ނިންމައިފިއެވެ.
އީރާނާއި ވޮޝިންޓަނާ ދެމެދު މަސްރަހު ގޯސްވެފައިވާ ދަނޑިވަޅެއްގައި، އީރާނާއި ރަޝިޔާ އަދި ޗައިނާއިން ގުޅިގެން ބާއްވާ މި އަސްކަރީ ތަމްރީނުތައް އިންޑިއާ ކަނޑުގެ އުތުރު ސަރަހައްދުގައި ކުރިއަށް ގެންދިއުމަށް ހަމަޖެހިފައިވަނީ ފެބްރުއަރީ މަހުގެ ފަހުކޮޅުގައެވެ.
"މެރިޓައިމް ސެކިއުރިޓީ ބެލްޓް" ގެ ނަމުން ނަންދީފައިވާ މި ތަމްރީނުތަކުގައި އީރާނުގެ ނޭވީއާއި، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ނޭވީގެ އިތުރުން ޗައިނާ އާއި ރަޝިޔާގެ ކަނޑުގެ ސިފައިންގެ ޔުނިޓްތަކުން ބައިވެރިވާނެއެވެ.
އޮފިޝަލުން ހާމަކުރައްވާފައިވާ ގޮތުގައި، މި ތަމްރީނުތަކުގެ މައިގަނޑު މަގުސަދަކީ ކަނޑުގެ ސަލާމަތާއި ރައްކާތެރިކަން އިތުރުކުރުމާއި، މި ތަމްރީނުތަކުގައި ބައިވެރިވާ ގައުމުތަކުގެ މެދުގައި އޮންނަ އަސްކަރީ ގުޅުން އިތުރަށް ބަދަހިކުރުމެވެ.
އީރާނުގެ ނޭވީން 2019 ވަނަ އަހަރު ފުރަތަމަ ފަހަރަށް ފެށި "މެރިޓައިމް ސެކިއުރިޓީ ބެލްޓް" ތަމްރީނުތައް މިހާތަނަށް ހަތް ފަހަރު ބާއްވާފައިވެއެވެ. މިއީ ސަރަހައްދީ އަދި ބައިނަލްއަގުވާމީ ކަނޑުގެ ސަރަހައްދުތަކުގައި ތެހެރާނާއި، ބެއިޖިންގް އަދި މޮސްކޯއާ ދެމެދު އޮންނަ އަސްކަރީ ގުޅުން ހާމަކޮށްދޭ ކަމެކެވެ.
މީގެ ކުރިން ބޭއްވި މިފަދަ ތަމްރީނުތަކުގައި ކަނޑުމަތީގައި މީހުން ހޯދުމާއި ސަލާމަތްކުރުމުގެ އޮޕަރޭޝަންތަކާއި، ކަނޑުގެ ސަލާމަތީ ކަންކަމާ ގުޅޭ ތަމްރީނުތަކުގެ އިތުރުން ގުޅިގެން މަސައްކަތް ކުރުމުގެ ހަރަކާތްތައް ކުރިއަށް ގެންގޮސްފައިވެއެވެ.
ކުރިއަށް އޮތް އަސްކަރީ ތަމްރީނުތައް ބޭއްވުމަށް ތައްޔާރުވަމުން މިދަނީ، ވޮޝިންޓަނުން އީރާނަށް އަމާޒުކޮށް ބިރުދެއްކުމުގެ ބަސްމަގު ވަރުގަދަކޮށް، އީރާނުގެ އައްސޭރިފަށާ ކައިރިއަށް އެމެރިކާގެ އަސްކަރީ ބާރުތައް ވަރަށް ބޮޑަށް ޖަމާކޮށްފައިވާ ދަނޑިވަޅެއްގައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އަސްކަރީ ބާރުތައް ޖަމާކުރުމުގެ ބޭނުމަކީ މަޝްވަރާގެ މޭޒަށް އައުމަށް ތެހެރާނަށް ބާރު އެޅުން ކަމަށެވެ. އަދި އެއްބަސްވުމަކަށް ނާދެވިއްޖެނަމަ، 2025 ވަނަ އަހަރުގެ ޖޫން މަހު އީރާނުގެ ނިއުކްލިއާ މަރުކަޒުތަކަށް އެމެރިކާއިން ދިން ހަމަލާއަށްވުރެ މާ ނުރައްކާތެރި އަސްކަރީ ހަމަލާއެއް ދޭނެކަމުގެ އިންޒާރު ވެސް ޓްރަމްޕް ވަނީ ދެއްވާފައެވެ.
އީރާނުން ވަނީ އެމެރިކާގެ ބިރުދެއްކުންތަކާއި މަޖުބޫރުކުރުންތަކަށް ތަކުރާރުކޮށް އިންކާރުކޮށްފައެވެ. އަދި ބިރުދެއްކުމާއި ފިއްތުންތަކުގެ ތެރެއިން ޑިޕްލޮމެސީ ކާމިޔާބު ނުވާނެ ކަމަށް އީރާނުން ބުނެފައިވެއެވެ. ހަމަހަމަކަމާއި އަދި އެއް ގައުމުން އަނެއް ގައުމަށް ކުރާ އިހުތިރާމުގެ މައްޗަށް ބިނާވެފައިވާ މަޝްވަރާތަކަށް ތައްޔާރަށް އޮތް ނަމަވެސް، އެމެރިކާ ނުވަތަ އެމެރިކާގެ ބައިވެރިން އީރާނުގެ މަސްލަހަތުތަކަށް އަމާޒުކޮށްދޭ ކޮންމެ ހަމަލާއަކަށް ވަގުތުން ވަރުގަދަ ރައްދެއް ދޭނެ ކަމުގެ އިންޒާރު ވެސް އީރާނުން ވަނީ ދީފައެވެ.
މިދިޔަ ހޯމަ ދުވަހުން ފެށިގެން އެމެރިކާގެ ކަނޑުގެ ސިފައިންގެ ސްޓްރައިކް ގްރޫޕެއް މެދުއިރުމަތީގެ ކަނޑުގެ ސަރަހައްދުގައި ހަރަކާތްތެރިވަމުންދާއިރު، ބޭނުންވެއްޖެ ހިނދެއްގައި އީރާނަށް ހަމަލާދިނުމަށް އެ ގްރޫޕް އޮތީ "ތައްޔާރަށް" ކަމަށް ޓްރަމްޕް ވަނީ ވިދާޅުވެފައެވެ.
